ကားမောင်းနေစဉ် ထ ‘က’ သည့် တူရကီ ဘတ်စ်ကား ယာဉ်မောင်းတစ်ဦး အရေးယူခံရ

ဒီဇင်ဘာ ၃၁၊ ၂၀၁၄
M-Media

– အစ္စတန်ဘူလ်ရှိ အန္တရာယ်များလှသည့် အဝေးပြေးလမ်းတွင် ကားသွားနေခိုက် ယာဉ်မောင်းခုံမှထကာ သီချင်းဖွင့်၍ ကခဲ့သည့် ဘတ်စ်ကား ယာဉ်မောင်းတစ်ဦးကို အရေးယူခဲ့သည်ဟု တူရကီ မီဒီယာများက ယမန်နေ့တွင် ဖော်ပြခဲ့သည်။

အရေးယူခံရသူမှာ အသက် ၃၀ ကျော်အရွယ်ရှိသည့် ကန်ဒီမီရ်ဆိုသူဖြစ်ပြီး ဒဏ်ငွေ တူရကီလီရာ ၁၆၀ (ကန်ဒေါ်လာ ၈၀) ပေးဆောင်ခဲ့ရကာ ယာဉ်မောင်းလိုင်စင်လည်း အသိမ်းခံခဲ့ရသည်။

ကန်ဒီမီရ်မှာ ဆူလ်တန်ဘေလီခရိုင်ရှိ အဝေးပြေးလမ်းမပေါ်၌ ကားမောင်းနေစဉ် ၎င်း၏ ထိုင်ခုံမှထ၍ ပင်လယ်နက်ဒေသမှ နာမည်ကျော် အကသီချင်းဖြစ်သော horon သီချင်းဖြင့် ကခဲ့ပြီး ခရီးသည်များကလည်း ပါဝင်ခဲ့ကြကာ ၎င်းအား ချီးကျူးသြဘာ ပေးခဲ့ကြသည်။

ထို့နောက် ၎င်း၏ ယာဉ်မောင်းထိုင်ခုံသို့ ပြန်လည်ရောက်ရှိခဲ့သော်လည်း စတီယာတိုင်အား ကိုယ်တွယ်ခြင်းမရှိဘဲ သီချင်း၏ စည်းချက်အလိုက် လက်များလှုပ်ယမ်းကာ ကပြခဲ့သည်။

ထိုအဖြစ်အပျက်အား ခရီးသည်တစ်ဦးက ဗီဒီယိုမှတ်တမ်းတင်ထားပြီး ဆိုရှယ် စာမျက်နှာတွင် လွှင့်တင်ခဲ့သောကြာင့် တာဝန်ရှိသူများက စုံစမ်းစစ်ဆေးကာ တာဝန်ပေါ့လျော့သည့် ကန်ဒီမီရ်အား အရေးယူခဲ့ခြင်းဖြစ်သည်။

မီနီဘစ်မောင်းသည့် သက်တမ်း ၁၀ နှစ်ကျော်ရှိသည့် ကန်ဒီမီရ်မှာ ၎င်း၏ သက်တမ်းတစ်လျှောက်တွင် ယာဉ်စည်းကမ်းချိုးဖောက်မှုပေါင်း ၃၂ ကြိမ် ရှိခဲ့သည်။

`ကျွန်တော်မှားခဲ့ပါတယ်။ အားလုံးကိုလည်း တောင်းပန်ပါတယ်။ ဒါမျိုး ကျွန်တော် ထပ်မလုပ်တော့ပါဘူး။ အဲဒီအချိန်တုန်းက လမ်းမှာ ကားရှင်းနေပါတယ်။ ဒီလိုမျိုး ကျွန်တော် ပထမဆုံးလုပ်ခဲ့တာပါ´ ဟု ကန်ဒီမီရ်က ပြန်လည်တောင်းပန်ခဲ့သည်။

Ref : alarabiya