ဝဲလ်ဘတ် ဟက်ထရစ်သွင်းပြီး အာဆင်နယ်နိုင်၊ စပိန် ၂ သင်းစလုံး နိုင်ပြီး လီဗာပူးလ်ရှုံးတဲ့ ချန်ပီယံလိဂ် ပွဲစဉ်-၂

အောက်တိုဘာ ၂ ၊ ၂၀၁၄
M-Media

ဝဲလ်ဘတ်ရဲ့ ဟက်ထရစ်နဲ့ သုံးမှတ်စရတဲ့ အာဆင်နယ်၊ စပိန်အသင်းတွေ အခြေအနေကောင်းခဲ့ပြီး လီဗာပူးလ်တို့ ရှုံးနိမ့်ခဲ့ရတဲ့ ချန်ပီယံလိဂ် အုပ်စုအဆင့် ဒုတိယမြောက်ပွဲစဉ်များ

– ချန်ပီယံလိဂ် ပထမအုပ်စု ၄ ခုရဲ့ အုပ်စု ဒုတိယ ပွဲစဉ်တွေကို ယနေ့နံနက်မှာ ကစားခဲ့ပြီး စပိန်ထိပ်သီး နှစ်သင်းဖြစ်တဲ့ ရီးယဲလ်နဲ့ အက်သလက်တီကိုတို့ ပြိုင်ဘက်တွေကို ကပ်နိုင်ခဲ့ကာ၊ အာဆင်နယ်ကတော့ ၀ဲလ်ဘတ်ရဲ့ ဟက်ထရစ်နဲ့ ချန်ပီယံလိဂ် ပထမဆုံးနိုင်ပွဲကို ရခဲ့ပါတယ်။ ပရီးမီးယားလိဂ်မှာ ရုန်းကန်နေရတဲ့ လီဗာပူးလ်ကတော့ ဘေဆယ်ကို အဝေးကွင်းမှာ အရေးနိမ့်ခဲ့ပါတယ်။

အုပ်စု A

အက်သလီတီကိုမက်ဒရစ် ၁-၀ ဂျူဗင်တပ်စ်
မာလ်မို ၂-၀ အိုလံပီယာကော့စ်

စီးရီးအေထိပ်သီး ဂျူဗင်တပ်စ်တို့ ဒီပွဲရှုံးခဲ့ပေမယ့် ကစားပုံ ဆိုးရွားခဲ့တာတော့ မဟုတ်ပါဘူ။ အဖွင့်ပွဲမှာ အိုလံပီယာကော့စ်ကို ရှုံးထားတဲ့ အက်သလက်တီကိုကို ဖိအားပေးနိုင်ခဲ့ပါတယ်။ ဒါပေမယ့် အက်သလက်တီကိုနောက်တန်းက အံ့သြဖွယ်ကောင်းလောက်အောင် ကောင်းမွန်ခဲ့ပြီး ဂျူဗင်တပ်စ် တိုက်စစ်မှူးတွေ ဂိုးသွင်းခွင့် မရအောင် စနစ်တကျ တားဆီးဖြတ်တောက်နိုင် ခဲ့ပါတယ်။ အက်သလက်တီကို အတွက် တစ်လုံးတည်းသော အနိုင်ဂိုးကို ၇၅ မိနစ်မှာ အာဒါသူရမ်က အနီးကပ် သွင်းယူပေးခဲ့တာဖြစ်ပြီး ဂျူဗင်တပ်စ်တို့ကတော့ ဒီရာသီမှာ ပထမဆုံးရှုံးပွဲ တွေ့ကြုံခဲ့ရပါတယ်။

ဆွီဒင်မြေမှာကစားခဲ့တဲ့ မာလ်မိုနဲ့ အိုလံပီယာကော့စ်တို့ရဲ့ ပွဲမှာ အိမ်ရှင်မာလ်မိုတို့ အဲ့ဖွယ်ခြေစွမ်းပြနိုင်ခဲ့ပြီး နောက်ခံလူ ရိုဆင်ဘတ်ရဲ့ ၄၂၊ ၈၂ မိနစ်သွင်းဂိုးတွေနဲ့ အနိုင်ယူနိုင်ခဲ့ပါတယ်။ ပွဲစဉ် ၂ ပွဲကစားပြီးအချိန်မှာတော့ လေးသင်းစလုံးဟာ ၃ မှတ်စီ ရရှိထားပါတယ်။

အုပ်စု B

ဘေဆယ် ၁-၀ လီဗာပူးလ်
လူဒိုဂိုးရက်စ် ၁-၂ ရီးယဲလ်မက်ဒရစ်

အဖွင့်ပွဲစဉ်မှာ လူဒိုဂိုးရက်စ်ကို ကံကောင်းစွာနဲ့ အနိုင်ရခဲ့တဲ့ လီဗာပူးလ်တို့ ဆွဇ်ဇာလန်မြေမှာ ကစားခဲ့တဲ့ အခုပွဲမှာတော့ ယမန်နှစ်က ချယ်ဆီးရဲ့ ကံကြမ္မာအတိုင်း ဘေဆယ်ကို အရှုံးပေးခဲ့ရပါတယ်။ ဘေဆယ်တို့ ပထမပိုင်းမှာ အခွင့်အရေးတစ်ချို့ရခဲ့ပြီး လီဗာပူးလ်ကတော့ ထုံးစံအတိုင်း အိမ်ရှင်အသင်းကို ဖိအားပေးမှုတွေ သိပ်မလုပ်နိုင်ခဲ့ပါဘူး။ ဘေဆယ်အတွက် ၃ မှတ်ရစေမယ့်ဂိုးကိုတော့ စထရဲလာက ၅၂ မိနစ်မှာ သွင်းယူပေးခဲ့တာဖြစ်ပါတယ်။

စောစောစီးစီး ဦးဆောင်ဂိုး ပေးလိုက်ရတဲ့ ရီးယဲလ် လိုချင်တဲ့အနိုင် ၃ မှတ်ကိုတော့ ရယူနိုင်ခဲ့ပါတယ်။ ဘယ်လ်ဂျီယံ အသင်းငယ် လူဒိုဂိုးရက်စ်တို့ ပွဲစတာနဲ့ ရီးယဲလ်ကို သူတင်ကိုယ်တင် ကစားနိုင်ခဲ့ပြီး ၆ မိနစ်မှာရတဲ့ ထောင့်ကန်ဘောကို မာဆယ်လင်ဟိုက ခေါင်းတိုက်ကာ ဦးဆောင်ဂိုး သွင်းပေးခဲ့ပါတယ်။ ၁၀ မိနစ်မှာပဲ ရီးယဲလ်တို့ ပင်နယ်တီရခဲ့ပြီး ရော်နယ်ဒိုရဲ့ ကန်ချက်ကို ဂိုးသမား စတိုယာနော့ဗ်က ကာကွယ်နိုင်ခဲ့ပါတယ်။

ဦးဆောင်ဂိုးရပြီးတဲ့နောက် ပရိတ်သတ်ရဲ့ အားပေးမှုနဲ့အတူ အိမ်ရှင်တို့ ရီးယဲလ်ကို မာမာကျောကျော ကစားနိုင်ခဲ့ပေမယ့် တဖြည်းဖြည်းနဲ့ ရီးယဲလ်တို့က ပွဲကို ထိန်းချုပ်လာနိုင်ခဲ့ပါတယ်။ ၂၄ မိနစ်မှာတော့ ရော်နယ်ဒိုဟာ သူရဲ့ ဒုတိယမြောက်ပင်နယ်တီကို အမှားအယွင်းမရှိ ကန်သွင်းနိုင်ခဲ့ပြီး၊ လူစားဝင်လာတဲ့ ဘင်ဇီမာကလည်း ၇၇ မိနစ်မှာ ရီးယဲလ်အတွက် အနိုင်ဂိုးကို သွင်းယူပေးနိုင်ခဲ့တာကြောင့် ရီးယဲလ်တို့ ပွဲအပြီးမှာ အဖိုးတန် အနိုင်သုံးမှတ်ကို ရရှိခဲ့ကာ ရာနှုန်းပြည့်အနိုင် ၆ မှတ်နဲ့ အုပ်စုကို ဦးဆောင်နိုင်ခဲ့ပါတယ်။

အုပ်စု C

လေဗာကူဆင် ၃-၁ ဘင်ဖီကာ
ဇင်းနစ် ၀-၀ မိုနာကို

အဖွင့်ပွဲမှာ အရှုံးနဲ့ရင်ဆိုင်ခဲ့ရတဲ့ လေဗာကူဆင်ကတော့ အိမ်ကွင်းမှာ ပေါ်တူဂီကလပ် ဘင်ဖီကာကို သက်တောင့်သက်သာပဲအနိုင်ရခဲ့ပါတယ်။ ဘောလုံးပိုင်ဆိုင်မှုမှာ ဘင်ဖီကာကို မယှဉ်နိုင်ခဲ့ပေမယ့် ဂိုးသွင်းခွင့်မှာတော့ အပြတ်အသတ်ကိုသာခဲ့ပြီး တိုက်စစ်မှူးတွေ ဂိုးသွင်းသေချာမယ်ဆိုရင် ဒီထက်ပိုပြီးတောင် ဂိုးပြတ်သွားနိုင်ပါတယ်။

ပထမပွဲမှာ ၃ မှတ်စီရထားတဲ့ ဇင်းနစ်နဲ့ မိုနာကိုတို့ရဲ့ပွဲမှာတော့ မိုနာကိုတို့ အပိုင်ဂိုးသွင်းခွင့် ၂ ကြိမ်လောက်ရခဲ့ပေမယ့် ဇင်းနစ် ဂိုးသမား လိုဒီဂျင် အစွမ်းပြ ကာကွယ်နိုင်ခဲ့တာကြောင့် ဇင်းနစ်တို့ အိမ်ကွင်းမှာ ရှုံးနိမ့်မယ့် အရေးကနေ လွတ်မြောက်ခဲ့တာဖြစ်ပါတယ်။

အုပ်စု D

အန်ဒါလက်ခ်ျ ၀-၃ ဒေါ့မွန်
အာဆင်နယ် ၄-၁ ဂါလာတာစာရေး

အာဆင်နယ်ကို အဖွင့်ပွဲမှာ အနိုင်ယူခဲ့တဲ့ ဂျာမန်ထိပ်သီးဒေါ့မွန်တို့ ဒီနေ့ပွဲမှာလည်း အမှားအယွင်းမရှိခဲ့ဘဲ အဝေးကွင်းမှာ ဂိုးပြတ်နဲ့နိုင်ခဲ့ပါတယ်။ ပွဲအစ ၃ မိနစ်မှာပဲ အင်မိုဘိုင်းလ်ရဲ့ဂိုးနဲ့ ဦးဆောင်ခဲ့ပြီး ၆၉ မိနစ်နဲ့ ၇၉ မိနစ်မှာ အရာမို့စ်က အနိုင်သေချာစေမယ့်ဂိုးတွေကို သွင်းယူပေးခဲ့တာကြောင့် ဒေ့ါမွန်တို့ ဇယားထိပ်မှာ ၃ မှတ်အသာနဲ့ ဦးဆောင်နိုင်ခဲ့ပါတယ်။

ဒဏ်ရာပြဿနာနဲ့ ရင်ဆိုင်နေရတဲ့ အာဆင်နယ်တို့ကတော့ အိမ်ကွင်းအီမရိတ်မှာ ၀ဲလ်ဘတ်ရဲ့ ဟက်ထရစ်နဲ့အတူ ချိန်ပီယံလိဂ် ပထမဆုံး အနိုင် ၃ မှတ်ကို ရယူနိုင်ခဲ့ပါတယ်။ ပထမပိုင်းမှာပဲ ၀ဲလ်ဘတ်က ၂ ဂိုးနဲ့ ဆန်းချက် ၁ ဂိုးသွင်းပေးခဲ့ကာ ၃ ဂိုးပြတ်ခဲ့ပြီး ဒုတိယပိုင်းမှာ ၀ဲလ်ဘတ်က သူ့ရဲ့ဟက်ထရစ်ဂိုးသွင်းပေးခဲ့ပါတယ်။ မိနစ် ၆၀ မှာ ဂိုးသမား ရှက်ဇက်နီအထုတ်ခံခဲ့ရပြီး ၆၃ မိနစ်မှာ တစ်ဂိုးပြန်ပေးလိုက်ရပေမယ့် အာဆင်နယ်တို့ အနိုင်ကို ပွဲပြီးတဲ့အထိ ထိန်းနိုင်ခဲ့ပါတယ်။