၆ ကြိမ်ဆက်တိုက် ပင်နယ်တီ ကာကွယ်နိုင်ခဲ့တဲ့ အင်တာမီလန် ဂိုးသမား

နိုဝင်ဘာ ၂၈ ၊ ၂၀၁၄
M-Media

– အင်တာမီလန်အသင်း၏ ဂိုးသမား ဟန်ဒါနိုဗစ်မှာ ယမန်နေ့က ကစားခဲ့သည့် ယူရိုပါလိဂ် ပြိုင်ပွဲတွင် ပွဲကစားစဉ် ပေးခဲ့ရသည့် ပယ်နယ်တီအား ၆ ကြိမ်မြောက်အဖြစ် ကာကွယ်နိုင်ခဲ့သည်ဟု သိရသည်။

အင်တာက ဒီနီပရိုအား ၂ ဂိုး ၁ ဂိုးဖြင့်အနိုင်ရရှိခဲ့သော အဆိုပါပွဲတွင် ဦးဆောင် ဂိုးသွင်းထားသော ဒီနီပရို၏ ပထမပိုင်းတွင် ထပ်မံရရှိသည့် ပင်နယ်တီအား ဟန်ဒါနိုဗစ်က ကာကွယ်နိုင်ခဲ့ပြီး ဟန်ဒါနိုဗစ်၏ မတူညီသော ပွဲစဉ်များတွင်း ပွဲကစားစဉ်ပေးရသော ပင်နယ်တီ ၆ လုံးဆက်တိုက်ကို ကာကွယ်နိုင်ခဲ့ခြင်းဖြစ်သည်။

ထိုပွဲတွင် အင်တာမှာ ဦးဆောင်ဂိုးပေးလိုက်ရပြီး ဒုတိယပိုင်း အစတွင် ကစားသမားတစ်ဦးလည်း အထုတ်ခံခဲ့ရသည်။ သို့သော်လည်း နောက်ပိုင်းတွင် ချေပဂိုးနှင့် အနိုင်ဂိုးများသွင်းကာ လိုအပ်သော အနိုင် ၃ မှတ်ကို ရယူနိုင်ခဲ့သည်။

`ဂိုးမ၀င်အောင် ကာကွယ်ဖို့က ကျွန်တော့်အလုပ်ပါ။ ပြီးတော့ ကျွန်တော်အကောင်းဆုံး ကြိုးစားခဲ့တာပါ။ ဒီအနိုင်အတွက် ကျွန်တော်တို့ဟာ ခက်ခက်ခဲခဲ ကစားခဲ့ရပါတယ်။ ပွဲအစမှာ ကျွန်တော်တို့ အနှစ်သာရ သိပ်မရှိခဲ့ပါဘူး။ ကျွန်တော်တို့ ကောင်းကောင်းမကစားနိုင်ခဲ့ပေမယ့် နောက်ပိုင်းမှာတော့ မှန်ကန်တဲ့ စိတ်ဓာတ်ကို ပြသနိုင်ခဲ့ပါတယ်´ ဟု အသက် ၃၀ အရွယ် ဟန်ဒါနိုဗစ်က ပွဲအပြီးတွင် ပြောကြားခဲ့သည်။

ဟန်ဒါနိုဗစ်မှာ ဗီရိုနာ၊ ကာဂလီယာရီ၊ တိုရီနို၊ ပါးမားနှင့် ဆမ်ဒိုးရီးယားတို့နှင့် ကစားခဲ့သော ပွဲစဉ်များ၌လည်း ပွဲအတွင်းပေးရသော ပင်နယ်တီများကို ကာကွယ်နိုင်ခဲ့သည်။