အိမ်ဖြူတော်ဝင်း အတွင်းသို့ ဒရုန်းလေယာဉ်တစ်စီး ပျက်ကျ

ဇန်န၀ါရီ ၂၇၊ ၂၀၁၅
M-Media

– အမေရိကန်ပြည်ထောင်စု သမ္မတရုံးထိုင်ရာ အိမ်ဖြူတော်ဝင်းအတွင်းသို့ တနင်္လာနေ့နံနက် စောစောပိုင်းက ဒရုန်းလေယာဉ်တစ်စီး ပျက်ကျခဲ့ပြီး အဆိုပါ ဒရုန်းမှာ အပျော်တမ်းကစားသည့် ဒရုန်းလေယာဉ်ဟု သိရသည်။

ပျက်ကျပြီး ၆ နာရီအကြာတွင် ၀ါရှင်တန်မှ အဆိုပါဒရုန်း၏ ပိုင်ရှင်ဆိုသူက ထောက်လှမ်းရေးသို့ တယ်လီဖုန်းဖြင့် ဆက်သွယ်အကြောင်းကြားခဲ့ပြီး အပျော်တမ်း အသုံးပြုရာမှ ပျက်ကျခဲ့ခြင်းဖြစ်သည်ဟု ပြောကြားခဲ့ကြောင်း ထောက်လှမ်းရေးဌာနမှ သတင်းထုတ်ပြန်ခဲ့သည်။

ပန်ကာလေးလုံးတပ် အဆိုပါ ဒရုန်းလေယာဉ်မှာ တနင်္လာနေ့နံနက် ၃ နာရီ ၈ မိနစ်တွင် အိမ်ဖြူတော်ဝင်းအတွင်း အလွန်နိမ့်စွာ ပျံသန်းလာပြီးနောက် ၀င်း၏ တောင်ဘက်တွင် ပျက်ကျခဲ့ခြင်းဖြစ်သည်။

ပျက်ကျခဲ့ပြီးနောက် လုံခြုံရးများက အိမ်ဖြူတော်အား လုံးဝ ပိတ်ပစ်ခဲ့ပြီး အဆိုပါဒရုန်းကို စစ်ဆေးပြီးနောက်မှ ပြန်လည်ဖွင့်လှစ်ခဲ့သည်။ အမေရိကန်သမ္မတ ဘာရက်အိုဘားမားနှင့် သမ္မတကတော် မီရှဲတို့မှာ အိန္ဒိယသုိ့ ရောက်နေသော်လည်း ၎င်းတို့၏ သမီးနှစ်ယောက်မှာ အိမ်ဖြူတော်တွင် ရှိနေသည်။

အမေရိကန်ထောက်လှမ်ရေးမှ ထုတ်ပြန်သော အစီအရင်ခံစာတွင် အဆိုပါဒရုန်းအား အပြင်တွင် ၀ယ်ယူ၍ရရှိနိုင်သည်ဟု ဖော်ပြထားသည်။

`ချက်ခြင်း သတိပေးမှုတွေပြုလုပ်ခဲ့ပြီး အဲဒီပစ္စည်းကို စစ်ဆေးကာ ရှင်းရှင်းလင်းလင်း ဖြစ်သွားတဲ့အထိ အိမ်ဖြူတော်ကို ပိတ်ပစ်ခဲ့ပါတယ်။ အပြင်မှာဝယ်လို့ရတဲ့ ဒီပစ္စည်းရဲ့ အကြောင်း၊ ဒီဟာကို လွှတ်ရတဲ့အကြောင်းအရင်းနဲ့ သံသယရှိသူကို ဖော်ထုတ်နိုင်ဖို့ စုံစမ်းစစ်ဆေးမှုကို ပြုလုပ်နေပါတယ်´ ဟု အဆိုပါ ကြေညာချက်တွင် ထည့်သွင်းဖော်ပြထားသည်။

နောက်ပိုင်းတွင် ထောက်လှမ်းရေးမှ သတင်းထုတ်ပြန်ရာ၌ အဆိုပါဒရုန်းအား မောင်းနှင်ခဲ့သူက မိမိတို့ထံ ဆက်သွယ်ခဲ့ကြောင်း၊ မိမိတို့က အင်တာဗျူးခဲ့ပြီး ကာယကံရှင်ကလည်း အပြည့်အ၀ ပူးပေါင်းဆောင်ရွက်နေကြောင်း ကနဦးတွေ့ရှိချက်များအရ အပန်းဖြေမှုအဖြစ် အသုံးပြုနေစဉ် အဆိုပါဒရုန်းမှာ ပျက်ကျခဲ့ခြင်းဟု ကောက်ချက်ချ၍ ရကြောင်း၊ စသည်တို့ ပါဝင်ခဲ့သည်။

နယူးဒေလီသို့ ရောက်ရှိနေသည့် အိမ်ဖြူတော်သတင်းထုတ်ပြန်ရေးအကြီးအကဲ ဂျွန်အားန်နက်စ်ကမူ အဆိုပါ ဒရုန်းလေယာဉ်မှာ အိမ်ဖြူတော်အဆောက်အဦးအား ခြိမ်းခြောက်မှုမရှိဟု ပြောကြားခဲ့သည်။