မနှစ်က ချယ်ဆီးပွဲ၌ အမှားလုပ်ခဲ့သည့် ဂျရတ်နေရာ မိမိဆိုလျှင် ကစားသမားဘဝမှ အနားယူမိနိုင်ကြောင်း ဆွာရက်ဇ်ပြော

နိုဝင်ဘာ ၈ ၊ ၂၀၁၄
M-Media

– ပြီးခဲ့သည့်နှစ် ပရီးမီးယားလိဂ် ချန်ပီယံဖြစ်ရေး အရေးပါသည့် အချိန်ကာလတွင် ချယ်ဆီးအသင်းနှင့်ပွဲ၌ အမှားကျူးလွန်ခဲ့သည့် ဂျာရတ်နေရာ၌ မိမိသာဖြစ်ပါက ကစားသမားဘ၀ အဆုံးသတ်သွားနိုင်သည်ဟု ဘာစီလိုနာ တိုက်စစ်မှူး ဆွာရက်က ပြောကြားလိုက်သည်။

၁၁ ပွဲဆက်တိုက်နိုင်ပွဲရပြီး ကျန်ရှိသည့် နောက်ဆုံး ၃ ပွဲတွင် ၇ မှတ်ရပါက ၁၉၉၀ နောက်ပိုင်း ပထဆုံးအကြိမ် ပရီးမီးယားလိဂ် ဖလားအား ဆွတ်ခူးနိုင်မည့် လီဗာပူးလ်မှာ ဧပြီလအတွင်း ချယ်ဆီးနှင့် တွေ့ဆုံခဲ့ရာ ၂ ဂိုး ဂိုးမရှိဖြင့် ရှုံးနိမ့်ခဲ့ပြီး ချန်ပီယံဖြစ်ရေးမှာ မှေးမှိန်ခဲ့ရသည်။

ထိုပွဲ၌ ချယ်ဆီးရရှိခဲ့သည့် ပထမဂိုးမှာ ဂျရတ်၏ ခြေချော်ရာမှ ထွက်လာသော ဘောလုံးကို ချယ်ဆီးတိုက်စစ်မှူး ဒမ်ဘာ ဘားက ဆွဲယူကာ ကန်သွင်းခဲ့ခြင်းဖြစ်ပြီး ဆွာရက်ဇ်ကမူ ဂျာရတ်နေရာတွင် မိမိသာဖြစ်ပါက ကစားသမား ဘ၀မှ အနားယူရန်ပင် ဖြစ်သွားနိုင်မည်ဟု ၎င်း၏ ကိုယ်တိုင်ရေးအထုပ္ပတ္တိတွင် ရေးသားဖော်ပြခဲ့သည်။

“တကယ်လို့များ ကျွန်တော်ဟာ ဂျရတ်နေရာမှာသာ ဖြစ်ခဲ့မယ်ဆိုရင် ဘောလုံးဆက်ကစားနိုင်မလားဆိုတာ မသိပါဘူး။ ခံစားမှုပိုင်းဆိုင်ရာမှာတော့ ဒါဟာ အရမ်း အရမ်းကို ခက်ခဲပါတယ်” ဟု ဆွာရက်ဇ်က ပြောဆိုခဲ့သည်။

ထိုပွဲပြီးနောက် ကစားခဲ့သည့် ခရစ္စတယ်ပဲလေ့စ်နှင့် ပွဲတွင်လည်း လီဗာပူးလ်မှာ ၃ ဂိုးပြတ်ဖြင့် ဦးဆောင်နေရာမှ ၃ ဂိုးပြန်ပေးလိုက်ရပြီး သရေကျခဲ့သောကြောင့် ချန်ပီယံဖြစ်မည့် အခွင့်အရေးကို လက်လွှတ်ခဲ့ရသည်။

ဆွာရက်ဇ်ကမူ မိမိနှင့် ဂျရတ်တို့မှာ ပြီးခဲ့သည့် သီတင်းပတ်များက ရှေးဟောင်းနှောင်းဖြစ်များ ပြောခဲ့ပြီး ထိုအကြောင်းလည်းပါဝင်ကြောင်း ထိုကဲ့သို့ ဆိုးရွားသည့် အမှားတစ်ခုကို ပြုလုပ်မိသည့် ဂျရတ်မှာ ကံမကောင်းခဲ့ကြောင်း ဆွာရက်ဇ်က ထပ်လောင်းပြောကြားခဲ့သည်။