၃ ဂိုးပြတ်နိုင်နေရာမှ သရေကျခဲ့သည့် အန်ဒါလက်ခ်ျနှင့် ပွဲအတွက် စိတ်ပျက်မိသည်ဟု အာဆင်ဝင်းဂါးဆို

နိုဝင်ဘာ ၅ ၊ ၂၀၁၄
M-Media

– ဗုဒ္ဓဟူးနေ့က ကစားခဲ့သည့် အန်ဒါလက်ခ်ျအသင်းနှင့်ပွဲတွင် အသင်း၏ ရလဒ်အတွက် စိတ်ပျက်မိပြီး ဖြုန်းတီးမှု အန္တရာယ်နှင့် ရင်ဆိုင်ခဲ့ရသည်ဟု အာဆင်နယ် နည်းပြ အာဆင်ဝင်းဂါးက ပြောကြားခဲ့သည်။

ထိုပွဲ အနိုင်ရရှိပါက နောက်တစ်ဆင့်သို့ စောစီးစွာ တက်ရောက်နိုင်မည့် အာဆင်နယ်မှာ မိနစ် ၆၀ အထိ ၃ ဂိုးပြတ်ဖြင့် ဦးဆောင်ထားခဲ့သော်လည်း နောက်ပိုင်းတွင် ၃ ဂိုးပြန်ပေးရကာ သရေတစ်မှတ်သာ ရခဲ့သည်။

“ရလဒ်က သိပ်ကို စိတ်ပျက်စရာကောင်းပါတယ်။ ပထမချေပဂိုးက လူကျွံအနေအထားကနေ ပေးလိုက်ရတဲ့အတွက် ကျွန်တော်တို့ ကံမကောင်းခဲ့ပါဘူး။ နောက်ပြီး (၃ ဂိုးပြတ်နေတဲ့ အချိန်မှာ) ကျွန်တော်တို့အလုပ်ပြီးသွားပြီလို့ထင်ပြီး အာရုံစူးစိုက်မှုလည်း လျော့ခဲ့ပါတယ်။ ပွဲကိုအဆုံးသတ်ဖို့အတွက် ကျွန်တော်တို့ ပြသနာရှိခဲ့ပြီး ခံစစ်ကလည်း ပွဲအစကနေ အဆုံးအထိ ဆိုးရွားခဲ့ပါတယ်” ဟု အာဆင်ဝင်းဂါက ပွဲအပြီးတွင် ပြောကြားခဲ့သည်။

အာဆင်နယ် ပါဝင်သည့် အုပ်စု D တွင် ဂျာမန်ကလပ် ဒေါ့မွန်အသင်းမှာ ၁၆ သင်းအဆင့်သို့ တက်ရောက်သွားပြီး အာဆင်နယ်မှာ ပွဲစဉ် ၅ တွင် အနိုင်ကစားနိုင်ပါက နောက်တစ်ဆင့်သို့ တက်ရောက်မည်ဖြစ်သည်။

အန်ဒါလက်ချက်နှင့်ပွဲအတွက် စိတ်ဆိုခြင်း သို့မဟုတ် စိတ်ပျက်ခြင်း ရှိလားဟု မေးမြန်းရာ အာဆင်ဝင်းဂါးက ၂ ခုစလုံးဖြစ်ကြောင်း၊ သို့ရာတွင် အန်ဒါလက်ခ်ျမှာလည်း အသင်းကောင်းတစ်သင်းဖြစ်ကြောင်း ထည့်သွင်းပြောကြားခဲ့သည်။