မက်ဆီ ရီးယဲလ်ရောက်တော့မှာလား

နိုဝင်ဘာ ၂၅ ၊ ၂၀၁၄
M-Media

– ဘာစီလိုနာတိုက်စစ်မှူး မက်ဆီ အသင်းမှထွက်ခွာရန် ဆုံးဖြတ်ပါက မိမိအနေဖြင့် ခေါ်ယူသွားမည်ဟု ရီးယဲလ်နည်းပြ အန်ဆယ်လော့တီက ပြောကြားလိုက်သည်။

လက်ရှိရာသီ ပြီးဆုံးသွားပါက မိမိတွင်ရှိနေသည့် ရွေးချယ်မှုများအားလုံးကို စဉ်းစားသွားမည်ဟု မက်ဆီက ဖွင့်ပြောခဲ့ပြီးနောက်ပိုင်း မက်ဆီမှာ ဘာစီလိုနာအသင်းမှ ထွက်ခွာရန် စီစဉ်နေသည်ဟု မီဒီယာများတွင် ကျယ်ကျယ်ပြန့်ပြန့် ဖော်ပြခဲ့ကြသည်။

ပြီးခဲ့သည့်နှစ်များအတွင်း ဘာစီလိုနာမှ ကစားသမားအချို့ ရီးယဲလ်သို့ ရောက်ရှိသည့် အစဉ်အလာရှိခဲ့ပြီး အန်ဆယ်လော့တီကလည် မက်ဆီအား ခေါ်ယူလိုသည့် ၎င်း၏ ဆန္ဒကို ဖွင့်ဟခဲ့သည်။

“ရီးယဲလ်မှာ မက်ဆီအံဝင်နိုင်ပါ့မလားဆိုတော့ အရည်အသွေးပြည့်ဝတဲ့ အသင်းအားလုံးမှာ အရည်အသွေးပြည့်ဝတဲ့ ကစားသမားတွေအတွက် နေရာရှိပါတယ်” ဟု သောကြာနေ့က ပြုလုပ်ခဲ့သော သတင်းစာရှင်းလင်းပွဲတွင် အန်ဆယ်လော့တီက ပြောကြားခဲ့သည်။

အကယ်၍ မက်ဆီသာ ရီးယဲလ်သို့ ရောက်လာပါက ၎င်း၏ ပြိုင်ဘက် ရော်နယ်ဒိုနှင့် တွဲကစားရမည့် အလားအလာ ရှိနေသည်။ မက်ဆီမှာ ကမ္ဘာ့အကောင်းဆုံး ဘောလုံးသမားဆု Ballon d’Or ကို လေးကြိမ်ရရှိထားပြီး ရော်နယ်ဒိုကလည်း ၂ ကြိမ်ရရှိထားကာ ယခုနှစ် ဇကာတင်စာရင်းတွင်လည်း ၎င်းတို့ နှစ်ဦးစလုံး ပါဝင်နေသည်။ သို့သော်လည်း ရော်နယ်ဒိုက ထိုဆုကို ရရှိရန် ပိုမိုရေပန်းစားနေသည်။