ဧရာဝတီတိုင်း ဒေသအချို့တွင် ကုရ်ဘာနီ အီးဒ်နေ့ သားကောင် ကိစ္စ နည်းလမ်းပေါင်းစုံဖြင့် ကန့်သတ် တားမြစ်ခံရ

အောက်တိုဘာ ၄၊ ၂၀၁၄
M-Media
ချမ်းငြိမ်းအေး

ဧရာဝတီတိုင်း မြို့နယ်အတွင်းရှိ တလုတ်တော်၊ အပါအ၀င် ဒေသအချို့မှာ အစ္စလာမ်သာသနာဝင်များ အီးဒ်နေ့ သားကောင်ပြုလုပ်ရန် အတွက် ဒေသအာဏာပိုင်များမှ ပထမပိုင်းတွင် ခွင့်ပြုခဲ့သော်လည်း ယခုအခါ အီးဒ်နေ့ နီးကပ်လာသည့် အချိန်တွင် ဘုန်းတော်ကြီးများနှင့် ဇီဝိတဒါနအသင်းများမှ ကန့်ကွက်သည့် အတွက် သားကောင်ပြောင်းလဲပြုလုပ်ရန် ဖိအားပေးခံရကြောင်း သိရပါတယ်။

အဆိုပါကိစ္စနဲ့ ပတ်သက်ပြီး တာဝန်ရှိသူ တစ်ဦးကို M-Media မှ ဆက်သွယ်မေးမြန်းခဲ့ရာ အောက်ပါအတိုင်း ပြောကြားခဲ့ပါတယ်။

“ကုရ်ဘာနီအီးဒ်နေ့ သားကောင်အတွက် ဧရာဝတီတိုင်းဒေသကြီး အာဏာပိုင်က ပထမပိုင်းက ခိုင်းနွား မဟုတ်ရင်ပြီးရော၊ အသက်အရွယ် စည်းကမ်းနဲ့ ကိုက်ညီနဲ့ နွားတွေကို ခွင့်ပြုမယ်လို့ အစည်းအဝေးမှာ ပြောတယ်။ သယ်ဆောင်ရေးမှာလည်း တစ်ခြားအဖွဲ့အစည်းတွေက မနှောက်ယှက်အောင် သူတို့တားဆီးပေးမယ်ဆိုပြီး စာလည်း ထုတ်ပေးခဲ့တယ်။ အဲ့လို အဆင်ပြေခဲ့ပြီးတော့ မနေ့က ညနေ ၅-နာရီလောက်မှ အရေးပေါ် အစည်းအဝေးရှိတယ်ဆိုပြီး ဟင်္သာတမြို့ပေါ် ဗလီ ၅-လုံး၊ တလုတ်တော်၊ ကန်နီက ဗလီဂေါပကအဖွဲ့တွေကို အစည်းအဝေးခေါ်တယ်။ အစည်းအဝေးမှာ မွတ်စလင်ဘက်က ဗလီဂေါပကတွေ ၁၀-ယောက်လောက်တက်ပါတယ်။ နောက် ခယက၊ မယက ပါတယ်။ ဇီဝိတဒါန ဦးဆောင်တဲ့ သံဃာ ၄၅ နဲ့ ၅၀ လောက်နဲ့ လူ ၁၅-ယောက်လောက်ပါတယ်။

ဧရာဝတီတိုင်း ၀န်ကြီးချုပ်ကလည်း တည်ငြိမ်အေးချမ်းရေးကို ရှေ့ရှုပြီးတော့ လုပ်ကြပါဆိုပြီး ခယက နဲ့ မယက ကို ညွှန်ကြားစာ ထုတ်ထားတယ်ဆိုတာလည်း ကျွန်တော်တို့ကို ပြောပြတယ်။ ဟုတ်ကဲ့ ခယက နဲ့ မယက က မှတ်ချက်ပေးတာကတော့ သံဃာတော်တွေကလည်း အခုလိုလာပြီး မေတ္တာရပ်ခံတယ်။ ခင်ဗျားတို့ဘက်ကလည်း တည်ငြိမ်အေးချမ်းရေး ငြိမ်းချမ်းရေးကို ရှေ့ရှုပြီး ဒီဟာကို လုပ်ပေးနိုင်ရင် လုပ်ပေးပါလို့ဆိုပြီး ပြောတယ်။ ပထမပိုင်းကတော့ သူတို့က လုံခြုံရေး ကိစ္စလုပ်ပေးမယ် ဘာညာ ပြောထားပြီးသားပါ။ အခုကျတော့ သံဃာတော်တွေက မေတ္တာရပ်ခံတဲ့အတွက် သံဃာတော်တွေ ဘက်ကိုလိုက်ပြီး နွား မလုပ်ကျပါနဲ့တော့ဆိုတဲ့ ပုံစံမျိုး မေတ္တာရပ်ခံတယ်။ ဖိအားပေးတာ မဟုတ်ပါဘူးလို့လည်း ပြောပါတယ်။

အစည်းအဝေးမှာ သူတို့အားလုံးက ၀ိုင်းပြီး တောင်းဆိုတယ်။ မေတ္တာရပ်ခံတယ်ပေါ့ဗျာ။ နွားမလုပ်ပါနဲ့ တခြားဟာလုပ်ပါဆိုပြီး ဇီဝိတဒါနအဖွဲ့က လူတွေက ပြောတယ်။ နောက်ဆုံး အစည်းအဝေးအပြီးမှာတော့ ကျွန်တော်တို့တွေ ကိုယ်တိုင်ပဲ နွားမလုပ်တော့ပါဘူးလို့ ပြောပစ်ခဲ့တယ်။

မွတ်စလင်တွေက စည်းကမ်းသတ်မှတ်ချက်အတိုင်း နွားတွေကို ၀ယ်ထားပြီးဆိုတော့ အခုက အခက်အခဲ တွေ့နေပါတယ်။ နွားမလုပ်ဘဲ ဆိတ်ကို ပြောင်းလုပ်မယ်ဆိုပြန်တော့ ဆိတ်တစ်ကောင်ဈေးနှုန်းက နွားတစ်ကောင် ဈေးနှုန်းလောက် ဈေးခေါ်နေကြတယ်။ ဟုတ်ကဲ့ ကျွန်တော်တို့ ဒီဘက်တွေမှာ ၀ယ်ရတာက တစ်ခြားဘာသာဝင်တွေဆီကပါ။ ဒီဘက်မှာက နွားရော ဆိတ်ရော မွတ်စလင်တွေ ရောင်းတာ နည်းပါတယ်။ ဆိတ်တစ်ကောင်ကို နွားတစ်ကောင်လောက် ဈေးခေါ်နေကြတော့ ဘယ်လိုမှ အဆင်မပြေတော့ဘူး။ ၀ယ်ထားပြီးသား နွားတွေလည်း ပြန်ရောင်းဖို့ ခက်ခဲနေကြတယ်။

ဟုတ်ကဲ့ ကျွန်တော်တို့တွေကို တစ်ခြား ဖိအားပေးတာတော့ မရှိပါဘူး။ မေတ္တာရပ်ခံတယ်ဆိုတဲ့ စကားလုံးသုံးပြီး အနုနည်းနဲ့ တားလိုက်တာပဲလေ။ ပထမတုန်းကလည်း ၀န်ကြီးချုပ်က မေတ္တာရပ်ခံတယ်ဆိုတဲ့စကားလုံး သုံးပြီးပြောခဲ့တယ်။ အုပ်ချုပ်မှုအပိုင်းအနေနဲ့ တားမြစ်တယ်ဆိုတဲ့စကားလုံး သုံးလို့မရဘူးလို့လည်း ပြောတယ်လေ။ ဒါကြောင့် ကျွန်တော်တို့အနေနဲ့က နိုင်ငံတော် တည်ငြိမ်အေးချမ်းရေးကို အနှောက်အယှက်ဖြစ်သွားမယ်ဆိုရင် မလုပ်တော့ပါဘူးလို့ ပြောခဲ့လိုက်ပါတယ်။”