ပြင်သစ်ချီတက်ပွဲ နေတန်ယာဟုတက်ရောက်မှု တူရကီသမ္မတ ဝေဖန်

ဇန်န၀ါရီ ၁၃၊ ၂၀၁၅
M-Media

– ပါက်လက်စတိုင်းပြည်သူ ၂၀၀၀ ကျော် သေဆုံးခဲ့သည့် ဂါဇာအား ကျူးကျော် စစ်ပွဲကို ပြုလုပ်ခဲ့သော အစ္စရေးဝန်ကြီးချုပ် နေတန်ယာဟု ပြင်သစ်ရှိ ချီတက်ပွဲကို တက်ရောက်ခဲ့ခြင်းအတွက် တူရကီသမ္မတ အာဒိုဂန်က ရှုတ်ချလိုက်သည်။

ပါလက်စတိုင်းသမ္မတ မဟ်မူးဒ်အဘတ်စ်နှင့် အန်ကာရာတွင် ယမန်နေ့က ပြုလုပ်သည့် သတင်းစာရှင်းလင်းပွဲတွင် အာဒိုဂန်က ထိုကဲ့သို့ ရှုတ်ချခဲ့ခြင်းဖြစ်ပြီး နေတန်ယာဟုအနေဖြင့် ထိုပွဲသို့ တက်ရောက်ရဲသည်ကို နားမလည်နိုင်ဖြစ်ရကြောင်း ၎င်းက ပြောကြားခဲ့သည်။ ထို့ပြင် ဂါဇာတွင် သေဆုံးခဲ့ရသည့် ကလေးငယ်များနှင့် အမျိုးသမီးများအတွက် တာဝန်ယူရန်လည်း နေတန်ယာဟုကို တိုက်တွန်းခဲ့သည်။

တနင်္ဂနွေနေ့က ပဲရစ်၌ ပြုလုပ်ခဲ့သော အကြမ်းဖက်ဆန့်ကျင်ရေး ချီတက်ပွဲသို့ အာဒိုဂန်အပါအ၀င် အဘတ်စ်လည်း တက်ရောက်ခဲ့သည်။ သို့သော်လည်း အာဒိုဂန်ကမူ နေတန်ယာဟုမှာ ထိုချီတက်ပွဲသို့ တက်ရောက်ခွင့်မရှိဟု ဆိုသည်။

`ဂါဇာမှာ လူ ၂၅၀၀ လောက်ကို အစုလိုက်အပြုံလိုက် သတ်ခဲ့တဲ့ အကြမ်းဖက်တိုင်းပြည်က လူတစ်ယောက် လက်ဝှေ့ယမ်းပြနေတာ ဘယ်လိုကြည့်လို့ရမလဲ´ ဟု အာဒိုဂန်က ဝေဖန်ပြောကြားခဲ့သည်။

အာဒိုဂန်မှာ အစ္စရေးနှင့်ပတ်သက်၍ မကြာခဏ ဝေဖန်ပြောကြားမှုများရှိခဲ့ပြီး ပြီးခဲ့သည့်နှစ် ဇူလိုင်လကလည်း အစ္စရေး၏ ရက်စက် ကြမ်းကြုတ်မှုများမှာ ဟစ်တလာ၏ ရက်စက်ကြမ်းကြုတ်မှုများထက်ကို သာလွန်နေပြီဟု ပြောကြားခဲ့သည်။

`အစ္စရေးရဲ့ ဥပဒေပလုပ်ရပ်တွေကို တူရကီနိုင်ငံက ဆက်လက်တွန်းလှန်သွားမှာ ပါ´ ဟု အာဒိုဂန်က အဆိုပါ သတင်းစာရှင်းလင်းပွဲတွင် ထည့်သွင်းပြောကြားခဲ့သည်။

ထို့ပြင် ဥရောပအတွင်း ပြန့်နှံ့နေသည့် မွတ်စလင်ဆန့်ကျင်ရေးလှုပ်ရှားမှုများကို ရှုတ်ချရန် ပျက်ကွက်နေကြသည့် ဥရောပ ခေါင်းဆောင်များမှာ ပဲရစ်တိုက်ခိုက်မှု တွင်မှ သူတော်ကောင်းယောင် ဆောင်ပြနေသည်ဟု အာဒိုဂန်က ထပ်လောင်းပြောကြားခဲ့သည်။

Ref : alarabiya