ဆားဘီးယား-အလ်ဘေးနီးယားပွဲ အဖြစ်အပျက် ခွင့် မလွှတ်နိုင်ဟု ပလာတီနီဆို

အောက်တိုဘာ ၁၆ ၊ ၂၀၁၄
M-Media

– ဆားဘီးယားနှင့် အဲလ်ဗေးနီးယားတို့၏ ယူရို ၂၀၁၆ ခြေစစ်ပွဲတွင် ဖြစ်ပွားခဲ့သည့် ကိစ္စအတွက် စုံစမ်းစစ်ဆေးမှုများ ပြုလုပ်နေပြီး ပြင်းထန်သော အပြစ်ပေးမှုများ ပြုလုပ်သွားနိုင်သည်ဟု ဥရောပဘောလုံးအဖွဲ့ချုပ် UEFA ဥက္ကဌ ပလာတီနီက ပြောကြားလိုက်သည်။

ဆားဘီးယား မြို့တော် ဘဲလ်ဂရိတ်တွင် ကစားခဲ့သည့် အဆိုပါပွဲ၏ မိနစ် ၄၀ ခန့်တွင် “ကြီးမြတ်သော အလ်ဘေးနီးယား” စာတမ်းပါ အလံတစ်ခုမှာ အဝေးထိန်း ဒရုန်းလေယာဉ်ဖြင့် ကွင်းအတွင်းသို့ ရောက်လာခဲ့ပြီး ဆားဘီးယား နောက်ခံလူ မီထရိုဗစ်က ထိုအလံအား ခုန်၍ ဆွဲယူခဲ့ရာမှ နှစ်ဘက်ကစားသမားများ၊ ပရိတ်သတ်များနှင့် ကွင်းလုံခြုံရေးများအကြား ရုန်းရင်းဆန်ခတ်မှုများ ဖြစ်ပွားခဲ့သည်။

ထို့ပြင် ဆားဘီးယား ပရိတ်သတ်များမှာ ကွင်းအတွင်းသို့ ၀င်ရောက်လာကာ တိုက်ခိုက်မှုများ ပြုလုပ်ခဲ့သောကြောင့် အလ်ဘေးနီးယား ကစားသမားများမှာ အ၀တ်အလဲခန်းအတွင်းသို့ ထွက်ပြေးခဲ့ရသည်။

ထိုကိစ္စနှင့် ပတ်သက်၍ UEFA က စည်းကမ်းပိုင်းဆိုင်ရာ စုံစမ်းစစ်ဆေးမှုများကို ပြုလုပ်နေပြီး ဆားဘီးယားဘောလုံးအသင်းအား မီးရှူးမီးပန်းများပစ်ဖောက်မှု၊ ပရိတ်သတ်များက နှောက်ယှက်မှုနှင့် ပြိုင်ပွဲအစီအစဉ် ညံ့ဖျင်းမှုတို့ အပါအ၀င် စွဲချက် ၅ ခုတင်ထားပြီး၊ အလ်ဘေးနီးယားအသင်းအား ပွဲအား ဆက်လက်ကစားရန် ငြင်းဆန်မှု၊ ဥပဒေနှင့် မညီသော စာတမ်း ကိုင်ဆောင်မှုတို့ဖြင့် စွဲချက်တင်ထားသည်။

UEFA ဥက္ကဌ ပလာစီနီကမူ ထိုအဖြစ်အပျက်မှာ အလွန်ဝမ်းနည်းစရာကောင်းသည့် အဖြစ်အပျက်ဖြစ်ပြီး၊ ခွင့်မလွှတ်နိုင်သော အဖြစ်အပျက်ဟု ပြောကြားခဲ့သည်။

ထိုကိစ္စနှင့်ပတ်သက်၍ ဆားဘီးယားနှင့် အလ်ဘေးနီးယား ၂ သင်းစလုံးမှာ ဥရောပ ပြိုင်ပွဲများ ၀င်ရောက်ယှဉ်ပြိုင်ခွင့် ပိတ်ပင်ခံရသည်အထိ အပြစ်ပေးခြင်း ခံရနိုင်သည်။