မြန်မာ သံတော်ဆင့် ဂျာနယ်ကို အစိုးရ တရားစွဲမည်

နိုဝင်ဘာ ၄ ၊ ၂၀၁၄
M-Media

– နိုင်ငံတော်သမ္မတ ဦးသိန်စိန်းအား ဂုဏ်အသေညှိုးနွမ်းအောင် ရေးသားခဲ့သည့် မြန်မာ သံတော်ဆင့် သတင်းစာအား တရားစွဲဆိုသွားမည်ဟု နိုဝင်ဘာ ၄ ရက်နေ့ထုတ်ဝေသော နိုင်ငံပိုင် သတင်းစာများတွင် ဖော်ပြထားသည်။

အဆိုပါ သံတော်ဆင့် သတင်းစာမှာ အစိုးရနှင့် ၀န်ကြီးမျအား ဝေဖန်ရေးသားရာတွင် လူသိများသည့် အပတ်စဉ် သတင်းစာ တစ်စောင်ဖြစ်ပြီး အင်တာဗျူးတစ်ခုတွင် နိုင်ငံတော်သမ္မတ၏ အမည်အား ရေးသားဖော်ပြရာတွင် ဂုဏ်သိက္ခာထိခိုက်စေသည့် စကားလုံးများ သုံးနှုန်းခဲ့ခြင်းကြောင့် တရားစွဲဆိုခြင်းဖြစ်သည်ဟု ပြန်ကြားရေး ၀န်ကြီးဌာနက ထုတ်ပြသော ကြေညာချက်တွင် ဖော်ပြထားသည်။

၂၀၁၄ ခုနှစ် သြဂုတ်လ ၉ ရက်နေ့က ထုတ်ဝေသော မြန်မာ သံတော်ဆင့် ဂျာနယ်၏ ဖော်ပြမှုတွင် “နိုင်ငံတော်သမ္မတသည် အထွတ်အထိပ်၊ အဲဒီပုဂ္ဂိုလ် တစ်ယောက်ရဲ့ စကားက ကပြောင်းကပြန်၊ ဗလောင်းဗလဲ၊ ဟိုပြောဒီပြော၊ ဘရွတ်ရွှတ်တ၊ ပေါက်ပန်းလေးဆယ်၊ ကလေကချေ၊ ကလေကဝ၊ ကျနော် စကားလုံး ထပ်ရှာလို့ရရင် အကုန် ထည့်သုံးမှာ၊ အရည်မရ၊ အဖတ်မရ၊ ပေါက်လွှတ် ပဲစား ပြောသလို ဖြစ်နေတာ” ဟု လည်းကောင်း ၊ ဆောင်းပါး ကဏ္ဍ ဖော်ပြမှုတွင်လည်း “ဘာကြောင့်မို့လို့၊ ရူးကြောင်မူးကြောင် အတွေးတွေကို ဘယ်သူတွေ ထည့်ပေးလို့ ဘယ်လိုမျိုး စနစ်မကျတဲ့၊ ဘာမှမဟုတ်တဲ့ အပေါစား ပေါ်လစီတွေ ချမှတ်ပြီးတော့ အခုလို လုပ်နေလဲ ဆိုတာ စဉ်းစားလို့ကို မရဘူး” စသည်ဖြင့် ဖော်ပြခဲ့ကြောင်း သိရသည်။

မြန်မာသံတော်ဆင့် ဂျာနယ်အနေဖြင့် နိုင်ငံတော်သမ္မတ၏ ဂုဏ်သရေကို ထိခိုက်စေသည့် ပြောဆိုချက်များကို ရေးသား ဖော်ပြခဲ့သည့်အတွက် ပြန်လည် တောင်းပန်စာကို မြန်မာသံတော်ဆင့် ဂျာနယ်နှင့် အစိုးရ သတင်းစာများတွင် ၂ ကြိမ် ဖော်ပြပေးရန် မြန်မာနိုင်ငံ စာနယ်ဇင်းကောင်စီ (ယာယီ) မှ တဆင့် ညှိနှိုင်းခဲ့ကြောင်း၊  မြန်မာနိုင်ငံ စာနယ်ဇင်းကောင်စီ (ယာယီ) က ဂျာနယ်နှင့် ဆွေးနွေးပြီး သံတော်ဆင့် ဂျာနယ်က တောင်းပန်စာကို တကြိမ်သာ ထည့်သွင်းပေးမည် ဖြစ်ကြောင်းနှင့် ထည့်ပေးမည့် တောင်းပန်စာ မူကြမ်းကို ပူးတွဲ၍ ပြန်လည် ပေးပို့ခဲ့ကြောင်း သိရသည်။

ဒီမိုကရေစီပြုပြင်ပြောင်းလဲမှုများ ပြုလုပ်ခဲ့ပြီးနောက် မြန်မာနိုင်ငံတွင် စာနယ်ဇင်းလွတ်လပ်ခွင့်ကို အစိုးရက ပေးအပ်ခဲ့သော်လည်း နောက်ပိုင်းတွင် မီဒီယာသမားများအား ဖိနှိပ်မှုများ ရှိလာပြီး ယခုဆုံးဖြတ်ချက်မှာ မြန်မာအစိုးရမှာ ဝေဖန်မှုများ ခံရဖွယ်ရှိနေသည်။

ကိုကား – AFP၊ဧရာဝတီ