ကွန်မြူနစ်ပါတီကို ဆန့်ကျင်ရေးသား၍ ဘလော့ဂ်ဂါ တဦးအား ဗီယက်နမ် အစိုးရဖမ်းဆီး

ဒီဇင်ဘာ ၇ ၊ ၂၀၁၄
M-Media

– ကွန်မြူနစ်ပါတီအား ဆန့်ကျင်သည့် ဆောင်းပါးများကို လွှင့်တင်ခဲ့သည်ဟူသော စွပ်စွဲချက်ဖြင့် ထင်ရှားသည့် စာရေးဆရာတစ်ဦးအား ဗီယက်နမ်အစိုးရက ဖမ်းဆီးထိန်းသိမ်းလိုက်သည်ဟု သိရသည်။

ဖမ်းဆီးခံရသူမှာ စာရေးဆရာ ငုယင် ကွမ်လပ်ဆိုသူဖြစ်ပြီး ဒီဇင်ဘာ ၆ ရက်နေ့က ဟိုချီမင်းရှိ ၎င်း၏ နေအိမ်၌ ရဲတပ်ဖွဲ့က လာရောက်ဖမ်းဆီးခဲ့ခြင်းဖြစ်သည်ဟု ဇနီဖြစ်သူ ဟိုသီဟွန်က AFP သတင်းဌာနသို့ ပြောကြားခဲ့သည်။

`လုံခြုံရေးတပ်ဖွဲ့ဝင် တစ်ဒါဇင်ကျော်လောက်က ကျွန်မတို့ အိမ်မှာ နာရီပေါင်းများစွာ ရှာဖွေပြီး သူ့ကိုလည်း ဖမ်းသွားခဲ့ပါတယ်။ သူ့ရဲ့ ဘလော့မှာ (ကွန်မြူနစ်)ပါတီရဲ့ ပေါ်လစီ၊ လမ်းညွှန်ချက်တွေနဲ့ ဆန့်ကျင်တဲ့ ဆောင်းပါးတွေ ရေးသားခဲ့တယ်လို့ သူတို့က ပြောပါတယ်´ ဟု ဟိုသီဟွန်က ဆိုသည်။

အသက် ၅၈ နှစ်အရွယ်ရှိပြီဖြစ်သည့် ကွမ်လပ်မှာ ဗီယက်နမ် စာရေးဆရာများအသင်း၏ အဖွဲ့ဝင်တစ်ဦးဖြစ်ပြီး အရှေ့တောင်အာရှတွင် ကျော်ကြားသည့် စာရေးဆရာ တစ်ယောက်လည်း ဖြစ်သည်။ ၎င်း၏ ဘလော့ဂ်ကို လူသန်းပေါင်း များစွာက ကြည့်ရှုကြပြီး Facebook စာမျက်နှာတွင်လည်း ပရိတ်သတ် ၁၅၀၀၀ ခန့် ရှိနေသည်။

၎င်း၏ အဆိုပါဘလော့တွင် ကိုယ်ပိုင်ရေးသားမှုများနှင့် အခြာသူများ၏ ရေးသားချက်များကိုလည်းလွှင့်တင်ထားပြီး ထိုအထဲမှ အချို့မှာ ဗီယက်နမ်၏ လူမှုရေး၊ နိုင်ငံရေးဆိုင်ရာ ကိစ္စရပ်များနှင့် ပတ်သက်၍ ဝေဖန်ထောက်ပြထားသည်။

ထို့ပြင် ရေးသားမှု အများစုမှာ ဗီယက်နမ်နိုင်ငံသားများ အထူးသဖြင့် ပညာတတ်များအကြား ပြန့်နှံ့နေသည့် တရုတ် ဆန့်ကျင်ရေး အတွေးအခေါ်များ ဖြစ်သည်။