လာမည့် အစ္စရေး ရွေးကောက်ပွဲတွင် နေတန်ယာဟု အားဖြုတ်ချဖို့ ပါတီကြီး ၂ ခုပေါင်းစည်း

ဒီဇင်ဘာ ၁၃ ၊ ၂၀၁၄
M-Media

– လာမည့်မတ်လ၌ ကျင်းပပြုလုပ်မည့် ရွေးကောက်ပွဲတွင် လက်ယာယိမ်း လက်ရှိ ဝန်ကြီးချူပ် နေတန်ယာဟုအား ဖြုတ်ချရန်အတွက် အစ္စရေးမှ ပါတီကြီးနှစ်ခုက ပေါင်းစည်း လိုက်သည်ဟု သိရသည်။

ပေါင်းစည်းလိုက်သည့် ပါတီ ၂ ခုမှာ လေဘာပါတီနှင့် HaTnuah ပါတီတို့ ဖြစ်ကြပြီး လေဘာတီမှ ခေါင်းဆောင် အိုက်ဇက် ဟာ့ဇော့ဂ်နှင့် HaTnuah ပါတီအကြီးအကဲ အမျိုးသမီး ဇီပီ လစ်ဗနီတို့က ၎င်းတို့ ပါတီနှစ်ခု ပေါင်းစည်းကြောင်းကို ဒီဇင်ဘာ ၁၀ ရက်နေ့တွင် ရုပ်သံမှတစ်ဆင့် ကြေညာခဲ့ခြင်းဖြစ်သည်။ ၎င်းတို့၏ ဆောင်ပုဒ်မှာ `အတူတကွ နိုင်ရမည်´ဖြစ်သည်။

`ကျွန်တော်တို့ ရွေးချယ်ခံရတဲ့အခါ ၀န်ကြီးချုပ်သက်တမ်း လေးနှစ်မှာ ကျွန်တော် ပထမ ၂ နှစ် ဆောင်ရွက်သွားမှာဖြစ်ပြီး လစ်ဗနီက ဒုတိယ ၂ နှစ်ဆောင်ရွက်သွားမှာပါ´ ဟု ဟာဇော့ဂ်က ပြောကြားခဲ့သည်။

ထို့ပြင် လစ်ဗနီကမူ ယနေ့တွင် လက်ယာစွန်းရောက် ပါတီများ၏ အခြားဘက်မှ ဇီယွန်ဝါဒ ဌာနများ ပေါ်ပေါက်လာနေသည်ဟု ပြောကြားခဲ့သည်။ လစ်ဗနီမှာ ပါလက်စတိုင်းနှင့် ငြိမ်းချမ်းရေး ညှိနှိုင်းဆွေးနွေးသည့် အဖွဲ့ခေါင်းဆောင်ဖြစ်ပြီး နေတန်ယာဟုက ၎င်း၏ လက်ယာယိမ်းပါတီနှင့် ဆန့်ကျင်သည်ဟု စွပ်စွဲကာ ပြီးခဲ့သည့် သီတင်းပတ်က ရာထူးမှ ထုတ်ပယ်ခဲ့ခြင်းဖြစ်သည်။

နေတန်ရာဟု၏ Likud ပါတီတွင် နိုင်ငံရေးသမားဘ၀ကို စတင်ခဲ့သည့် လစ်ဗနီက အဆိုပါ ပါတီမှာ လက်ယာစွန်းရောက်များ၏ သိမ်းပိုက်မှုကို ခံခဲ့ရပြီဟု ထည့်သွင်းပြောကြားခဲ့သည်။

`(ဇီယွန်ဝါဒီ) အစွန်းရောက်တွေဟာ ကျွန်မတို့တိုင်းပြည်ကို သီးခြားနိုင်ငံဖြစ်အောင် ပြောင်းလဲနေပြီး၊ နိုင်ငံသားတွေကို တံခါးပိတ်ခံထားရအောင်၊ ဖယ်ကျဉ်ခံရအောင် လုပ်ဆောင်နေပါတယ်´

Agencies