အီဘိုလာ အန္တရာယ် ဥရောပနှင့် အမေရိကန်တို့ကိုပါ ခြိမ်းခြောက်လာ

အောက်တိုဘာ ၁၁ ၊ ၂၀၁၄
M-Media

– စပိန်တွင် အီဘိုလာကူးစက်ခံနေရသူ သူနာပြု တစ်ဦး၏ အခြေအနေမှာ အသက်အန္တရာယ် စိုးရိမ်ရသည့် အနေအထားတွင်ရှိနေပြီး၊ မက်ဆီဒိုးနီးယားတွင်လည်း အီဘိုလာ ရောဂါ လက္ခဏာဖြင့် ဗြိတိန်နိုင်ငံသား တစ်ဦး သေဆုံးခဲ့သည်ဟု သိရသည်။

အသက် ၄၄ နှစ်အရွယ် စပိန်သူနာပြု ရိုမဲရိုမှာ အီဘိုလာ ကူးစက်သည့် လူနာ ၂ ဦးကို ပြုစုခဲ့ပြီးနောက်ပိုင်း ရောဂါပိုး ကူးစက်ခံခဲ့ရခြင်းဖြစ်ပြီး မက်ဒရစ်တွင် သီးသန့်ခွဲထားက ကုသမှုများ ပြုလုပ်နေသော်လည်း အခြေအနေ ဆိုးရွားနေသည်ဟု မက်ဒရစ်မြို့ အုပ်ချုပ်ရေးမှူးက ပါလီမန်တွင်ပြောကြားခဲ့သည်။

ခင်ပွန်း၊ လုပ်ဖော်ကိုင်ဖက်များ အပါအ၀င် ရိုမဲရိုနှင့် နီးစပ်သူ ၁၃ ယောက်ကို သီးသန့်ခွဲထားကာ စမ်းသပ် စစ်ဆေးမှုများ ပြုလုပ်နေပြီး အခြား လူ ၅၀ ကိုလည်း စပိန် ကျန်းမာရေး တာဝန်ရှိသူများက စောင့်ကြည့်လျက်ရှိနေသည်။

လန်ဒန်မြို့မှ အောက်တိုဘာ ၂ ရက်နေ့တွင် ရောက်ရှိလာပြီး မက်ဆီဒိုနီးယားနိုင်ငံ စကော့ပ်ဂျီရှိ ဟိုတယ်တစ်ခုတွင် တည်းခိုနေသည့် ဗြိတိန်နိုင်ငံသားတစ်ဦးမှာလည်း အီဘိုလာ ရောဂါလက္ခဏာများဖြစ်သည့် အဖျား၊ ပျို့အန်ခြင်းနှင့် ခန္ဓာကိုယ်တွင်း သွေးယိုစီးမှုများ ဖြစ်ပွားခဲ့ခြင်းကြောင့် အောက်တိုဘာ ၉ ရက်နေ့က ဆေးရုံသို့ ပို့ဆောင်ခဲ့ရပြီး နာရီအနည်းငယ်အကြာတွင် သေဆုံးခဲ့သည်ဟု မက်ဆီဒိုးနီးယား ကျန်းမာရေး တာဝန်ရှိသူများက ယနေ့တွင် ပြောကြားခဲ့သည်။

ထို့ပြင် ၎င်းတည်းခိုသည့် ဟိုတယ်အား ချိတ်ပိတ်လိုက်ပြီး အခြားဗြိတိန်နိုင်ငံသားတစ်ဦးနှင့် ဟိုတယ်ဝန်ထမ်းများအား စမ်းသပ်စစ်ဆေးမှုများ ပြုလုပ်လျက်ရှိနေသည်။

အီဘိုလာကြောင့် နောက်ဆုံးသေဆုံးခဲ့ရသည့် လူနာမှာ အမေရိကန်မှ သောမတ်စ် အဲရစ် ဒန်ကန်ဖြစ်ပြီး ၎င်းသေဆုံးပြီးနောက် အမေရိကန်အစိုးရက အတ္တလန်တာ၊ ချီကာဂို၊ နယူးဂျာစီ၊ နယူးယောက်နှင့် ၀ါရှင်တန်ရှိ အဓိကလေဆိပ်များတွင် စောင့်ကြည့်မှုများ ပိုမို ပြုလုပ်ရန် ဆောင်ရွက်ခဲ့သည်။

အင်္ဂလန်တွင်လည်း အီဘိုလာနှင့်ပတ်သက်၍ သတိပေးမှုများကို ပြုလုပ်ထားပြီး အဓိကလေဆိပ်များတွင် စောင့်ကြည့်မှုများ ပိုမိုဆောင်ရွက်နေသည်။

ref_ RT,AFP