ဘရာဇီးလ် တိုက်စစ်မှူးဟောင်း ရော်နယ်ဒိုနှင့် စပိန်တင်းနစ်သမား နာဒယ်တို့ရဲ့ ပိုကာ စိန်ခေါ်ပွဲ

စက်တင်ဘာ ၂၆၊ ၂၀၁၄
M-Media

– တစ်ယောက်ချင်း ပိုကာကစားရန် ဘရာဇီးလ်ဂန္တ၀င်တိုက်စစ်မှူး ရော်နယ်ဒို၏ စိန်ခေါ်မှုကို စပိန် တင်းနစ်အကျော်အမော် ရာဖေးလ်းနာဒယ်က လက်ခံလိုက်သည်ဟု သိရသည်။

ဂရင်းစလင်း ဆုဖလား ၁၄ ကြိမ်ရရှိထားသည့် နာဒယ်နှင့် ရော်နယ်ဒိုတို့မှာ ယမန်နှစ်က ပြုလုပ်ခဲ့သည့်  European Poker Tour Prague Charity Challenge ပြိုင်ပွဲတွင်လည်း တွေ့ဆုံခဲ့ပြီး ထိုစဉ်က နာဒယ်က အနိုင်ရရှိခဲ့သည်။

ထို့ကြောင့် မကျေပွဲအဖြစ် ရော်နယ်ဒိုက ပြန်လန်စိန်ခေါ်ခဲ့ခြင်းဖြစ်ပြီး ၎င်းတို့ နှစ်ဦး၏ ပွဲအား လာမည့်နိုဝင်ဘာ ၆ ရက်နေ့တွင် လန်ဒန်၌ ကျင်းပပြုလုပ်သွားမည်ဖြစ်ကာ Pokerstars.com မှ ကမ္ဘာတစ်ဝှမ်းသို့ တိုက်ရိုက်ထုတ်လွှင့်သွားမည်ဖြစ်သည်။

“ပြီးခဲ့တဲ့အခေါက် ကျွန်တော်တို့ ကစားတုန်းက ရာဖာ(နာဒယ်) အနိုင်ရခဲ့ပြီး ပျော်စရာကောင်းခဲ့ပါတယ်။ အခုတစ်ခေါက်တော့ အရင်ကနဲ့ မတူတော့ပါဘူး။ ဘာ့ကြောင့်လည်းဆိုတော့ ကျွန်တော်ရဲ့ ပိုကာအရည်သွေးဟာ တိုးတက်လာပြီး ပြင်ဆင်မှုတွေလည်း ပြုလုပ်ထားမှာမို့လို့ပါ” ဟု ရော်နယ်ဒိုက ပြောကြားခဲ့သည်။

ရော်နယ်ဒို၏ စိန်ခေါ်မှုကို လက်ခံခဲ့သည့် နာဒယ်ကမူ ထိုပွဲမှာ မိမိ၏ဘ၀တွင် ပထမဆုံး တိုက်ရိုက်ထုတ်လွှင့်ခံရမည့် ပိုကာကစားပွဲ ဖြစ်လာမည်ဖြစ်ကြောင်း၊ ရော်နယ်ဒိုနှင့် နောက်ဆုံးယှဉ်ပြိုင်သည်မှာ တစ်နှစ်ကြာခဲ့ပြီးနောက် မိမိ၏ ကျွမ်းကျင်မှုအတွက် ယုံကြည်မှု ပိုလာကြောင်း ပြောကြားခဲ့သည်။

“ပိုကာကစားရတာကို ကျွန်တော့် တကယ့်ကို နှစ်သက်ပါတယ်။ ဒါ့ကြောင့် အဲဒီကစားပွဲအတွက် လေ့ကျင့်ဖို့ ကျွန်တော် မစောင့်နိုင်တော့ပါဘူး” ဟု ၎င်းက ဖွင့်ဟခဲ့သည်။

Daily Mail