ကမ္ဘောဒီးယား သစ်ခုတ်သမား ၂ ဦးအား ထိုင်းစစ်တပ် ပစ်သတ်မှု ကမ္ဘောဒီးယား အစိုးရ ရှုတ်ချ

အောက်တိုဘာ ၇ ၊ ၂၀၁၄
M-Media

– ကမ္ဘောဒီယား သစ်ခုတ်သမားနှစ်ဦးအား ထိုင်းစစ်တပ်မှ ပစ်သတ်ခဲ့မှုအတွက် ကမ္ဘောဒီယားနိုင်ငံခြားရေးဝန်ကြီးဌာနက ရှုတ်ချပြောဆိုလိုက်သည်။

အသက် ၂၄ နှစ်အရွယ် ဆောန်ဆမ်နှင့် ၂၂ နှစ်အရွယ် ယင်မ် မာကရာတို့မှာ ကမ္ဘောဒီယားနိုင်ငံအရှေ့ပိုင်းနယ်စပ်မှ တရားမ၀င်သစ်ခုတ်ရန်အတွက် ထိုင်းနိုင်ငံအတွင်းသို့ စက်တင်ဘာ ၂၈ ရက်နေ့က ၀င်ရောက်သွားခဲ့ပြီး ၎င်းတို့နှစ်ဦးအား ထိုင်းစစ်က ပစ်သတ်ခဲ့ခြင်းဖြစ်သည်။

ထို့ပြင် စက်တင်ဘာ ၂၉ ရက်နေ့တွင် ကမ္ဘောဒီယားစစ်တပ်မှ နယ်စပ်တစ်လျှောက် ပုံမှန်ကင်းလှည့်မှုများ ပြုလုပ်နေစဉ် ထိုင်းစစ်တပ်မှ ထိုကဲ့သို့ ပစ်ခတ်မှုတစ်ခု ပြုလုပ်ခဲ့သေးသည်။

“(ကမ္ဘောဒီးယားစစ်သားတွေ) သူတို့ရဲ့ စစ်စခန်းကို အသီးသီးပြန်လာနေတဲ့အချိန် နယ်စပ်က Chamcar Kroch ဒေသအနားမှာ ထိုင်းစစ်တပ်က ပစ်ခတ်ခဲ့တာကြောင့် အသက် ၃၅ နှစ်အရွယ် ကမ္ဘောဒီယား တပ်ကြပ်တစ်ဦး ဒဏ်ရာရခဲ့ပါတယ်။ ကမ္ဘောဒီးယားနိုင်ငံသား ၂ ဦးကို ထိုင်းစစ်တပ် ကျူးလွန်တဲ့ ဒီလို ကြမ်းကြုတ်မှုမျိုးကို ကမ္ဘောဒီးယားအစိုးရက ပြင်းပြင်းထန်ထန် ကန့်ကွက်ပါတယ်” ဟု ကမ္ဘောဒီးယား နိုင်ငံခြားရေး ၀န်ကြီးဌာနမှ ထိုင်းသံရုံးသို့ ပြီးခဲ့သည့် သီတင်းပတ်က ပေးပို့ခဲ့သော သတိထောက်လွှာတွင် ရေးသားဖော်ပြထားသည်။

ထို့ပြင် ကမ္ဘောဒီးယား ပိုင်နက်အား ထိုင်းစစ်တပ်က သိသိသာသာ ကျူးကျော်မှုကို ရှုတ်ချပြီး၊ မိမိတို့၏ အချုပ်အခြာ အာဏာကိုလေးစားရန် အတွက်လည်း အဆိုပါ သတိထောက်လွှာတွင် ရေးသားဖော်ပြခဲ့သည်။

ref_ ဆင်ဟွာ