မြတ်ဗုဒ္ဓ ဘယ်သူ့ကိုမှ တရား မစွဲခဲ့ပါ။ (သူ့အမြင်)

ဒီဇင်ဘာ ၁၇ ၊ ၂၀၁၄
M-Media
.ဆွေမွန်ရေးသည်။

ဒီနေ့ ၂၀၁၄ ခုနှစ် ဒီဇင်ဘာလထဲမှာ မြန်မာနိုင်ငံမှာ မြတ်စွာဘုရားကိုယ်တော်တိုင် သက်တော်ထင်ရှားရှိနေမယ်ဆိုရင် ဦးထင်လင်းဦး တရားစွဲခံရမယ်၊ အဖမ်းခံရမယ်၊ လက်ထိပ်ခတ်ခံရမယ် မထင်မိပါ။

စိတ်ကူးယဉ် imaginary မေးခွန်းဖြစ်လွန်းပေမယ့် တွေးစရာတွေ နည်းနည်းလောက် ထပ်ပေးချင်ပါသေးတယ်။

ဗုဒ္ဓဘာသာဝင်တိုင်းသိကြတဲ့ အခြေခံအကျဆုံး အောင်ခြင်းရှစ်ပါးကိုပဲ ကိုးကားချင်ပါတယ်။

‪‎ဦးထင်လင်းဦးလုပ်ရပ်ကိုတရားစွဲဖမ်းဆီးမယ်ဆိုရင်‬….

မဘသလက်ချက်နဲ့ သစ္စကပရိဗိုဇ်လည်း ထောင်ကျပါလိမ့်မယ်။ အတ္တလား အနတ္တလား အယူပြိုင်တဲ့ဆီတောင် ရောက်မယ်မထင်မိပါဘူး။.. ဗုဒ္ဓရှင်တော်ကတော့ အနတ္တဖြစ်တယ်ဆိုတာကို နားလည်အောင်ရှင်းပေးနိုင်တဲ့အတွက် သစ္စကပရိဗိုဇ်ကို အနိုင်ယူကာ အောင်ခြင်းတစ်ပါး ဖြစ်လာခဲ့ပါတယ်။

နန္ဒေပနန္ဒနဂါးမင်းလည်း မဘသကို ပြိုင်ဆိုင်မှုနဲ့ ဒေါသထွက်နေတဲ့ လူအုပ်ကြီးလက်ချက်နဲ့ သေချာပေါက် ခုတ်ထစ်သတ်ဖြတ်ခံရပါလိမ့်မယ်။ ဗုဒ္ဓရှင်တော်ကတော့ ရှင်မဟာမောဂ္ဂလန်ကို ခန္ဓာကိုယ်နှစ်ဆကြီးခိုင်းပြီး နဂါးကို မေတ္တာသက်သက်နဲ့ပဲ အနိုင်ယူခဲ့တဲ့အတွက် အောင်ခြင်းတစ်ပါး တိုးခဲ့ပါရဲ့…

ဗကဗြဟ္မာကြီးလည်း ဗြဟ္မာဘုံ မြဲ၏ မမြဲ၏ ခေါင်းစားတာနဲ့ မဘသလက်ချက်နဲ့ အသက်ထွက်သွားပါလိမ့်မယ်။ ဗုဒ္ဓရှင်တော်ကတော့ ဗြဟ္မာတွေ အမေးကို သေချာ ရှင်းနိုင်တဲ့ အတွက် အောင်ခြင်းတစ်ပါး တိုးခဲ့ပြန်ပါတယ်။

တိတ္ထိဆိုတာ အယူဝါဒလွဲသူ… တိတ္ထိတွေကို မြတ်ဗုဒ္ဓက တန်ခိုးချင်းပြိုင်ပြီး အနိုင်ယူခဲ့တယ်။ သရက်ဖြူသီးကိုဘုန်းပေး၊ အစေ့ကို ချက်ချင်းစိုက်၊ အပင်ပေါက်စေပြီး အသီးပြန်ဘုန်းပေးပြကာ တန်ခိုးပြာဋိဟာနဲ့ မေတ္တာရှေ့ထား အကြမ်းမဖက်ဘဲ အနိုင်ယူခဲ့တယ်။ ခုခေတ် မဘသတွေက တိတ္ထိတွေကို မီးနဲ့ရှို့၊ အိမ်တွေက မောင်းထုတ်၊ မဆက်ဆံရ၊ မရောင်းရ မ၀ယ်ရ အမိန့်ထုတ်ကာ အမုန်းတရားတန်ခိုးပြာဋိဟာနဲ့ အနိုင်ယူကြတယ်။ အမုန်းတရား ထားနေသရွေ့ ဘယ်တိတ္ထိမှ ဗုဒ္ဓ၀ါဒကို သက်ဝင် ယုံကြည် လာကြမယ် မထင်မိပါဘူး။ မေတ္တာဝါဒီဘုရားရှင်ကတော့ မေတ္တာသက်သက်နဲ့ပဲ အားလုံးကိုအနိုင်ယူကာ ဗုဒ္ဓ၀ါဒီတွေ ဖြစ်လာစေခဲ့ပါတယ်။

စိဉ္စမာဏ၀ီကာပရိဗိုဇ်မဆိုရင် သေချာပါပြီ။ တရားပွဲထဲမှာတင် မဘသတပည့်တပန်းတွေ လက်ချက်နဲ့ ဗိုက်ကြီးပြုတ်ထွက်ရုံမကဘဲ အသက်လည်း ဘယ်အပေါက်က ထွက်သွားမယ် မသိ။ နတ်သားလေးဦး ကြွက်ယောင် မဆောင်ခင် စိဉ္စမာဏ သေနေပါပြီ။ မဘသခေတ်မှာဆိုရင် အောင်ခြင်းတစ်ပါးလည်း ပျောက်သွားလိမ့်မယ် ထင်မိပါတယ်။ မြတ်ဗုဒ္ဓကတော့ မေတ္တာနဲ့ပဲ စွပ်စွဲတာကို ချေပခဲ့ပြန်တယ်။

ကပိလ၀တ်နဲ့ ကောလိယနှစ်ပြည်ထောင်ကြား ရောဟီဏီမြစ်ကိစ္စဆိုရင်လည်း မြတ်ဗုဒ္ဓက စစ်မဖြစ်အောင် မေတ္တာရှေ့ထား တားနိုင်ခဲ့ပါတယ်။ သွေးသံ တစ်စက် မြေ မကျခဲ့စေရပါဘူး။ မြန်မာဗုဒ္ဓ အမျိုးစောင့် မဘသ အဖွဲ့ကြီးသာ ရောဟီဏီမြစ် အရေး ကိုင်တွယ်လိုက်ရင်… မြစ်ရေဟာ သွေးရေ ဖြစ် သွားပါလိမ့်မယ်။ မြတ်ဗုဒ္ဓဟာ အလည်မှာပဲ ရပ်ခဲ့တယ်။ ဘက်မလိုက်ခဲ့ပါဘူး။ မျှတခဲ့ပါတယ်။

အင်္ဂုလိမာလကတော့ အဖြစ် အဆိုးဆုံးဖြစ်လိမ့်မယ်။ လက်ညိုးဖြတ်တာနဲ့တင် သူ့ကို လည်ပင်းဖြတ်မယ့် အရိုးစည်းရိုးထိုးမယ့်ပုဂ္ဂိုလ်တွေနဲ့တွေ့ရင် ကြွပါပြီ။ မြတ်ဗုဒ္ဓရဲ့ လူသတ်သမား အပေါ်မှာတောင် မေတ္တာထားခဲ့တဲ့ အတွက် အဂုင်္လိမာလဟာ ရဟန်းဖြစ်လာခဲ့ပါတယ်။ အောင်ခြင်းတစ်ပါးလည်း တိုးခဲ့ရပြန်တယ်။

အခုခေတ်မှာဆိုရင် မဘသလက်ချက်နဲ့ အရက်တန်ခိုးနဲ့ ဆိုးချင်တိုင်းဆိုးခဲ့တဲ့ နာလာဂိရိဆင်လည်း လမ်းပေါ်မှာတင် အသတ်ခံရမှာ အသေအချာပါပဲ။ အောင်ခြင်း တစ်ပါးကတော့ ပျောက်ပြန်ပါပြီ။

အဓိကဆိုချင်တဲ့အချက်က မြတ်ဗုဒ္ဓက မေတ္တာရှေ့ထားပြီး အားလုံးကို မေတ္တာသက်သက်နဲ့ အနိုင်ယူခဲ့ပေမယ့် မြန်မာပြည်က ဗုဒ္ဓသားတော်တွေက အမုန်းတရားနဲ့ ဗုဒ္ဓဘာသာဝင် တစ်ဦးကို ထောင်မကျကျအောင် အဖမ်းမခံရ ခံရအောင် ဖိအားအမျိုးမျိုးပေးပြီး အနိုင်ယူခဲ့တာက အင်မတန် အံ့သြစရာပါ။

အောင်ခြင်းရှစ်ပါးထဲက ပုဂ္ဂိုလ်တွေဟာ မြတ်ဗုဒ္ဓကို တိုက်ရိုက် လူချင်း မျက်နှာချင်းဆိုင်ပြီး စော်ကားပြိုင်ဆိုင်ခဲ့ကြပေမယ့် မြတ်ဗုဒ္ဓက အပြုံးမပျက် မေတ္တာသက်သက်နဲ့ တရားမစွဲခဲ့တဲ့အပြင် မြတ်ဗုဒ္ဓကိုလည်း တောင်းပန်စရာ မလိုဘဲ အပြုံးရဲရဲနဲ့ အံ့ဖွယ်သရဲ ခွင့်လွှတ်ခြင်းဖြင့် အနိုင်ယူခဲ့ပါတယ်။

အခုဦးထင်လင်းဦးဟာ သူမှားတဲ့အတွက် အင်းစိန်ဆရာတော်ကြီး အပါအ၀င် ဘုန်းကြီးပေါင်းများစွာကို ကိုယ်တိုင်ဖြစ်စေ၊ စာရေးပြီးဖြစ်စေ ခြေဖ၀ါး ဦးခိုက် တောင်းပန် ခဲ့ပေမယ့် မကျေအေးနိုင် ဒေါသတွေ မငြိမ်းနိုင်ဖြစ်နေရတာကလည်း အံ့သြစရာပါ။

မတူပါဘူး။ သေချာပါတယ်။ မြတ်ဗုဒ္ဓလမ်းစဉ်နောက်ကိုသာ လိုက်တဲ့ ဗုဒ္ဓသားတော်တွေသာဆိုရင်

‪‎တိတ္ထိမဟုတ်တဲ့‬…

သစ္စကပရိဗိုဇ်လိုဗုဒ္ဓနဲ့အယူမပြိုင်တဲ့‬

‪‎စိဉ္စမာဏလိုဗုဒ္ဓကိုသိက္ခာမချတဲ့‬

‪‎အဂုင်္လိမာလလို လူသတ်သမားမဟုတ်တဲ့‬

ဦးထင်လင်းဦးလို သာမန် ဗုဒ္ဓဘာသာဝင် တစ်ဦးကို ဘုရားသားတော် မေတ္တာဝါဒီတွေက မေတ္တာရှေ့ထား ဘာကြောင့်များ ခွင့်မလွှတ်နိုင်သလဲ အကြိမ်ကြိမ်သာ တွေးနေမိပါတော့တယ်။

ဆွေမွန်
၁၇ ဒီဇင်ဘာလ ၂၀၁၄