ချယ်ဆီးတိုက်စစ်မှူး ဒီယေဂိုကော်စတာအား FA က တရားစွဲ

ဇန်န၀ါရီ ၂၉၊ ၂၀၁၅
M-Media

– အင်္ဂါနေ့က ကစားခဲ့သည့် လီဗာပူးလ်အသင်းနှင့် လိဂ်ဖလား ဒုတိအကျော့ပွဲစဉ်တွင် လီဗာပူးလ်နောက်ခံလူ အမ်ရီကန်၏ ခြေထောက်ကို တက်နင်းခဲ့သည့် ချယ်ဆီးတိုက်စစ်မှူး ဒီယေဂိုကော်စတာအား FA က တရားစွဲဆိုလိုက်သည်ဟု သိရသည်။

စတမ်းဖို့ဒ်ဘရစ်ခ်ျတွင် ကစားခဲ့သည့် အဆိုပါပွဲ၏ ပွဲအစ ၁၂ မိနစ်မှာပင် ဘေးစည်းနား၌ အမ်ရီကန်က ကော်စတာထံမှာ ဘောလုံးရယူရန် ကြိုးစားရာတွင် ကော်စတာက သိသိသာသာပင် ခြေထောက်အား တက်နင်းခဲ့ခြင်းဖြစ်သည်။

သို့သော်လည်း ကွင်းလယ်ဒိုင်က ထိုအဖြစ်အပျက်အား မမြင်ခဲ့သောကြောင့် ပွဲအတွင်း အရေးယူမှုများ မပြုလုပ်နိုင်ခဲ့သော်လည်း FA က ဗီဒီယိုကို ပြန်လည်ကြည့်ရှုပြီးနောက်ပိုင်း ထိုကဲ့သို့ အရေးယူရန် ဆုံးဖြတ်ခဲ့ခြင်းဖြစ်သည်။

`ဒီယေဂိုကော်စတာရဲ့ ကြမ်းတမ်းတဲ့ အပြုအမူအတွက် FA က တရားစွဲဆိုခဲ့ပါတယ်။ ကွင်းအတွင်းမှာဖြစ်ခဲ့တဲ့ ဒီအဖြစ်အပျက်ကို တာဝန်ရှိသူတွေက မမြင်ခဲ့ပေမယ့် ဗီဒီယိုမှာ တွေ့ခဲ့ရပါတယ်။ ဒီတရားစွဲဆိုမှုဟာ ယမန်နေ့ (အင်္ဂါနေ့)ညက စတမ်းဖို့ဘရစ်ခ်ျမှာ ကစားခဲ့တဲ့ လိဂ်ဖလား ဆီးမီးဖိုင်နယ် ဒုတိယအကျော့ ပထမပိုင်း ၁၂ မိနစ်မှာ ချယ်ဆီးရှေ့တန်းကစားသမားနဲ့ လီဗာပူးလ်က အမ်ရီကန်တို့အကြား ဖြစ်ပွားတဲ့ အဖြစ်အပျက်နဲ့ ဆက်စပ်နေပါတယ်´ ဟု FA ၏ ကြေညာချက်တွင် ဖော်ပြထားသည်။

ဒီယေဂိုကော်စတာအနေဖြင့် ထိုတရားစွဲဆိုမှုကို အင်္ဂလန်စံတော်ချိန် ဇန်န၀ါရီ ၂၉ ရက် ညနေ ၆ နာရီ နောက်ဆုံးထား၍ တုံ့ပြန်ရမည်ဖြစ်သည်။

ကော်စတာမှာ ထိုပွဲ၏ဒုတိယပိုင်းတွင် လီဗာပူးလ်နောက်ခံလူ စကာတဲလ်ကိုလည်း ထိုကဲ့သို့ ကျူးလွန်ခဲ့ပြီး ထိုဖြစ်ရပ်ကိုလည်း ဒိုင်လူကြီးက မမြင်ခဲ့ပေ။ FA ကမူ ထိုကိစ္စနှင့်ပတ်သက်၍ ထည့်သွင်းပြောကြားခဲ့ခြင်းမရှိချေ။

Ref: goal.com