ပွဲပယ်ခံရပြီး ပထမဆုံးပြန် ကစားသည့် နိုင်ငံတကာပွဲ၌ ဒိုင်ကိုခွင့်တောင်းပြီး အိမ်သာ သွားတက်တဲ့ ဆွာရက်ဇ်

အောက်တိုဘာ ၁၁ ၊ ၂၀၁၄
M-Media

– ကမ္ဘာ့ဖလားပြိုင်ပွဲအပြီး ပထမဆုံး ၀င်ရောက်ကစား ခွင့်ရခဲ့သည့် နိုင်ငံတကာပွဲတွင် ဥရုဂွေးတိုက်စစ်မှူး ဆွာရက်ဇ်မှာ အသင်းအတွက် ဂိုးရရှိအောင် ဖန်တီးပေးနိုင်ခဲ့သည်ဟု သိရသည်။

ကမ္ဘာ့ဖလားတွင် ချီလီနီအား ကိုက်ခဲ့မှုကြောင့် ဘောလုံးကစားခွင့် ၄ လနှင့် နိုင်ငံတကာ ပြိုင်ပွဲ ၉ ပွဲ ပိတ်ပင်ခံခဲ့ရသည့် ဆွာရက်ဇ်မှာ ပြစ်ဒဏ်လျော့ပေါ့မှုကြောင့် ယမန်နေ့က ကစားခဲ့သည့် ဆော်ဒီနှင့်ခြေစမ်းပွဲတွင် ပါဝင်ခွင့်ရခဲ့ပြီး ဒုတိယပိုင်းအစတွင် ၎င်း၏ ကန်သွင်းချက်မှတစ်ဆင့် ဆော်ဒီကစားသမားနှင့် ထိကာ ဥရုဂွေးတို့ ဦးဆောင်ဂိုးရခဲ့သည်။

“ကြည်နူးမှုတွေဖြစ်စေတဲ့ လက်ရွေးစင်အသင်းအင်္ကျီကို ၀တ်ရတာကို ကျွန်တော်ပျော်ပါတယ်။ ဒီအင်္ကျီကို ချစ်မြတ်နိုးမှုဟာ ဘယ်တော့မှ လျော့သွားမှာ မဟုတ်ပါဘူး။ ဥရုဂွေးပါပဲ” ဟု ဆွာရက်ဇ်က ပွဲအပြီးတွင် ပြောကြားခဲ့သည်။

၁ ဂိုးစီသရေကျခဲ့သည့် ထိုပွဲတွင် ဆွာရက်ဇ်မှာ ခြေစွမ်းပြနိုင်ခဲ့ပြီး ဂိုးသွင်းခွင့်အချို့ ရခဲ့သော်လည်း ဂိုးသွင်းယူနိုင်ခြင်း မရှိခဲ့ပေ။ ဒုတိယပိုင်း မိနစ် ၆၀ ကျော်တွင် ဆွာရက်ဇ်မှာ ဒိုင်လူကြီးများထံမှ ခွင့်တောင်း၍ အိမ်သာတက်ရန် ကွင်းအတွင်းမှ မိနစ်အနည်းငယ်အကြာ ထွက်သွားခဲ့သည်။

ref_ Daily Mail