Dream Chaser ကို အာကာသ ခရီးသွားလုပ်ငန်းတွင် သုံးမည်

အောက်တိုဘာ ၃ ၊ ၂၀၁၄
M-Media

ပြီးခဲ့တဲ့ အပတ်ထဲက NASA ရဲ့ အကာသ ခရီးစဉ်တွေ အတွက် သယ်ယူ ပို့ဆောင်ရေး လုပ်ငန်း ကန်ထရိုက်ကို Boeing ရဲ့ CST-100 နဲ့ SpaceXရဲ့ Dragon တို့ကို အသုံးပြုရန် ရွေးချယ်လိုက်ပြီး Sierra Nevada Corpရဲ့ Dream Chaser ကတော့ အရွေးမခံရတဲ့ အတွက် ဥပဒေအရ ရင်ဆိုင် သွားမယ်လို့ ကြေငြာခဲ့ပါတယ်။

ယှဉ်ပြိုင်တဲ့ ကုမ္ပဏီသုံးခုထဲမှာ Sierra Nevada Corpရဲ့ Dream Chaser ကသာ မြောပြင်ပေါ် ပျံသန်း ဆင်းသက်နိုင်တဲ့ လွန်းပျံယာဉ် ပုံစံဖြစ်ပါတယ်။ ကျန်နှစ်မျိုးကတော့ capsule ပုံစံတွေဖြစ်ပါတယ်။

ဒီနေ့ (အောက်တိုဘာ ၂)သတင်းအရ အာကာသခရီးသွား လုပ်ငန်းတွေ လုပ်ကိုင်ဖို့ ပြင်ဆင်နေတဲ့ Stratolaunch Systems က Dream Chaser လွန်းပျံယာဉ်ငယ်ကို ဝယ်ယူဖို့ စိတ်ဝင်စားတယ်လို့ ပြောဆို လိုက်ပါတယ်။

Stratolaunch Systemsကို ပိုင်ဆိုင်သူကတော့ Microsoft ကိုပူးတွဲတည်ထောင်သူ Paul Allen ဖြစ်ပါတယ်။

Dream Chaser လွန်းပျံယာဉ်ငယ်ဟာ ခရီးသည် ၇ ဦး လိုက်ပါနိုင်ပြီး NASA ရဲ့ လွန်းပျံယာဉ်ကြီးတွေ ရဲ့ ၄ ပုံ တစ်ပုံ အရွယ်အစားသာ ရှိပါတယ်။

ပျံသန်းပုံကတော့ လွန်းပျံယာဉ်ငယ်ကို ကမ္ဘာ့လေထုလွှာ အပေါ်ပိုင်းထိ လေယာဉ်ကြီးတစ်စင်းက သယ်ယူသွားပြီး လွှတ်တင်ပေးမှာ ဖြစ်တဲ့အတွက် Virgin Galactic ရဲ့ SpaceShipTwo နဲ့ ဆင်တူပါတယ်။

တင်ဆက်သူ- daythanix