လေယာဉ်များ မိနစ်တိုင်း အချက်ပြသည့်စနစ်ကို လာမည့်နှစ်တွင် အသုံးပြုမည်

ဖေဖော်ဝါရီ ၅၊ ၂၀၁၅
M-Media

– ခရီးသည်တင်လေယာဉ်များအားလုံး အရေးပေါ်အခြေအနေနှင့် ကြုံတွေ့ရသည့်အခါ မိနစ်တိုင်းတွင် အချက်ပြမှုများ ပြုလုပ်ပေးမည့် စနစ်တစ်ခု တပ်ဆင်ရန် အစီအစဉ်ကို ဗုဒ္ဓဟူးနေ့တွင် ပြုလုပ်ခဲ့သည့် နိုင်ငံတကာ အရပ်ဘက်လေကြောင်းအဖွဲ့ ICAO ၏ အစည်းအဝေးတွင် အားပေးထောက်ခံမှုများ ရရှိခဲ့သည်ဟု သိသည်။

နိုင်ငံတကာ အရပ်ဘက်လေကြောင်းအဖွဲ့၏ အဖွဲ့ဝင် ၁၉၁ နိုင်ငံတွင် အများစုက ထိုအစီအစဉ်ကို အမြန်ဆုံး အကောင်ထည်ဖော်ရန် ဆန္ဒရှိကြပြီး လာမည့်နှစ်အတွင်း ဆောင်ရွက်နိုင်မည်ဟု တာဝန်ရှိသူများက ပြောကြားခဲ့သည်။

ပြီးခဲ့သည့်နှစ် မတ်လက ကွာလာလမ်ပူမှ ဘေဂျင်းသို့ပျံသန်းသည့် မလေးရှားလေကြောင်းလိုင်းမှ ခရီးသည်တင်လေယာဉ် MH 370 ပျောက်ဆုံးသွားပြီးနောက်ပိုင်း ထိုအစီအစဉ်ကို စတင်ရန် နိုင်ငံတကာမှ တိုက်တွန်းခဲ့ကြခြင်းဖြစ်သည်။

ထိုအစီအစဉ်အတွက် လေကြောင်းလိုင်းများမှာ ခြေရာခံစနစ်တစ်ခုကို တပ်ဆင်ရမည်ဖြစ်ပြီး အဆိုပါစနစ်မှာ လေယာဉ် မည်သည့်နေရာ ရောက်နေသည်ဆိုသည်ကို သာမန်အချိန်တွင် ၁၅ မိနစ်တစ်ခါ အချက်ပြသွားမည်ဖြစ်ပြီး အရေးပေါ်အခြေအနေနှင့် ကြုံတွေ့ရသည့်အခါ၌ မိနစ်တိုင်းတွင် အချက်ပြမည်ဖြစ်သည်။

ICAO ကမူ ထိုအဆိုပြုချက်ကို လာမည့် နိုဝင်ဘာတွင် လက်မှတ်ရေးထိုးသွားရန် မျှော်လင့်ထားပြီး ၂၀၁၆ ခုနှစ်မှစ၍ လေကြောင်းလိုင်းများမှာ ထိုစနစ်ကို မတပ်မနေရအဖြစ် သတ်မှတ်သွားမည်ဖြစ်သည်။ တာဝန်ရှိသူများကမူ ထိုအစီအစဉ်က လေကြောင်းလိုင်းများ လုံခြုံရေးနှင့်ပတ်သက်၍ လက်ရှိကြုံတွေ့နေရသည့် စိုးရိမ်ပူပန်မှုများကို အလျင်မြန်ဆုံးနှင့် အလွယ်ကူဆုံး ဖြေရှင်းခြင်းဖြစ်သည်ဟု ပြောကြားခဲ့ကြသည်။

Ref: channelnewsasia