နယ်သာလန်ရှိ ရုပ်သံဌာနတစ်ခုကို ဆယ်ကျော်သက်လူငယ်တစ်ဦး သေနတ်အတုဖြင့် ၀င်ရောက်စီးနင်း

ဇန်န၀ါရီ ၃၀၊ ၂၀၁၅
M-Media

– နယ်သာလန်နိုင်ငံ အမ်စတာဒမ်ရှိ နိုင်ငံပိုင်ရုပ်သံဌာန NOS သို့ ဆယ်ကျော်သက် လူငယ်တစ်ဦးက သေနတ်အတုဖြင့် ၀င်ရောက်ခဲ့စီးနင်းပြီး အသံလွှင့်ခွင့်ရရန် ကြိုးပမ်းခဲ့ခြင်းကြောင့် ရဲတပ်ဖွဲ့က ဖမ်းဆီးထိန်းသိမ်းခဲ့သည်ဟု သိရသည်။

ယမန်နေ့ညက ဖြစ်ပွားခဲ့သည့် အဆိုပါအဖြစ်အပျက်တွင် အသက် ၁၉ နှစ်အရွယ် ၀တ်စုံပြည့်ဝတ်ထားသော လူငယ်တစ်ဦးမှာ ပစ္စတိုတစ်လက်ကိုင်ကာ လုံခြုံရေးအား မိမိမှာ ထောက်လှမ်းရေးအဖွဲ့ဝင်ဖြစ်သည်ဟုပြောကာ အဆောက်အဦးအတွင်းသို့ ၀င်ရောက်လာခဲ့ခြင်းဖြစ်သည်။

ထို့နောက် ရဲတပ်ဖွဲ့မှ လာရောက်စီးနင်း၍ ထိုလူငယ်အား ဖမ်းဆီးခဲ့ပြီး လူငယ်ကလည်း မည်သည့်ခုခံမှုမှ ပြုလုပ်ခဲ့ခြင်းမရှိချေ။ ထိုအဖြစ်အပျက်အတွင်း မည်သူတစ်ဦးတစ်ယောက်မှ ထိခိုက်ဒဏ်ရာရခြင်းမရှိဘဲ ထိုလူငယ်ကိုင်ဆောင်လာသည့် သေနတ်မှာ အတုဖြစ်သည်ဟု ရဲတပ်ဖွဲ့က နောက်ပိုင်းတွင် ပြောကြားခဲ့သည်။

ထိုအဖြစ်အပျက်ကြောင့် NOS ၏ ထုတ်လွှင့်မှုကို ၁ နာရီကျော်ကြာ ရပ်နားခဲ့ရပြီး နောက်ပိုင်း ပြန်လည်ထုတ်လွှင့်သည့်အခါ အဆိုပါလူငယ်၏ပုံကို ပြသခဲ့သည်။

NOS အဆောက်အဦးအတွင်းသို့ ၀င်ရောက်ပြီးနောက် ထိုလူငယ်က အသံလွှင့်ခွင့်တောင်းခဲ့ပြီး မလိုက်လျောပါက နယ်သာလန်တစ်ဝှမ်း ထောင်ထားသည့်ဗုံးများကို ဖောက်ပစ်မည်ဟု ခြိမ်းခြောက်ခဲ့ကြောင်း အဆိုပါလူငယ်မှာ ရာဇ၀တ်မှုကျူးလွန်ခြင်းမရှိဘဲ မည်သည့်အတွက်ကြောင့် ထိုကဲ့သို့ ပြုလုပ်ခြင်းဖြစ်သည်ကို စုံစမ်းစစ်ဆေးလျက်ရှိနေကြောင်း ရဲတပ်ဖွဲ့က သတင်းထုတ်ပြန်ခဲ့သည်။

တရားသူကြီး ဂျိုဟန်ဘက်ကမူ အဆိုပါလူငယ်မှာ ဟေ့ဂ်မြို့အနီး ပစ်ဂ်ျနက်ကာမြို့မှ ဖြစ်ပြီး ၎င်း၏ အမည်ကိုမူ ထုတ်ဖော်ပြောဆိုခဲ့ခြင်း မရှိချေ။ ထို့ပြင် ၎င်းအား ခြိမ်းခြောက်မှု၊ လက်နက်ကိုင်ဆောင်မှုနှင့် ဓားစာခံများ ဖမ်းဆီးမှုတို့ဖြင့် ထိန်းသိမ်းထားသည်ဟု ထည့်သွင်းပြောကြားခဲ့သည်။

ထို့အဖြစ်အပျက်ကြောင့် နောက်ပိုင်တွင် NOS အဆောက်အဦးတစ်ဝိုက် လုံခြုံရေးများကို တိုးမြှင့်ခဲ့သည်။

Ref:aljazeera