လိုက်ဘေးရီးယားတွင် အကြီးဆုံး အီဘိုလာ ကုသရေး စင်တာတစ်ခု ဖွင့်လှစ်

နိုဝင်ဘာ ၂ ၊ ၂၀၁၄
M-Media

– အီဘိုလာကူးစက်ပြန်နှံ့မှုကို ထိရောက်စွာ တားမြစ်နိုင်ရေး ရည်ရွယ်လျက် နိုင်ငံအတွင်း အကြီးဆုံး အီဘိုလာကုသရေး စင်တာ တစ်ခုကို လိုက်ဘေးရီးယားနိုင်ငံ၏ မြို့တော် မွန်ရိုဗီယားတွင် ဖွင့်လှစ်လိုက်ပြီဟု သိရသည်။

ယမန်နေ့က လိုက်ဘေးရီးယား သမ္မတ အဲလင် ဂျွန်ဆင် ဆာရ်လိဖ်ကိုယ်တိုင် ဖွင့်လှစ်ပေးခဲ့ခြင်း ဖြစ်ပြီး ကုလနှင့် အမေရိကန်တို့မှ တာဝန်ရှိသူများ တက်ရောက် ခဲ့ကြသည်။ အဆိုပါ စင်တာတွင် အနည်းဆုံး လူနာ ၂၀၀ မှ အများဆုံး ၃၀၀ အထိ ကုသနိုင်မည်ဖြစ်သည်။

“နောက်ဆုံးမှာတော့ ဒီရောဂါဆိုးကြီးကို ကျွန်တော်တို့ လိုက်မှီနိုင်တော့မယ် အနေအထားကို မြင်ရတာဟာ အားတက်စရာပါ။ ဒီရောဂါကြီးဟာ တောင်ပေါ်က ကျောက်တုံး လိမ့်ကျလာသို့ ကျရောက်လာခဲ့တာဖြစ်ပြီး လွန်ခဲ့တဲ့ ၂ လ လောက်က ဒါကို ကျွန်တော်တို့ လိုက်မမီ နိုင်တော့ဘူးလို့ ထင်ခဲ့ကြပါတယ်။ ဒါပေမယ့် တိုးတက်မှုတွေကိုတော့ ကျွန်တော်တို့ စတင် လုပ်ဆောင်နေပါပြီ” ဟု အမေရိကန်သံအမတ် ဒီဘိုရက်ချက် မာလက်ခ်က ပြောကြားခဲ့သည်။

အဆိုပါ စင်တာတွင် ယခုလက်ရှိ၌ လူနာ ၈၀ ခန့်အား ကုမှုပေးနေသည်ဟု နယ်စည်မခြား ဆရာဝန်များအဖွဲ့က အင်္ဂါနေ့တွင် ပြောကြားခဲ့သည်။ အီဘိုလာ ပြန်နှံ့နေသည့် အနောက်အာဖရိက နိုင်ငံများတွင် လိုက်ဘေးရီးယားမှာ အဆိုးဝါးဆုံး ပြန့်နှံ့သည့် နိုင်ငံတစ်ခုဖြစ်ခဲ့ပြီး ပြီးခဲ့သည့် သီတင်းပတ်များမှ စတင်ကာ အီဘိုလာ ကူးစက်ပြန့်နှံ့မှုမှာ လျော့ကျခဲ့သည်။

ကမ္ဘာ့ကျန်းမာရေးအဖွဲ့ WHO ကမူ ထိုကဲ့သို့ လျော့ကျမှုများ ရှိနေသော်လည်း အခြေအနေအား ပြောင်းလဲနိုင်ရန်အတွက် အားထုတ်မှုများ ပိုမိုလုပ်ဆောင်ရမည်ဟု သတိပေးခဲ့သည်။