အသက် ၉၃ နှစ် အရွယ် နာဇီ အော့စ်ဝစ်ခ်ျ အစောင့်ဟောင်း ကို လူပေါင်း သုံးသိန်းကျော် သတ်ဖြတ်မှု အတွက် စစ်ဆေးလျှက်ရှိ

ဖေဖော်ဝါရီ ၃၊ ၂၀၁၅
M-Media

နာမည်ကျော် အော့စ်ဝစ်ခ်ျ လူမျိုးတုန်း သတ်ဖြတ်ရေးစခန်းမှာ လုပ်အားပေးခဲ့တဲ့ အသက် ၉၃ နှစ်အရွယ် နာဇီ အော့စ်ဝစ်ခ်ျ  အစောင့်ဟောင်းကို ဂျာမနီမှာ ရုံးတင်စစ်ဆေးနေပါတယ်။ ဂျာမနီလူမျိုး တရားခံ အော်စကာ ဂရိုးနင်း ဟာ ဒီငရဲခန်းမှာ စာရင်းရေးသွင်းတဲ့သူဖြစ်ခဲ့ပါတယ်။ သူဟာ အကျဉ်းသားတွေဆီက ဘဏ်ချက်လက်မှတ်တွေကို စုစည်းပြီး ဘာလင်မြို့တော်မှာရှိတဲ့ နာဇီခောင်းဆောင်တွေဆီ ပေးပို့တဲ့အလုပ်ကို လုပ်ကိုင်ခဲ့ပါတယ်။ နောက်ထပ်အကျဉ်းသားတွေရောက်မလာခင် အရင်အကျဉ်းသားဟောင်းတွေရဲ့အဝတ်အစားထည့်တဲ့သေတ္တာတွေကို အသစ်ရောက်လာတဲ့သူတွေမရိပ်မိအောင် ဖယ်ရှားတဲ့နေရာမှာ ကူညီခဲ့တဲ့သူလို့လည်း သူ့ကိုစွပ်စွဲထားပါတယ်။ ဒီလိုလက်ဆွဲသေတ္တာတွေကို ဖယ်ရှားရတာဟာ အစုလိုက်အပြုံလိုက်သတ်ဖြတ်မှုတွေကို အကျဉ်းသားအသစ်တွေ သတိမထားမိအောင် ဖြစ်ပါတယ်။

အော့စ်ဝစ်ခ်ျ လူမျိုးတုန်းသတ်ဖြတ်ရေးစခန်းထဲမှ ကလေးငယ်များ

ရောက်လာတဲ့ အကျဉ်းသားတွေထဲက အလုပ်လုပ်ဖို့အတွက် ကြံ့ခိုင်မှုမရှိတဲ့သူတွေကို ရောက်ရောက်ချင်းမှာပဲ အော့စ်ခ်ျ အကျဉ်းထောင်ရဲ့ ဓာတ်ငွေ့ခန်းတွေမှာ သတ်ဖြတ်ပစ်တာကို ယခုအစောင့်ဟောင်း သိရှိကြောင်းကိုလည်း တရားစွဲဆိုသူတွေက ပြောဆိုပါတယ်။ သူ့ကို ဧပြီလ ၂၁ ရက်နေ့မှာ အနည်းဆုံး လူပေါင်း သုံးသိန်းကျော်ကို သတ်ဖြတ်ရာမှာ ပါဝင်ကူညီပေးခဲ့မှုစွဲချက်နဲ့ ရုံးတင်မှာဖြစ်ပါတယ်။ အကျဉ်းစခန်းက မသေဘဲ လွတ်မြောက်ခဲ့တဲ့သူတွေနဲ့ ဆွေမျိုးသားချင်း (၅၀) ခန့် တရားလိုတွေဟာ ဒီစစ်ဆေးမှုတွေမှာ တက်ရောက်သွားမှာဖြစ်ပါတယ်။ အော့စ်ဝစ်ခ်ျ အကျဉ်းစခန်းစောင့်ဟောင်း ဂရိုးနင်း ဟာ ( ၂၀၀၅ ) ခုနှစ်မှာ သူဒီအကျဉ်းစခန်းမှာ အလုပ်လုပ်ခဲ့မိတာကို ယခုအချိန်အထိ နောင်တရမိကြောင်း ဂျာမန် နေ့စဉ်သတင်းစာကို ပြောဆိုပါတယ်။ သူဟာ ဆယ်စုနှစ်ပေါင်းများစွာကြာပြီးတာတောင် ဓာတ်ငွေ့လွှတ်ပြီး သတ်ဖြတ်တဲ့ အခန်းထဲက အကျဉ်းသားတွေရဲ့ကြောက်မက်ဖွယ် အော်သံတွေကို ကြားနေရတုန်းပဲ လို့ ဆိုပါတယ်။

Source : Yahoo News