ချယ်ဆီးကို ချန်ပီယံလိဂ် ယူပေးခဲ့သည့် နည်းပြ ဒီမက်တီယိုအား မော်ရင်ဟို အကောင်းမပြော

နိုဝင်ဘာ ၊ ၂၆ ၊ ၂၀၁၄
M-Media

– ဒီမက်တီယိုလက်ထက် ၂၀၁၂ ခုနှစ်တွင် ချယ်ဆီးအသင်း ချန်ပီယံလိဂ်ဖလား ရရှိခဲ့ခြင်းမှာ ကောင်းမွန်သော စွမ်းဆောင်မှု၏ ရလဒ်ကြောင့် ရရှိခဲ့ခြင်းမဟုတ်ဟု ချယ်ဆီးနည်းပြ မော်ရင်ဟိုက ပြောကြားလိုက်သည်။

မော်ရင်ဟို၏ ချယ်ဆီးမှာ ဒီမက်တီယိုကိုင်တွယ်သည့် ရှော်လ်ကာအသင်းနှင့် ချန်ပီယံလိဂ် ပွဲစဉ်အဖြစ် မန်ဖြန်တွင် ယှဉ်ပြိုင်ကစားရမည်ဖြစ်သည်။ ဒီမက်တီယိုမှာ ၂၀၁၂ ခုနှစ်က ချယ်ဆီးအသင်း၏ ယာယီနည်းပြအဖြစ် FA ဖလားနှင့် ချန်ပီယံလိဂ်ဖလားတို့ကို ရရှိအောင် စွမ်းဆောင်နိုင်ခဲ့သော်လည်း ပရီးမီးယားလိဂ်တွင် အဆင့် ၆ ဖြင့်သာ ရာသီသိမ်းနိုင်ခဲ့သည်။ အဆိုပါ ချန်ပီယံလိဂ် ဆုဖလားမှာ အသင်း၏ သမိုင်းတစ်လျှောက် ပထမဆုံး ရရှိသည့် ဆုဖလားလည်း ဖြစ်သည်။

`ချန်ပီယံလိဂ်ဆိုတာ ကောင်းမွန်တဲ့ စွမ်းဆောင်ရည်ရဲ့ ရလဒ်မဟုတ်ဘူးဆိုတာ ကျွန်တော် အကြိမ်ကြိမ်ပြောခဲ့ပြီးပါပြီ။ အဆိုးဝါးဆုံး ဘောလုံးရာသီမှာတောင်မှ ချန်ပီယံလိဂ်ကို ရနိုင်ပါတယ်။ အမှတ်ပေးဇယားမှာ အဆင့် ၅ လောက်ရပေမယ့်လည်း ချန်ပီယံလိဂ်မှာ ဗိုလ်စွဲနိုင်ပါတယ်။ ဟုတ်ပါတယ်။ လီဗာပူးလ်လည်း ဒီလိုရခဲ့သလို ချယ်ဆီးကလည်း ဒီလိုရခဲ့ပါတယ်´ ဟု မော်ရင်ဟိုက သတင်းထောက်များအား ပြောကြားခဲ့သည်။

ထို့ပြင် ဒီမက်တီယို၏ အောင်မြင်မှုများကို အားကျခြင်းထက် မိမိအသင်း၏ လက်ရှိပုံစံကို တိုးတက်အောင် ဆောင်ရွက်သွားမည်ဖြစ်ကြောင်း၊ ချန်ပီယံလိဂ်တွင် အောင်မြင်ရန် မိမိတွင် မည်သည့် လျှို့ဝှက်ချက်မှ မရှိကြောင်း မော်ရင်ဟိုက ထပ်လောင်းပြောကြားခဲ့သည်။