၂၀၁၄ မှာ မိမိတို့အတွက် ဆိုးရွားသော ခုနှစ်ဟု ဘာစီလိုနာ ဥက္ကဌဆို

ဒီဇင်ဘာ ၂၀ ၊ ၂၀၁၄
M-Media

– ၂၀၁၄ ခုနှစ်မှာ မိမိတို့အသင်း အတွက် ဆိုးရွားသော ကာလများဖြစ်ခဲ့ပြီး လာမည့် ၂၀၁၅ ခုနှစ်၌ ပိုမိုကောင်းမွန်သော အချိန်များ ရရှိလိမ့်မည်ဟု မျှော်လင့်ကြောင်း ဘာစီလိုနာ ဥက္ကဌ ဘာတိုမြူက ပြောကြားလိုက်သည်။

ဘာကာမှာ ယခုနှစ် အတွင်း နေမာ၏ အပြောင်းအရွှေ့ကိစ္စ၊ မက်ဆီ၏ အခွန်ရှောင်မှုများ၊ အသင်းအောင်မြင်မှု မရခြင်း၊ ဥက္ကဌ အပြောင်းအလဲ၊ အသင်းကိစ္စနှင့် ပတ်သက်၍ ဥက္ကဌဟောင်း တရား ရင်ဆိုင်ရခြင်း၊ ကစားသမားဝယ်ယူမှု ပိတ်ပင်ခံရခြင်း စသည်တို့အပါအ၀င် ပြဿနာများဖြင့် ရင်ဆိုင်ခဲ့ရပြီး အသင်းတွင်လည်း မတည်မငြိမ် ဖြစ်ခဲ့ရသည်။

သို့သော်လည်း ဘာတိုမြူကမူ ၂၀၁၅ ခုနှစ်မှာ အသင်းတွင် ရှိနေသူ အားလုံး အတွက် အောင်မြင်နိုင်သော နှစ် တစ်နှစ်ဖြစ်လာမည်ဟုဆိုသည်။

`၂၀၁၄ ခုနှစ်ဟာ အရမ်းကို ခက်ခဲတဲ့ နှစ်တစ်နှစ်ဖြစ်ခဲ့ပါတယ်။ ၂၀၁၅ မှာတော့ ထူးခြားတဲ့ နှစ်တစ်နှစ်ဖြစ်မယ်လို့ ကျွန်တော်တို့ မျှော်လင့်ပါတယ်။ ပြီးတော့ ခရစ္စမတ် ကာလကလည်း စတင်မှု အသစ် အတွက် မျှော်လင့်ချက်ကို ယူလာပါတယ်။ ၂၀၁၅ အတွက် အသင်းနဲ့ နည်းပြတို့မှာ ကောင်းမွန်တဲ့ စိတ်အားထက်သန်မှုနဲ့ ယုံကြည်မှုတွေ ရှိပါတယ်´ ဟု ဘာတိုမြူက ပြောကြားခဲ့သည်။

မာတီနို၏ နေရာကို ဆက်ခံခဲ့သည့် အန်းရစ်မှာ ဘာစီလိုနာ အသင်းအား မက်လောက်စရာ အောင်မြင်မှုများကို မယူပေးနိုင်သေးဘဲ ယခုလက်ရှိ ချိန်ပီယံလိဂ် ရှုံးထွက် အဆင့်သို့ တက်ရောက်နိုင်အောင် စွမ်းဆောင်ပေး ထားသော်လည်း လာလီဂါတွင် ထိပ်ဆုံးမှ ဦးဆောင်နေသည့် ရီးယဲလ်နှင့် ၄ မှတ်ကွာဟနေသည်။