နာဆရီရဲ့ ဦးဆောင်မှုနဲ့ နောက်တဆင့် တက်တဲ့ မန်စီးတီး၊ ရေကုန်ရေခန်း ကြိုးစားလို့ အကျိုးခံစားရတဲံ ရှော်လ်ကာ ချန်ပီယံလိဂ် အုပ်စုနောက်ဆုံးပွဲများ

ဒီဇင်ဘာ ၁၁ ၊ ၂၀၁၄
M-Media

– ချန်ပီယံလိဂ် နောက်ဆုံးအသုတ် အုပ်စုနောက်ဆုံးပွဲစဉ်တွေကို ဒီနေ့မနက်မှာ ကစားခဲ့ပြီး မန်စီးတီးတို့ အဝေးကွင်းမှာ ခြေစွမ်းပြအနိုင်ယူကာ နောက်တစ်ဆင့်ကို ထိုက်ထိုက်တန်တန် တက်ရောက်နိုင်ခဲ့ပါတယ်။ ဂျာမန်ကလပ် ရှော်လ်ကာကလည်း နောက်ဆုံး ကောက်ရိုးတစ်မျှင်ကို အသေအချာ ဆုပ်ကိုင်နိုင်ခဲ့တာကြောင့် ၁၆ သင်းအဆင့်ရောက်ခဲ့ပြီး ပွဲစဉ်တွေကိုတော့ ဒီဇင်ဘာ ၁၅ ရက်နေ့မှာ မဲခွဲမှာဖြစ်ပါတယ်။

အုပ်စု E

ဘိုင်ယန် ၃-၀ စီအက်စ်ကေအေ
ရိုးမား ၀-၂ မန်စီးတီး

စီအက်စ်ကေအေတို့ ဒီပွဲနိုင်မယ်ဆိုရင် နောက်တစ်ဆင့်တက်ရေး မျှော်လင့်ချက် အနည်းငယ် ရှိလာနိုင်ပေမယ့် အိမ်ရှင်တို့ကို ယှဉ်လို့မရခဲ့ဘဲ ဂိုးပြတ် ရှုံးကာ အဆင့် ၄ နေရာနဲ့ ယူရိုပါလိဂ်ဝင်ခွင့်ပါ ဆုံရှုံးသွားခဲ့ပါတယ်။ ဘိုင်ယန်အတွက် ဂိုးတွေကိုတော့ မူလာ၊ ရိုဒီနဲ့၊ ဂေ့ါဇီတို့က သွင်းယူပေးခဲ့တာပါ။

ရောမမှာကစားခဲ့တဲ့ မန်စီးတီးနဲ့ ရိုးမားတို့ပွဲမှာတော့ အနိုင်ရရင် ၂ သင်းစလုံး နောက်တစ်ဆင့် တက်ခွင့် ရှိနေတာကြောင့် အကြိတ်အနယ်ရှိခဲ့ပါတယ်။ ရိုးမာတို့ အိမ်ရှင်ပီပီ ဘောလုံးပိုင်ဆိုင်မှု အသာနဲ့ ကစားနိုင်ခဲ့ပြီး ဂိုးသွင်းခွင့်လည်း ၆ ကြိမ်လောက်ရခဲ့တာပါ။ ဒါပေမယ့် မန်စီးတီးနောက်တန်းနဲ့ ဂိုးသမားတို့ အကောင်းဆုံး တုံ့ပြန်နိုင်ခဲ့ပါတယ်။ ဒုတိယပိုင်းမှာ ကစားပုံ ပိုကောင်းလာတဲ့ မန်စီးတီးတို့ ဦးဆောင်ဂိုးရခဲ့ပြီး ဒီဂိုးကိုတော့ ဒီပွဲရဲ့ အကောင်းဆုံးကစားသမား နာဆရီက ဧရိယာထိပ်ကနေ လှလှပပ ကန်သွင်းပေးခဲ့တာပါ။ နောက်ပိုင်းမှာ ရိုးမားတို့ ဂိုးရရေး ကြိုးစားခဲ့ပေမယ့် အရာမထင်ခဲ့ဘဲ ပွဲပြီးကာနီးမှာ နောက်ခံလူ ဇာဘလက်တာက ၁ ဂိုး ထပ်သွင်းပေးခဲ့လို့ မန်စီးတီးတို့ အုပ်စု ဒုတိယနဲ့ နောက်တစ်ဆင့်ကို တက်သွားခဲ့ပါတယ်။ ရိုးမားကတော့ ယူရိုပါလိဂ်နဲ့ပဲ ကျေနပ်ခဲ့ရပါတယ်။

အုပ်စု F

ဘာစီလိုနာ ၃-၁ ပီအက်စ်ဂျီ
အေဂျက်စ် ၄-၀ APOEL

နျူးကမ့်က ဒီပွဲကတော့ အုပ်စုဗိုလ်လုတဲ့ပွဲဖြစ်ပြီး ၀ါရင့် ဘာစီလိုနာက နောက်ကလိုက်ကစားကာ အုပ်စုပထမနေရာကို ထိုက်ထိုက်တန်တန်ရယူနိုင်ခဲ့ပါတယ်။ ပီအက်စ်ဂျီအတွက် ဦးဆောင်ဂိုးကို ၁၅ မိနစ်မှာ အသင်းရဲ့ ဂိုးသွင်းစက် အီဗရာဟီမိုဗစ်က သွင်းယူပေးခဲ့ပြီး ဘာကာအတွက် ချေပဂိုးနဲ့ အနိုင်ဂိုးတွေကိုတော့ မက်ဆီ၊ နေးမာနဲ့ ဆွာရက်ဇ်တို့က ၁၉၊ ၄၂ နဲ့ ၇၇ မိနစ်တွေမှာ အသီးသီး သွင်းယူပေးခဲ့ပါတယ်။

အေဂျက်စ်ကတော့ အိမ်ကွင်းမှ ဂိုးမြူးခဲ့ပြီး ချန်ပီယံလိဂ် ပထမဆုံး နိုင်ပွဲရအောင် စွမ်းဆောင်နိုင်ခဲ့ပါတယ်။ ဒီပွဲအနိုင်ကြောင့် ၅ မှတ်နဲ့ အုပ်စု တတိယနေရာရသွားတဲ့ အေဂျက်စ် ယူရိုပါလိဂ်မှာ ဆက်ကစားရမှာပါ။

အုပ်စု G

ချယ်ဆီး ၃-၁ စပို့တင်း
မာရီဘိုး ၀-၁ ရှော်လ်ကာ

နောက်တစ်ဆင့်တက်သွားပြီဖြစ်တဲ့ အိမ်ရှင်ချယ်ဆီးတို့ စပို့တင်းကို မညှာခဲ့ပါဘူး။သရေရင်တောင် နောက်တစ်ဆင့်တက်ဖို့ အခွင့်အရေးရှိပေမယ့် ၁၆ မိနစ်အတွင်း ၂ ဂိုးပေးလိုက်ရတာက စပို့တင်းအတွက် စိတ်ပျက်စရာ ဖြစ်ခဲ့ပါတယ်။ ဒါပေမယ့် ၇ မှတ်နဲ့ အုပ်စု တတိယနေရာရခဲ့ပြီး နှစ်သိမ့်ဆုအဖြစ် ယူရိုပါလိဂ်ဝင်ခွင့် တစ်နေရာတော့ ရခဲ့ပါတယ်။

ဂျာမန်ကလပ် ရှော်လ်ကာတို့ကတော့ လုပ်သင့်လုပ်ထိုက်တာကို အကောင်းဆုံး လုပ်ဆောင်သွားခဲ့ပြီး အုပ်စုဒုတိယနဲ့ နောက်တစ်ဆင့်ကို တက်ရောက် သွားခဲ့ပြီဖြစ်ပါတယ်။ စပို့တင်းတို့ ချယ်ဆီးကို ရှုံးခဲ့လို့သာ ရှော်လ်ကာရဲ့ ဒီအနိုင်ဟာ အသက် မမဲ့ခဲ့တာပါ။ အသင်းကို နောက်တစ်ဆင့် တက်ရောက်နိုင်စေမယ့် တစ်လုံးတည်းသော အနိုင်ဂိုးကိုတော့ မီယာက ၆၂ မိနစ်မှာ သွင်းယူပေးခဲ့တာ ဖြစ်ပါတယ်။

အုပ်စု H

ပေါ်တို ၁-၁ ရှက်တာဒိုးနက်
ဘီဘာအို ၂-၀ BATE

ပေါ်တိုနဲ့ ရှက်တာဒိုးနက်တို့ စောစောစီးစီး နောက်တစ်ဆင့် တက်နိုင်ခဲ့တာကြောင့် သာမန်လောက်ပဲ ကစားခဲ့ပြီး ၁ မှတ်စီ ခွဲယူခဲ့ကြပါတယ်။

ယူရိုပါလိဂ် တစ်နေရာစာအတွက် ဘီဘာအိုတို့ အိမ်ကွင်းမှာ အနိုင်ကစားနိုင်ခဲ့ပြီး BATE ကတော့ ချန်ပီယံလိဂ်မှာ ဂိုးအများဆုံးပေးခဲ့ရတဲ့အသင်းအဖြစ် မှတ်တမ်းဝင်ခဲ့ပါတယ်။