ဂျရူးက အသင်းအား ခက်ခဲအောင်လုပ်ခဲ့သည်ဟု ၀င်းဂါးဆို

– အသင်းရှိ တိုက်စစ်မှူး ဂျရူးမှာ မိမိတို့အသင်းအား အကြပ်အတည်းတွေ့အောင်
လုပ်ဆောင်လိုက်သည်ဟု အာဆင်နယ်နည်းပြ အာဆင်ဝင်းဂါးက ပြောကြားလိုက်သည်။

ယမန်နေ့က ကစားခဲ့သည့် ကျူပီအာရ်အသင်းအား ၂ ဂိုး ၁ ဂိုးဖြင့် အနိုင်ရသည့်ပွဲတွင် ဂျရူးမှာ ၅၃ မိနစ်၌ ကျူပီအာရ်ကစားသမား နီဒမ်အိုနူဟာအား ခေါင်းဖြင့်တိုက်ခဲ့သောကြောင့် တိုက်ရိုက်အနီကဒ်ဖြင့် အထုတ်ခံခဲ့ရပြီး ၃ ပွဲပယ်ခံရမည်ဖြစ်သည်။

ဒဏ်ရာရကစားသမားများဖြင့် ရုန်းကန်နေရသော အာဆင်နယ်တွင် ဂျရူး၏ ပွဲပယ်ခံရမှုက ထိုးနှက်မှုတစ်ခု ဖြစ်ခဲ့ပြီး ၀င်းဂါကလည်း ထိုအနီကဒ်အတွက် ညည်းတွားခဲ့သည်။

`ဒီအနီကဒ်က ထိုက်တန်ပါတယ်။ ဂျရူးဟာ သူ့ကိုယ်သူ မထိန်းချုပ်နိုင်ပါဘူး။ ဒါ့ကြောင့်လည်း တိုက်ရိုက်အနီကဒ်ထိခဲ့တာပါ။ တကယ်တော့ ဒါဟာ အသင်းရဲ့ အရွေ့ကို လုံးဝ ပြောင်းလဲပစ်လိုက်တာပါပဲ´ ဟု ပွဲအပြီးတွင် ၀င်းဂါးက BT Sport သို့ ပြောကြားခဲ့သည်။

ထို့ပြင် ဂျရူးမှာ ၎င်း၏ အမှားကို တာဝန်ယူသူတစ်ဦးဖြစ်ကြောင်း၊ ယနေ့တွင် အမှားကြီးတစ်ခုကို ကျူးလွန်ခဲ့ခြင်းဖြစ်သည်ကို ၎င်းကိုယ်တိုင်လည်း သိရှိကြောင်း ထည့်သွင်းပြောကြားခဲ့သည်။

Ref : goal.com