အောင်ဇေယျတု ဂျာနယ်ကိစ္စ မန္တလေးမှ ဘာသာရေးပေါင်းစုံ အဖွဲ့မှ စာနယ်ဇင်းကောင်စီသို့ တိုင်ကြားစာပေးပို့

နိုဝင်ဘာ ၁၁၊ ၂၀၁၄
M-Media
ချမ်းငြိမ်းအေး

အောက်တိုဘာ ၃၁ က ပြုလုပ်ခဲ့သည့် သတင်းစာရှင်းလင်းပွဲ

ရန်ကုန်။    ။ မန္တလေးမြို့ရှိ ဘာသာပေါင်းစုံမှ ဘာသာရေးခေါင်းဆောင်များမှ အောက်တိုဘာလ ၁၇ ရက်နေ့ထုတ် အောင်ဇေယျတုဂျာနယ် အတွဲအမှတ် (၄၄) တွင် အစ္စလာမ်သာသနာနှင့် တမန်တော် မိုဟမ္မဒ် အပေါ်အား ပုတ်ခက်ရေးသားထားခြင်းနှင့် ပတ်သက်ပြီး ယနေ့ နိုဝင်ဘာလ ၁၁ ရက်နေ့တွင် မြန်မာနိုင်ငံ စာနယ်ဇင်းကောင်စီ (ယာယီ) ထံသို့ တိုင်းကြားစာ တစ်စောင်ပေး ပို့ထားကြောင်းသိရပါတယ်။

ယခုကဲ့သို့ ဘာသာတစ်ခုနှင့် တစ်ခုအကြား အမုန်းတရားများဟောပြော ရေးသား ထုတ်ဝေခြင်းသည် ပဋိပက္ခများ၊ အကြမ်းဖက်မှုများ ဖြစ်ပွားစေပြီး နိုင်ငံတော်ဖွံ့ဖြိုးရေး တိုးတက်အေးချမ်းသာယာရေးကို နှောင့်နှေးစေပြီး မြန်မာနိုင်ငံ၏ ပုံရိပ်ကိုလည်းကျဆင်းစေသောကြောင့် ယင်းကဲ့သို့ ဘာသာရေးများကို ပုတ်ခတ်နေမှုများအား အချိန်မီတားဆီးပေးနိုင်ရန် တိုင်ကြားစာ တစ်စောင်ပေးပို့ထားပါသည်။ ထိုတိုင်ကြားစာအား ပြန်ကြားရေးဝန်ကြီးဌာန၊ သမ္မတရုံးထိသို့လည်း ပေးပို့သွားမည်ဖြစ်ကြောင်း သိရသည်။

ယင်းမြန်မာနိုင်ငံစာနယ်ဇင်းကောင်စီ (ယာယီ) သို့ ပေးပို့သည့်တိုင်ကြားစာကို မန္တလေးမြို့မှ ဘာသာရေးခေါင်းဆောင်များဖြစ်ကြသည့် ဆရာတော်ဦးကာဝိယ (ဂဋ္ဌန်နီဆရာတော်)၊ ဆရာတော်ဦးဝိသုတ၊ သိက္ခာရဆရာတော် ဦးကျော်ရွှေ၊ ခလီဖွှဟ်ဦးသိန်းဝင်းအောင်၊ ဦးကံကောင်း(ဟိန္ဒူဘာသာရေးအဖွဲ့) စသည့် ဘာသာရေးခေါင်းဆောင် (၆၀) ကျော်တို့မှ လက်မှတ်ရေးထိုးပြီး တိုင်ကြားထားတာဖြစ်ကြောင်း သိရပါတယ်။

“ကျွန်တော်တို့ မန္တလေးမှာ ဘာသာပေါင်းစုံကလူတွေပေါင်းပြီး သတင်းစာရှင်းလင်းပွဲတစ်ခုလည်း လုပ်ခဲ့ပြီးပြီ။ အခုလည်း ဘာသာရေးခေါင်းဆောင် (၆၀) ကျော် လတ်မှတ်ရေးထိုးထားတဲ့ တိုင်ကြားစာကို မြန်မာနိုင်ငံစာနယ်ဇင်းကောင်စီ ကိုတိုင်ထားပါတယ်။ ဒီဇင်ဘာလကုန်ထိ အရေးယူမယူစောင့်ကြည့်ပြီး အရေးယူမှု မရှိဘူးဆိုရင်တော့ အဖွဲ့နဲ့တိုင်ပင်ပြီး ဆက်ကြိုးစားဖို့ ရှိပါတယ်” ဟု မန္တလေးမြို့မှ ခလီဖွှဟ်ဦးသိန်းဝင်းအောင် (ဂိုဏ်းချုပ်ဆရာတော် ဃရာနာအစ္စလာမ်သာသနာပရမတ္တမိသားစုအဖွဲ့) က တိုင်ကြား စာပေးပို့ရခြင်းနှင့် ပတ်သက်ပြီး ရှင်းလင်းပြပါတယ်။

ယင်းဂျာနယ်အား အရေးယူပေးရန်အတွက် အထက်မြန်မာပြည် အစ္စလာမ်ဘာသာရေး အဖွဲကြီး မှလည်း မန္တလေးတိုင်းဝန်ကြီးချုပ်ထံ ပေးပို့တိုင်ကြားထားပြီဖြစ်ကြောင်း သိရပါတယ်။

အောက်တိုဘာလ ၃၀ ရက်နေ့ကလည်း မန္တလေးမြို့ ကံတက်ကုန်း (မစိုးရိမ်) ကျောင်းတိုက်တွင် ဘာသာပေါင်းစုံမှ သတင်းစာရှင်းလင်းပွဲတစ်ရပ် ကျင်းပပြုလုပ်ခဲ့ပြီး ယင်းသတင်းစာ ရှင်းလင်းပွဲမှ မြန်မာနိုင်ငံသည် ဖွံ့ဖြိုးတိုးတက်ရေး အတွက် နှောင့်နှေးစေသော အဖွဲ့အစည်းများကို ရှုတ်ချပြီး လူမျိုးဘာသာရေး ပဋိပက္ခများမဖြစ်စေနိုင်ရန် ဘာသာရေးခေါင်းဆောင်များနှင့် တတ်နိုင်သမျှ  ပူးပေါင်းဆောင်ရွက်သွားမည်ဖြစ်ပြီး ပုတ်ခတ်ရေးသားနေသည့် အောင်ဇေယျတု ဂျာနယ်အားလည်း ပြင်းထန်စွာ ရှုတ်ချကြောင်း စသည့်အချက်(၆) ချက်ပါသည့် ကြေငြာချက် တစ်စောင်ကိုလည်း ထုတ်ပြန်ခဲ့ကြောင်းသိရပါတယ်။

အောင်ဇေယျတု ဂျာနယ်၏ အစ္စလာမ်ဘာသာကို စော်ကားရေးသားမှုကို မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးမှာ နိုင်ငံတော်သမ္မတအပါအဝင် သက်ဆိုင်ရာသို့ စာပို့တိုင်ကြားခဲ့ပါတယ်။

အဆိုပါတိုင်ကြားခဲ့မှုနှင့် ပတ်သက်ပြီး ပြန်ကြားရေးဝန်ကြီးဌာနမှ အောင်ဇေယျတု ဂျာနယ်မှာ အခြေခံဥပဒေအပါအဝင် တည်ဆဲဥပဒေများကို ချိုးဖောက်ကြောင်း မြန်မာနိုင်ငံ စာနယ်ဇင်းကောင်စီ (ယာယီ) သို့ ကြားဝင် ညှိနှိုင်းပေးရန် ပေးပို့တဲ့စာမှာ ဖော်ပြထားတာကို တွေ့ရ့ပါတယ်။

မြန်မာနိုင်ငံစာနယ်ဇင်းကောင်စီ (ယာယီ)မှာ အောင်ဇေယျတုဂျာနယ်တာဝန်ရှိသူများကို ခေါ်ယူသတိပေးသည်မှ လွဲ၍ ထင်သာမြင်သာ ရှိသော အရေးယူဆောင်ရွက်မှုများ မရှိသေးတာကို တွေ့ရှိပါတယ်။

ဆက်စပ်သတင်းများဖတ်လိုလျှင်

http://www.m-mediagroup.com/news/tag/aung-jeyatu-journal

**ဘာသာပေါင်းစုံမှ သတင်းစာရှင်းလင်းပွဲ ကြေညာချက် Image Credit(MMM)