သမိုင်းတစ်လျှောက် အမြင့်ဆုံး ကာကွယ်ရေးအသုံးစားရိတ် ဂျပန်အတည်ပြု

ဇန်န၀ါရီ ၁၄၊ ၂၀၁၅
M-Media

– ကင်းထောက်လေယာဉ်များနှင့် F-35 တိုက်ခိုက်ရေး တိုက်လေယာဉ်များ ၀ယ်ယူခြင်းအပါအ၀င် နိုင်ငံ၏ စစ်အင်အား တိုးချဲ့ရေး ဆောင်ရွက်ရန် အစီအစဉ်အဖြစ် သမိုင်းတစ်လျှောက် စံချိန်တင် ကာကွယ်ရေးအသုံးစားရိတ်ကို ဂျပန်နိုင်ငံက အတည်ပြုလိုက်သည်ဟု သိရသည်။

ဝန်ကြီးချုပ် ရှင်ဇိုအာဘေး၏ ကတ်ဘိနတ်က လာမည့်ဧပြီလမှ စတင်မည့် ဘဏ္ဍာရေးနှစ်အတွက် ကာကွယ်ရေးအသုံးစားရိတ်အဖြစ် ကန်ဒေါ်လာ ၄၂ ဘီလီယံကို ယနေ့တွင် အတည်ပြုခဲ့ခြင်း ဖြစ်သည်။ ထိုပမာဏမှာ ပြီးခဲ့သည့် နှစ်ကထက် ၂ ရာခိုင်နှုန်း မြင့်တက်လာခဲ့ခြင်းဖြစ်ပြီး သမိုင်းတစ်လျှောက် အမြင့်ဆုံးပမာဏလည်း ဖြစ်သည်။

ဂျပန်နိုင်ငံမှာ ယခင်က ကာကွယ်ရေးအသုံးစားရိတ်ကို ကန့်သတ်ထားခဲ့ပြီး ဒီဇင်ဘာ ၂၀၁၂ ရှင်ဇိုအာဘေး တက်လာချိန်မှစ၍ အဆိုပါကန့်သတ်မှုကို ရုပ်သိမ်းခဲ့ကာ သုံးနှစ်ဆက်တိုက် ကာကွယ်ရေးအသုံးစားရိတ်ကို တိုးမြှင့်ခဲ့ခြင်းဖြစ်သည်။

အဆိုပါ ကာကွယ်ရေးအသုံးစားရိတ်တွင် P-1 ကင်းထောက်လေယာဉ်များ၊ F-35 တိုက်လေယာဉ်များနှင့် အခြား စစ်သုံးယာဉ်များ တိုးမြှင့်ရန် ပါဝင်မည်ဖြစ်ပြီး ၂၀၁၉ ခုနှစ်တွင် တပ်ဖြန့်ချထားနိုင်ရန် စီစဉ်ထားသည့် Global Hawk ဒရုန်းလေယာဉ်၏ အစိတ်အပိုင်းများ ၀ယ်ယူခြင်းလည်း ပါဝင်မည်ဖြစ်သည်။

တရုတ်နှင့် ဂျပန်တို့မှာ အရှေ့တရုတ်ပင်လယ်ရှိ ကျွန်းစုတစ်ခု ပိုင်ဆိုင်မှုအတွက် အချင်းများနေကြပြီး ထိုအချက်က ဂျပန်၏ ကာကွယ်ရေးအင်အားတိုးမြှင့်ရန် ဆောင်ရွက်ရသည့် အကြောင်းအရင်းတစ်ရပ်လည်း ဖြစ်သည်။

Ref : aljazeera