၄၃၆ ပြင်ဆင်ရေး လက်မှတ်ထိုးခဲ့သည့် ဗိုလ်မှူး ထောင်ဒဏ် ၂ နှစ် ချမှတ်ခံရ

ဒီဇင်ဘာ ၇ ၊ ၂၀၁၄
M-Media

– ဖွဲ့စည်းပုံအခြေခံဥပဒေပြင်ဆင်ရေး ပြည်သူ့ဆန္ဒကောက်ခံရာတွင် လက်မှတ်ထိုးခဲ့သည့် မြန်မာစစ်တပ်မှ အရာရှိတစ်ဦးအား ထောင်ဒဏ် ၂ နှစ် ချမှတ်လိုက်သည်ဟု ပြည်တွင်း မီဒီယာများက ဒီဇင်ဘာ ၅ ရက်နေ့တွင် ဖော်ပြခဲ့သည်။

ထောင်ဒဏ်ချမှတ်ခြင်း ခံခဲ့ရသူမှာ ဗိုလ်မှူး ကျော်စွာဝင်းဆိုသူဖြစ်ပြီး လွှတ်တော်တွင် စစ်တပ်မှ ၂၅ ရာခိုင်နှုန်း နေရာရရှိနေသည့် ၂၀၀၈ ဖွဲ့စည်းပုံ အခြေခံဥပဒေအား ပြင်ဆင်ရန် လူထုဆန္ဒ ကောက်ခံပွဲတွင် လက်မှတ်ထိုးနေသည့် ၎င်း၏ပုံမှာ ယခုနှစ် အစောပိုင်းတွင် အင်တာနက် စာမျက်နှာများ၌ ပြန့်နှံ့ခဲ့ပြီးနောက် ဧပြီလတွင် ပြင်ဦးလွင်၌ ဖမ်းဆီးခံခဲ့ရခြင်းဖြစ်သည်။

မြန်မာစစ်တပ်ကမူ မည်သည့် အရာရှိမဆို ဖွဲ့စည်းပုံအခြေခံဥပဒေပြင်ဆင်ရေး လှုပ်ရှားမှုတွင် မပါဝင်ရန် အမိန့်ထုတ်ခဲ့ပြီး ဗိုလ်မှူး ကျော်စွာဝင်း ကိုလည်း အမိန့်ဖီဆန်မှုဖြင့် တရားစွဲဆိုခဲ့ကာ ယခုကဲ့သို့ ထောင်ဒဏ် ၂ နှစ် ချမှတ်ခဲ့ခြင်းဖြစ်သည်။

စစ်တပ်အကျဉ်းစခန်း၌ ရှိနေစဉ် ဗိုလ်မှူး ကျော်စွာဝင်းအား မည်သူနှင့်မှ တွေ့ခွင့်မပေးဘဲ စာအုပ်စာပေ ဖတ်ရှုခွင့်လည်းမရဟု RFA သတင်းဝဘ်ဆိုက်တွင် ဖော်ပြထားသည်။

အဆိုပါ ဖွဲ့စည်းပုံအခြေခံဥပဒေပြင်ဆင်ရေး လူထုဆန္ဒ ကောက်ခံခြင်းအား အမျိုးသားဒီမိုကရေစီ အဖွဲ့ချုပ်က ဦးဆောင်ပြုလုပ်ခဲ့ခြင်းဖြစ်ပြီး အဖွဲ့ချုပ်ဥက္ကဌ ဒေါ်အောင်ဆန်းစုကြည်ကမူ မိမိတုိ့မှာ လက်မှတ် ၅ သန်းကျော်ရရှိခဲ့သည်ဟု ပြောကြားခဲ့သည်။

လွှတ်တော်တွင် စစ်တပ်မှ ၂၅ ရာခိုင်နှုန်း နေရာယူထားခြင်း အပါအ၀င် ဖွဲ့စည်းပုံ အခြေခံဥပဒေရှိ ဒီမိုကရေစီ မကျသည့် အပိုဒ်များအား လာမည့် ရွေးကောက်ပွဲမတိုင်မီ ပြင်ဆင်ရန်အတွက် အမျိုးသားဒီမိုကရေစီအဖွဲ့ချုပ် ဒေါ်အောင်ဆန်းစုကြည်အပါအ၀င် နိုင်ငံရေးပါတီ အတော်များများက အလိုရှိနေကြသည်။

World Bulletin