မက်ဆီ၏ စွမ်းဆောင်မှုကို နေးမာ မကျော်နိုင်ဟု ဘာကာနည်းပြဆို

ဖဖော်ဝါရီ ၂၊ ၂၀၁၅
M-Media

– ဘာစီလိုနာအသင်းတွင် မက်ဆီရရှိသည့် အောင်မြင်မှုများကို ရရှိရန်အတွက် နေးမာမှာ ရုန်းကန်ရလိမ့်မည်ဟု ဘာကာနည်းပြ လူးဝစ်အန်းရစ်က ပြောကြားလိုက်သည်။

အသက် ၂၂ နှစ်အရွယ်ရှိပြီဖြစ်သည့် ဘရာဇီးလ်အသင်းခေါင်းဆောင် နေးမာမှာ ယခုနှစ်ဘောလုံးရာသီတွင် ဘာစီလိုနာအတွက် ပြိုင်ပွဲအားလုံး၌ ၂၁ ဂိုး သွင်းပေးထားနိုင်သည်။ ၎င်း၏ ထိုခြေစွမ်းကြောင့် ၂၀၁၅ ခုနှစ် ကမ္ဘာ့အကောင်းဆုံးဘောလုံးသမားဆုအတွက် စိန်ခေါ်သူအဖြစ် စောစောစီးစီးပင် ဖော်ပြနေကြပြီး အန်းရစ်ကာမူ နေးမာမှာ မက်ဆီ၏ စွမ်းဆောင်မှုများကို ဖြတ်ကျော်ရန် မဖြစ်နိုင်ဟု ဆိုသည်။

`နေးမာဟာ အရေးပါတဲ့ကစားသမားတစ်ယောက်ဖြစ်လာဖို့ သင့်လျော်တဲ့အသင်းကို ရောက်နေပါပြီ။ သူဟာ ပြိုင်ဘက်ကင်းပြီး ထူးခြားတဲ့ ကစားသမားတစ်ဦးပါ။ သူဘရာဇီးလ်မှာကစားကတည်းက ကျွန်တော်တို့ ဒါကို မြင်ခဲ့ပြီးပါပြီ။ (ရှေ့အလားအလာကောင်းအတွက်) သူဟာ အကောင်းဆုံးအသင်းကို ရောက်နေပြီး ကျွန်တော်တို့ကလည်း သူ့ကို အရေးပါတဲ့ ကစားသမားတစ်ယောက်အဖြစ် မြင်ချင်ပါတယ်´ ဟု အန်းရစ်က ပြောကြားခဲ့သည်။

သို့သော်လည်း နေးမာအနေဖြင့် အနာဂတ်တွင် အခြားသူများထက် ပိုမိုသာလွန်မည်လားဆိုသည်ကို မခန့်မှန်းနိုင်သေးဟု ဆိုသည်။

`မက်ဆီရဲ့ လုပ်ဆောင်ခဲ့မှုအတိုင်းအတာဟာ တော်တော်လေးမြင့်နေပါပြီ။ အခုလက်ရှိလည်း လုပ်ဆောင်နေပြီး ဆက်လက်လည်း ကြိုးစားသွားပါလိမ့်မယ်။ အခုလက်ရှိမှာတော့ သူဟာ နံပါတ် ၁ ပါပဲ။ ဒါပေမယ့် အနာဂတ်ကို ကျွန်တော်တို့ ကြည့်ရပါမယ်´ ဟု မက်ဆီနှင့်ပတ်သက်၍ အန်းရစ်က ထပ်လောင်းပြောကြားခဲ့သည်။

Ref: goal.com