မက်ဆီအား ရိုင်းစိုင်းစွာ သုံးနှုန်းခေါ်ဝေါ်ခဲ့သည့် သတင်းအား ရော်နယ်ဒို ငြင်း

နိုဝင်ဘာ ၁၂ ၊ ၂၀၁၄
M-Media

– ဘာစီလိုနာမှ ပြိုင်ဘက် မက်ဆီအား ရီးယဲလ်အ၀တ်လဲခန်းအတွင်း ရိုင်းစိုင်းသော အမည်နာမများဖြင့် ခေါ်ဝေါ်ခဲ့သည်ဟူသော စွပ်စွဲချက်များကို ရီးယဲလ်တိုက်စစ်မှူး ရော်နယ်ဒိုက ငြင်းဆိုလိုက်သည်။

စပိန်ဘောလုံးကျွမ်းကျင်သူ ဂူလီယမ် ဘာလာဂူ ရေးသားသော စာအုပ်အသစ်တွင် ရော်နယ်ဒိုနှင့် မက်ဆီတို့၏ ဆက်ဆံရေးမှာ ကောင်းမွန်မှုမရှိဘဲ၊ တစ်ခါတစ်ရံတွင် ရော်နယ်ဒိုမှာ မက်ဆီအား နှိမ့်ချသည့် အမည်နာမများဖြင့် ခေါ်ဝေါ်သည်ဟု ရေးသားဖော်ပြခဲ့သည်။

အဆိုပါသတင်းမှာ အွန်လိုင်းစာမျက်နှာများတွင် ပြန့်နှံ့သွားပြီးနောက် ရော်နယ်ဒိုက မိမိမှာ ဘ၀တူကစားသမားတစ်ဦးအား ထိုကဲ့သို့ မလေးမစား မဆက်ဆံဟု ပြန်လည်ဖြေရှင်းခဲ့သည်။

“မက်ဆီနဲ့ပတ်သက်ပြီး ကျွန်တော်ဟာ စော်ကားတဲ့စကားမျိုးတွေ ပြောဆိုတယ်လို့ သတင်းတွေ ပြန့်နေပါတယ်။ ဒါဟာ လုံးဝမှားယွင်းပါတယ်။ ဒီအတွက် တာဝန်ရှိတဲ့သူကို ကျွန်တော့်ရှေ့နေက တရားစွဲသွားမှာပါ။ ကျွန်တော်နဲ့ ဘ၀တူကစားသမားတွေ အားလုံးအပေါ်မှာ လေးစားမှု ထားရှိပါတယ်။ အဲဒီအထဲမှာ မက်ဆီလည်း ပါဝင်ပါတယ်” ဟု ရော်နယ်ဒိုက ၎င်း၏ Facebook စာမျက်နှာတွင် ရေးသားဖော်ပြခဲ့သည်။

ဘာလာဂူ၏ အဆိုပါ စာအုပ်တွင် ရော်နယ်ဒိုမှာ မက်ဆီအား ခွေးနှင့်နှိုင်း၍ ပြောဆိုသည်ဟုလည်း ရေးသားဖော်ပြထားသည်။

မက်ဆီနှင့် ရော်နယ်ဒို နှစ်ဦးစလုံးမှာ ၎င်းတို့မျိုးဆက်၏ အတောက်ပဆုံး ကစားသမားများဖြစ်ပြီး လူမြင်ကွင်းတွင် ၎င်းတို့နှစ်ဦး၏ ဆက်ဆံရေးမှာ တလေးတစားရှိသော်လည်း ရီးယဲလ်နှင့် ဘာကာကြားရှိ ပြိုင်ဆိုင်မှုများက ၎င်းတို့နှစ်ဦးအား မိတ်ဆွေအဖြစ်မှ ဝေးကွာစေသည်ဟု မီဒီယာများက ဖော်ပြကြသည်။