၂၀၁၄ ခုနှစ်အတွက် Golden Foot ဆု ဘာစီလိုနာ ကွင်းလယ်လူ အင်နီယေစတာ ရရှိ

အောက်တိုဘာ ၁၆ ၊ ၂၀၁၄
M-Media

– အသက် ၂၈ နှစ်နှင့် အထက် အကောင်းဆုံး ဘောလုံးသမားများကို ချီးမြှင်သည့် Golden Foot ဆုအား ဘာစီလိုနာအသင်း၏ အဓိက ကွင်းလယ်လူ အင်နီယေစတာက ဆွတ်ခူးရရှိခဲ့သည်ဟု သိရသည်။

ဘောလုံးပရိတ်သတ်များ အွန်လိုင်းမှ မဲပေးရွေးချယ်သည့် အဆိုပါဆုကို အင်နီယေစတာမှာ ရူနီ၊ ပီယာလို၊ ဟင်နရီတို့အား ကျော်ဖြတ်ကာ ရရှိခဲ့ခြင်းဖြစ်သည်။ ဆုပေးပွဲအခမ်းအနားကို အောက်တိုဘာ ၁၃ ရက်နေ့က မိုနာကိုတွင် ပြုလုပ်ခဲ့ရာ အင်နီယေစတာမှာ ၎င်း၏ ခြေရာကို ပုံတူပြုလုပ်ခဲ့ရပြီး ယခင် Golden Foot ဆုရှင်များဖြစ်သည့် ရော်နယ်ဒင်ဟို၊ ရွိုင်ယန်ဂစ်၊ ဇလာတန် အီဗရာဟီမိုဗစ်တို့လည်း တက်ရောက်ခဲ့ကြသည်။

ကစားသမားများ၏ အောင်မြင်မှုနှင့် ကိုယ်ရည်ကိုယ်သွေးကို ကြည့်ရှုဆုံးဖြတ်ကာ ရွေးချယ်သည့် အဆိုပါ Golden Foot ဆုအား ၂၀၀၃ ခုနှစ်ကတည်းက စတင်ပေးအပ်ခဲ့ခြင်းဖြစ်ပြီး ကစားသမားတစ်ဦးလျှင် တစ်ကြိမ်သာ ရွေးချယ်ခံရမည်ဖြစ်ကာ အင်နီယေစတာမှာ Golden Foot ဆုရရှိသည့် ပထမဆုံး စပိန်ကစားသမား ဖြစ်လာခဲ့သည်။

အင်နီယေစတာကမူ ဆုရရှိခဲ့သည့်အတွက် အားလုံးကို ကျေးဇူးတင်ကြောင်း ၎င်း၏ Twitter စာမျက်နှာတွင် ရေးသားခဲ့သည်။ ပြီးခဲ့သည့်နှစ်က အဆိုပါ Golden Footဆုကို ချယ်ဆီး တိုက်စစ်မှူးဟောင်း ဒီဒီယာဒရော့ဘာက ရရှိခဲ့သည်။

ref_ Daily Mail