မန်စီးတီး အင်ပါယာကို မိမိတည်ဆောက်ခဲ့သည်ဟု မန်စီနီဆို

အောက်တိုဘာ ၁၄ ၊ ၂၀၁၄
M-Media

– အသင်း၏ လက်ရှိကံကောင်းမှုများက မိမိမှ စတင်ခဲ့ခြင်းဖြစ်ပြီး မန်စီးတီး အင်ပါယာအား မိမိက တည်ထောင်ပေးခဲ့ခြင်းဖြစ်သည်ဟု မန်စီးတီးနည်းပြဟောင်း မန်စီနီက ပြောကြားလိုက်သည်။

မန်စီနီလက်ထက် ၂၀၁၁-၁၂ ဘောလုံးရာသီက ရာသီနောက်ဆုံးပွဲတွင် တိုက်စစ်မှူး အဂူရို၏ နောက်ကျဂိုးဖြင့် ပရီးမီးယားလိဂ်ဖလားကို ဆွတ်ခူးနိုင်ခဲ့သည့် မန်စီးတီးအသင်းမှာ ပယ်လီဂရီနီ၏ ပထမဆုံးရာသီဖြစ်သည့် မနှစ်ကလည်း ပရီးမီးယားလိဂ် ဖလားကို ထပ်မံ ဆွတ်ခူးနိုင်ခဲ့သည်။

မန်စီးတီးအသင်းအား လေးနှစ်ကြာ ကိုင်တွယ်ခဲ့သည့် မန်စီနီကမူ အသင်း၏ လက်ရှိ ကံကောင်းမှုများတွင် မိမိ၏အကူအညီပါဝင်သည်ဟု ယုံကြည်နေသည်။

“ဒီအသင်းကို လွန်ခဲ့တဲ့ငါးနှစ်လောက်က စတင်တည်ဆောက်ခဲ့တယ်လို့ ကျွန်တော်ထင်ပါတယ်။ ၂ နှစ်အတွင်းမှာ ပရီးမီးယားလိဂ်၊ FA နဲ့ အင်္ဂလန်မှာရှိတဲ့ ဖလားတွေအားလုံး ရခဲ့ပါတယ်။ အခုလက်ရှိ မန်စီးတီးအသင်းမှာ ကျွန်တော့်လက်ထက်က ကစားသမား ၉ ယောက် ကစားနေပါတယ်။ ဒါနဲ့ပတ်သက်ပြီး ကျွန်တော်အရမ်းပျော်ပါတယ်။ လေးငါးနှစ်လောက်နဲ့ တောင့်တင်းတဲ့ အသင်းတစ်သင်း တည်ဆာက်ဖို့ဆိုတာ မလွယ်ပါဘူး” ဟု မန်စီနီက သတင်းထောက်များအား ပြောကြားခဲ့သည်။

မန်စီနီမှာ မန်စီးတီးမှ ထွက်ခွာပြီးနောက် တူရကီကလပ် ဂါလာတာစာရေးနှင့် တစ်နှစ်သက်တမ်းရှိ စာချုပ်ချုပ်ဆိုခဲ့သော်လည်း နောက်ပိုင်းတွင် ၂ ဦးသဘောတူ ဖျက်သိမ်းခဲ့သည်။

လက်ရှိတွင် ဂျာမနီ၌ နည်းပြပြုလုပ်ရန် စိတ်အားထက်သန်နေသော်လည်း အဓိက အခက်အခဲမှာ ဘာသာစကားပင်ဖြစ်သည်ဟု မန်စီနီက ထည့်သွင်းပြောကြားခဲ့သည်။