ပြင်သစ်မဂ္ဂဇင်းတိုက် တိုက်ခိုက်မှု သံသယရှိသူနှစ်ဦး၏ ဓာတ်ပုံများထုတ်ပြန်

ဇန်န၀ါရီ ၈၊ ၂၀၁၅
M-Media

– ယမန်နေ့က ပြင်သစ်နိုင်ငံ ပဲရစ်မြို့မှာရှိတဲ့ Carlied Hebdo မဂ္ဂဇင်းတိုက်ကို သေနတ်နဲ့ ၀င်ပစ်မှုမှာ ပါဝင်ခဲ့တယ်လို့ ယူဆရသူ ညီအကိုနှစ်ဦးရဲ့ ဓာတ်ပုံတွေကို ပြင်သစ်ရဲတပ်ဖွဲ့ ထုတ်ပြန်လိုက်ပါတယ်။

အဲဒီသူတွေကတော့ အသက် ၃၂နှစ်အရွယ် စအီးဒ် ကော်ချီနဲ့ အသက် ၃၄ နှစ်အရွယ် ချရစ် ကော်ချီတို့ ဖြစ်ပါတယ်။ သူတို့နဲ့အတူ အိမ်ရာမဲ့လူငယ်တစ်ဦးလို့ ယူဆရတဲ့ ဆယ်ကျော်သက် လူငယ်တစ်ဦးရဲ့ ဓာတ်ပုံကိုလည်း ထုတ်ပြန်ခဲ့ပါ တယ်။

တမန်တော်မိုဟာမက်ကို လှောင်ပြောင်သရော်တဲ့ ကာတွန်းတွေကို ရေးသား ဖော်ပြလေ့ရှိတဲ့ ဒီမဂ္ဂဇင်းတိုက်မှာ အစည်းအဝေး လုပ်နေစဉ်အတွင်း သေနတ် သမား အနည်းဆုံး ၂ ယောက်က မဂ္ဂဇင်းတိုက်ထဲကိုဝင်ပြီး တိုက်ခိုက်ရေး ရိုင်ဖယ်တွေနဲ့ ပစ်ခတ်သွားခဲ့တာပါ။

ဒီလိုပစ်ခတ်မှုကြောင့် အယ်ဒီတာချုပ်နဲ့ ရဲတပ်ဖွဲ့ဝင် ၂ ဦးအပါအ၀င် လူ ၁၂ ယောက်လောက် သေဆုံးခဲ့ပြီး ၇ ယောက်လောက် ဒဏ်ရာရသွားခဲ့ပါတယ်။ သေနတ်မားတွေကတော့ ရဲတပ်ဖွဲ့နဲ့ အပြန်အလှန်ပစ်ခတ်ပြီး ထွက်ပြေးလွတ်မြောက်သွားခဲ့ပါတယ်။

ပြင်သစ်မွတ်စလင်ခေါင်းဆောင်တွေက ဒီလုပ်ရပ်ကို ပြင်းပြင်းထန်ထန်ရှုတ်ချခဲ့ပြီး မီဒီယာ လွတ်လပ်ခွင့်နဲ့ ဒီမိုကရေစီကို တိုက်ခိုက်တာ ဖြစ်တယ်လို့ ပြောကြားခဲ့ပါတယ်။

အစ္စလာမ်ကမ္ဘာရဲ့အမြင့်ဆုံးတက္ကသိုလ်ဖြစ်တဲ့ အလ်-အဇ်ဟာရ် တက္ကသိုလ် ကတော့ အဲဒီတိုက်ခိုက်မှုဟာ ရာဇ၀တ်မှုသာဖြစ်ပြီး အစ္စလာမ်သာသနာက အကြမ်းဖက်မှုအားလုံးကို ရှုတ်ချကြောင်း ကြေညာချက်ထုတ်ခဲ့ပါတယ်။

အာရပ်နိုင်ငံများအဖွဲ့ချုပ်ကလည်း အဲဒီလုပ်ရပ်ကို ရှုတ်ချခဲ့ပြီး ကမ္ဘာတစ်ဝှမ်းက မြို့ကြီးတွေမှာလည်း ဒီလုပ်ရပ်ဟာ လွတ်လပ်စွာ ပြောဆိုဖော်ပြခွင့်ကို တိုက်ခိုက်တာဖြစ်တယ်လို့ဆိုကာ ဆန္ဒပြမှုတွေ ပြုလုပ်နေပါတယ်။

ပဲရစ်မှာ လုံခြုံရေးအဆင့်ကို အမြင့်ဆုံး မြှင့်တင်ထားပြီး သေနတ်သမားတွေကို ပိုက်စိတ်တိုက် ရှာဖွေမှုတွေလည်း ပြုလုပ်နေပါတယ်။

Carlied Hebdo မဂ္ဂဇင်းဟာ အစ္စလာမ်သာသနာနဲ့ တမန်တော် မိုဟာမက်ကို စော်ကားလှောင်ပြောင်တဲ့ ကာတွန်းတွေကို ဆန့်ကျင်မှုတွေ ရှိနေတဲ့ကြားကပဲ အကြိမ်ကြိမ် ဖော်ပြခဲ့တဲ့ မဂ္ဂဇင်းတစ်စောင် ဖြစ်ပါတယ်။

ဒီလိုဖော်ပြမှုတွေအတွက် ပြင်သစ်က မွတ်စလင်တွေနဲ့  မွတ်စလင်မဟုတ်သူတွေ က ဆန့်ကျင်ခဲ့ကြပေမယ့်လည်း တရားဥပဒေအရ အရေးယူနိုင်ခြင်း မရှိခဲ့ပါဘူး။

Ref : aljazeera