အောင်ဇေယျတု ဂျာနယ် ဘာသာရေး စော်ကားမှု အရေးယူဖို့ သမ္မတထံ စာပို့တိုင်ကြား

အောက်တိုဘာ ၂၃ ၊ ၂၀၁၄
M-Media
ချမ်းငြိမ်းအေး

ဘာသာရေး စော်ကားရေးသားသည့် အောင်ဇေယျတုဂျာနယ်အား တည်ဆဲဥပဒေအရ အရေးယူတားမြစ်ပေးရန် သမ္မတထံ အစ္စလာမ်ဘာသာရေးအဖွဲ့ကြီး ကန့်ကွက်တိုင်ကြား

၂၀၁၄-ခု အောက်တိုဘာလ ၁၇-ရက်နေ့ ရက်စွဲဖြင့် ထုတ်ဝေသည့် အောင်ဇေယျတုဂျာနယ် အမှတ်(၄၄)တွင် အစ္စလာမ်ဘာသာနှင့် တမန်တော် မုဟမ္မဒ်(ဆွ) သခင်အား စော်ကားထားသည့် အတွက် ဘာသာရေးစော်ကားမှု၊ စိတ်နာကျည်းစေမှု၊ အစ္စလာမ်သာသနာအား မဟုတ်မမှန် စွပ်စွဲပုတ်ခတ်ရေးသားမှုများ၊ တရားဥပဒေ စိုးမိုးရေးနှင့် အေးချမ်းသာယာရေးကို ထိခိုက်စေသည့် အရေးအသားများကို အတင့်ရဲစွာ ဖြန့်ဝေနေမှုအား ဆောလျင် ထိရောက်စွာ တည်ဆဲ ဥပဒေများအရ အရေးယူတားမြစ်ပေးရန် အတွက် ကန့်ကွက်တိုင်ကြားစာ တစ်စောင်ကို အစ္စလာမ်ဘာသာရေး အဖွဲ့ကြီးက သမ္မတထံသို့ ယနေ့ အောက်တိုဘာ ၂၂ ရက်နေ့မှာ ပေးပို့ခဲ့ကြောင်း သိရသည်။

အဆိုပါ ကန့်ကွက်တိုင်ကြားစာတွင် နိုင်ငံတော် ဖွဲ့စည်းပုံအခြေခံဥပဒေ (ပုဒ်မ – ၃၆၂)အရ ပြည်ထောင်စု သမ္မတမြန်မာနိုင်ငံတော်သည် ဗုဒ္ဓဘာသာ၊ ခရစ်ယာန်ဘာသာ၊ အစ္စလာမ်ဘာသာ၊ ဟိန္ဒူဘာသာနှင့် နတ်ကိုးကွယ်သောဘာသာတို့အား အသိအမှတ်ပြုထားပြီး အဆိုပါ ဘာသာသာသနာများကို တတ်နိုင်သမျှ ကူညီစောင့်ရှောက်ရမည်ဟူ၍လည်း ဖွဲ့စည်းပုံအခြေခံဥပဒေ (ပုဒ်မ – ၃၆၃)တွင် အတိအလင်း ပြဌာန်းပြီးဖြစ်ကြောင်းဖော်ပြထားသည့်အတွက် လူမျိုးရေး၊ ဘာသာရေးအရ မုန်းတီးခြင်း၊ ရန်မူခြင်း၊ စိတ်ဝမ်းကွဲခြင်း၊ အမျိုးမျိုးပေါ်ပေါက်လာစေရန် ရည်ရွယ်သော အပြုအမူများသည် ဖွဲ့စည်းပုံအခြေခံဥပဒေနှင့် ဆန့်ကျင်ကြောင်း (ပုဒ်မ – ၃၆၄)တွင် ဖော်ပြထားပြီး ဖြစ်ကြောင်းတို့ ပါရှိသည်။

၎င်းကန့်ကွက်တိုင်ကြားစာအရ အောင်ဇေယျတု ဂျာနယ်တွင် ဘာသာရေး စော်ကားရေးသားမှုများကြောင့် မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးနှင့် နိုင်ငံသား အစ္စလာမ်ဘာသာဝင် တစ်ရပ်လုံး စိတ်နာကျည်း ၀မ်းနည်းမှုများခံစားခဲ့ရကြောင်း၊ ၂၀၁၄-ခု ဇန်န၀ါရီလ ၃၁-ရက်နေ့ ၎င်းဂျာနယ် အမှတ်(၇)တွင်လည်း အစ္စလာမ်သာသနာအပေါ် စော်ကားရေးသားခဲ့သည့်အတွက် အစ္စလာမ်ဘာသာရေးအဖွဲ့ကြီးအနေဖြင့် ဖေဖော်ဝါရီလ ၅-ရက်နေ့တွင် နိုင်ငံတော်အစိုးရထံ ကန့်ကွက်တိုင်ကြားမှု ပြုလုပ်ခဲ့ပြီးဖြစ်ကြောင်းလည်း သိရသည်။

ထိုကဲ့သို့ ဘာသာတစ်ခုအပေါ် အခြားဘာသာတစ်ခုမှ နားလည်မှုလွဲမှားအောင် ရေးသား ဖြန့်ချိမှုကြောင့် ပြည်သူလူထုအတွင်း စည်းလုံးညီညွတ်မှု ပြိုကွဲစေကြောင်းနှင့် တရားဥပဒေစိုးမိုးမှုကို ပျက်ပြားစေသည့်အတွက် နိုင်ငံတော်၏ ဂုဏ်သိက္ခာကျဆင်းရပြီး နိုင်ငံတော်နှင့် နိုင်ငံသားများ၏ အကျိုးစီးပွားထိခိုက်စေသည့်အတွက် ၎င်းကဲ့သို့ ရေးသားဖြန့်ချိမှုများအား နိုင်ငံတော် တည်ဆဲဥပဒေ ပြဌာန်းချက်များနှင့်အညီ အမြန်ဆုံး ထိရောက်စွာ အရေးယူ ဆောင်ရွက်ပေးရန် တောင်းဆို တင်ပြလိုက်ကြောင်း ဖော်ပြထားပါသည်။

တိုင်ကြားစာ အပြည့်အစုံကိုအောက်တွင် ဖတ်ရှုနိုင်ပါသည်။