ဟာလာလ် အစားအစာတွင် ၀က်၏ ပရိုတိန်းပါ၊ မပါ စမ်းသပ်သည့် ကိရိယာ ထုတ်လုပ်

နိုဝင်ဘာ ၈ ၊ ၂၀၁၄
M-Media

– ဟာလာလ်အစားအသောက်များတွင် ၀က်၏ ပရိုတိန်း ပါ၊မပါ ကို မိနစ်ပိုင်းအတွင်း စမ်းသပ်စစ်ဆေးနိုင်မည့် ကိရိယာတစ်ခုကို ပြင်သစ် ကုမ္ပဏီ Capital Biotech က ထုတ်လုပ်လိုက်သည်ဟု သိရသည်။

ယူရို ၆.၉၀ တန်ဖိုးရှိသည့် အဆိုပါကိရိယာမှာ ဟာလာလ် အစားအသောက်များတွင် ၀က်သားပါမပါကို ၁၀ မိနစ်အတွင်း စမ်းသပ်နိုင်မည်ဖြစ်ပြီး ထုတ်လုပ်ပြီး ရက်အနည်းငယ်အကြာမှာပင် တူရကီ၊ ချီလီနှင့် အင်ဒိုနီးရှားတို့မှ အမှာစာ ၁ သိန်းကျော်မှာယူခဲ့ကြသည်ဟု Capital Biotech အား ပူးတွဲတည်ထောင်သူ ဂျီန်း ဖရန်ကို့စ် ဂျူလီယန်က ပြောကြားခဲ့သည်။

အသုံးပြုသူမှာ စမ်းသပ်မည့် အစားသောက်အချို့ကို ရေနွေးထဲသို့ ထည့်ထားရမည့်ဖြစ်ပြီး ၁၀ မိနစ်ကြာပြီးနောက် အဆိုပါ ကိရိယာကိုထည့်ကာ ၀က်၏ ပရိုတိန်း ပါ၊ မပါကို စမ်းသပ်နိုင်မည်ဖြစ်သည်။

သို့သော်အဆိုပါ ကိရိယာမှာ ပြည်စုံသော ဟာလာလ် စမ်းသပ်မှု ကိရိယာမဟုတ်ကြောင်း Capital Biotech ကုမ္ပဏီမှ ၀န်ခံခဲ့ပြီး သတ္တ၀ါများအား အစ္စလာမ့်နည်းကျ လှီးဖြတ်ထားခြင်းရှိ၊ မရှိကို မစမ်းသပ်နိုင်ဟု ဆိုသည်။ သို့သော်လည်း ခရီးဝေးသွားသည့်အခါနှင့် ဈေးကွက်ထဲသို့ ဟာလာလ် အစား အသောက်အသစ် ရောက်ရှိလာသည့် အခါတို့တွင် အသုံးပြုနိုင်မည်ဖြစ်သည်ဟု ထပ်လောင်းပြောကြားခဲ့သည်။

ဥရောပတွင် အစ္စလာမ်ဘာသာဝင်လူဦးရေ အများဆုံးရှိသည့် ပြင်သစ်နိုင်ငံတွင် ဟာလာလ် အစားသောက်နှင့် ပတ်သက်၍ ပြီးခဲ့ည့်နှစ်များ အတွင်း ပြဿနာများစွာ ဖြစ်ပွားခဲ့ပြီး ၂၀၁၁ ခုနှစ်က ဟာလာလ် အသားချောင်းများတွင် ၀က်၏ ပရိုတိန်းများ ပါဝင်နေသည်ကို တွေ့ရှိခဲ့ရသည်။

source: AFP/ir