ဆွာရက်ဇ်အား ကူညီရန် မိမိမှာ သင့်တော်သူမဟုတ်ဟု နေးမာပြောကြား

ဇန်န၀ါရီ ၂၇၊ ၂၀၁၅
M-Media

– အသင်းတွင် ရုန်းကန်နေရသည့် တိုက်စစ်မှူးဆွာရက်ဇ်အား ကူညီရန် မိမိမှာ သင့်တော်သူမဟုတ်ဟု ဘာစီလိုနာအသင်း၏ ဘရာဇီးလ်တိုက်စစ်မှူး နေးမာက ပြောကြားလိုက်သည်။

ဆွာရက်ဇ်မှာ လီးဗာပူးလ်မှ ဘာစီလိုနာသို့ ပြောင်းရွှေ့ပြီးကတည်းက အကောင်းဆုံးခြေစွမ်းကို ပြသနိုင်ခြင်း မရှိသေးဘဲ ပွဲထွက်ကစားသမားအဖြစ်လည်း ပုံမှန်ရွေးချယ်ခြင်း မခံရပေ။

၂၀၁၃-၁၄ ဘောလုံးရာသီ ဘာစီလိုနာသို့ စရောက်စဉ်က ထိုကဲ့သို့ပင် ရုန်းကန်ခဲ့ရသည့် နေးမာကမူ ဆွာရက်ဇ်၏ လက်ရှိအခြေအနေအား မည်ကဲ့သို့ ကျော်ဖြတ်ရမည်ကို ပြောပြရန် မိမိမှာ သင့်တော်သူမဟုတ်ဟု ဆိုသည်။

`ကျွန်တော်က ဆွာရက်ဇ်ကို အကြံပေးရမှာလား။ သူက ကျွန်တော့်ထက်အသက်ကြီးပြီး ကျွန်တော့်ထက်လည်း အတွေ့အကြုံပိုများသူပါ။ ဆွာရက်ဇ်ကသာ ကျွန်တော့်ကို အကြံပေးရမှာပါ။ ဘာပဲဖြစ်ဖြစ် ဆွာရက်ဇ်က သွင်းဂိုးတွေ၊ ပေးပို့မှုတွေအားလုံးနဲ့ အသင်းကို ကူညီပါတယ်။ သူ့လိုလူမျိုးနဲ့ တစ်သင်းထဲမှာကစားရတာ ဂုဏ်ယူစရာပါပဲ´ ဟု နေးမာက သတင်းထောက်များအား ပြောကြားခဲ့သည်။

ဘာစီလိုနာအသင်းမှာ ကမ္ဘာပေါ်တွင် တိုက်စစ်အားအသန်ဆုံး အသင်းဖြစ်သည်ဟု ဘာစီလိုနာ ဥက္ကဌ ဘာတိုမြူ၏ ပြောကြားမှုနှင့် ပတ်သက်၍ နေးမာက မိမိအနေနှင့် မပြောတတ်ကြောင်း သို့သော်လည်း မိမိတို့မှာ ပြိုင်ဘက်နောက်တန်းအများအပေါ် ဒုက္ခပေးနိုင်ကြောင်း ထပ်လောင်းပြောကြားခဲ့သည်။

နေးမာမှာ ယခုနှစ်အတွင်း ဘာကာအတွက် ပြိုင်ပွဲပေါင်းစုံတွင် ၂၄ ပွဲကစားထားပြီး ၁၉ ဂိုး သွင်းယူပေးထားနိုင်သည်။

Ref: goal.com