အီဘိုလာ ကင်းစင်ရေး ၂၀၁၅ နှစ်ကုန်ပိုင်းမှ ဖြစ်နိုင်မည်

ဇန်န၀ါရီ ၃၊ ၂၀၁၅
M-Media

– အာဖရိကအနောက်ပိုင်း နိုင်ငံများတွင် ကူးစက်ပြန့်နှံ့နေကာ လူတစ်သောင်းနီးပါး သေဆုံးခဲ့သည့် အီဘိုလာကပ်ရောဂါမှာ ၂၀၁၅ ခုနှစ် နှစ်ကုန်ပိုင်းမှသာ အဆုံး သတ်လိမ့်မည်ဟု ကုလသမဂ္ဂ အီဘိုလာတိုက်ဖျက်ရေးအဖွဲ့ အကြီးအကဲ အန်ထော်နီ ဘန်ဘူရီက ပြောကြားလိုက်သည်။

ဇန်န၀ါရီ ၂ ရက်နေ့က ကုလသမဂ္ဂ အီဘိုလာအရေးပေါ်တုံ့ပြန်ရေးအဖွဲ့ NUMEER အခြေစိုက်ရာ အက္ကရာတွင် ပြုလုပ်ခဲ့သည့် သတင်းစာရှင်းလင်းပွဲတွင် အန်ထော်နီက ထိုကဲ့သို့ ပြောကြားခဲ့ခြင်းဖြစ်ပြီး အဆိုပါရောဂါ အဆုံးသတ်ရေး အတွက် လပေါင်းများစွာ ခက်ခက်ခဲခဲ လုပ်ဆောင်ရမည်ဟုလည်း ဆိုသည်။

`ဒီပြဿနာ အဆုံးသတ်ဖို့အတွက် မနီးစပ်သေးပါဘူး။ အဖွဲ့ဖွဲ့ပြီးကတည်းက ရက်ပေါင်း ၉၀ အတွင်းမှာ ကျွန်တော်တို့ အောင်မြင်စွာ ဆောင်ရွက်နိုင် ခဲ့ပေမယ့် ရှေ့ဆက်သွားဖို့ ရှည်လျားခက်ခဲတဲ့ ခရီး ရှိနေပါတယ်´ ဟု အန်ထော်နီက သတင်းထောက်များအား ပြောကြားခဲ့သည်။

၂၀၁၄ ခုနှစ် နှစ်ဆန်းပိုင်းက ဂီနီနိုင်ငံတွင် စတင်တွေ့ခဲ့ရသည့် အဆိုပါ အီဘိုလာဗိုင်းရပ်စ်ပိုး ပြန့်နှံ့မှုအတွက် နိုင်ငံတကာက အသိုင်းအ၀ိုင်းက လုံလောက်သော ဆောင်ရွက်မှုများ မရှိဟုဝေဖန်ပြစ်တင်ခံခဲ့ရပြီးနောက် ကုလအထွေထွေအတွင်းရေးမှူးချုပ် ဘန်ကီမွန်က NUMEER အဖွဲ့ကို ပြီးခဲ့သည့်နှစ် စက်တင်ဘာလက စတင်ဖွဲ့စည်းခဲ့ခြင်းဖြစ်သည်။

ဂီနီ၊ ဆီရာလီယိုနီ၊ လိုက်ဘေးရီးယားအပါအ၀င် အနောက်အာဖရိက နိုင်ငံ ၆ နိုင်ငံ၌ ပြန့်ပွားနေသာ အီဘိုလာဗိုင်းရပ်စ်ပိုး ကူးစက်နေသူမှာ ယခုလက်ရှိတွင် ၂၀၀၀၀ ခန့်ရှိပြီး သေဆုံးသူမှာ ၈ ထောင်နီးပါး ရှိနေသည်။

Ref : aljazeera