အမေရိကန်သမ္မတ ဘာရာက်အိုဘားမား မွတ်စလင်ခေါင်းဆောင်များနှင့် တွေ့ဆုံဆွေးနွေး

ဖေဖော်ဝါရီ ၆၊ ၂၀၁၅
M-Media

– အစွန်းရောက်ဝါဒအား တိုက်ဖျက်ရန်နှင့် အခြားသော ပြည်တွင်းပြည်ပအရေးများကို ဆွေးနွေးရန်အတွက် အမေရိကန်သမ္မတ ဘာရက်အိုဘားမားမှာ အမေရိကန် မွတ်စလင်ခေါင်းဆောင်များနှင့် ပြီးခဲ့သည့် ဗုဒ္ဓဟူးနေ့က တွေ့ဆုံခဲ့သည်ဟု သိရသည်။

”တက်ရောက်လာသူတွေရဲ့ နယ်ပယ်အသီးသီးမှာ ဆောင်ရွက်မှုနဲ့ လူ့အဖွဲ့အစည်းအတွက် အရေးပါတဲ့ ပြဿနာတွေနဲ့ပတ်သက်ပြီး သူတို့ရဲ့အမြင်တွေကို ချပြတာတွေအတွက် သမ္မတက ကျေးဇူးတင်ခဲ့ပါတယ်။ ပြီးတော့ မတူညီတဲ့ ဘာသာရေးအသိုင်းအ၀ိုင်းတွေနဲ့ တွေ့ဆုံခြင်းဟာ တန်ဖိုးရှိတဲ့အမြင်တွေ၊ တုံ့ပြန်မှုတွေ ရရှိစေတယ်လို့လည်း သူက ပြောခဲ့ပါသေးတယ်” ဟု အိမ်ဖြူတော်မှ ထုတ်ပြန်သောကြေညာချက်တွင် ဖော်ပြထားသည်။

အဆိုပါတွေ့ဆုံပွဲတွင် အိုဘားမားက IS အဖွဲ့နှင့် အစ္စလာမ်၏ အမည်နာမကို အသုံးပြုကာ အကြမ်းဖက်မှုများကို ဆိုးရွားစွာ ကျူးလွန်နေကြသည့် အခြားသောအဖွဲ့များကို ဆက်လက်တွန်းလှန်ရေး လိုအပ်ချက်ကို အလေးထားဆွေးနွေးခဲ့သည်။

ထို့ပြင် အိုဘာမားဦးဆောင်ပြုလုပ်ခဲ့သည့် ကျန်မာရေးစောင့်ရှောက်မှုအစီအစဉ် Obamacare နှင့် အမေရိကန်အတွင်း အစ္စလာမ်ဆန့်ကျင်ရေးတိုက်ခိုက်မှုများ မြင့်တက်လာမှုများကဲ့သို့ ပြဿနာများအပြင် ပြည်တွင်းရေးကိစ္စများကိုလည်း
ဆွေးနွေးခဲ့ကြသည်။ အိုဘားမားကမူ မိမိအနေဖြင့် ပြည်သူများနှင့် ဥပဒေစိုးမိုးရေး ၀န်ထမ်းများအကြား ယုံကြည်မှုကို ပိုမိုခိုင်မြဲစေချင်သည်ဟု ပြောကြားခဲ့သည်။

“သမ္မတက အမုန်းတရားကြောင့်ဖြစ်တဲ့ ရာဇ၀တ်မှုတွေကို တရားစွဲဆိုခြင်းနဲ့ ဥပဒေစိုးမိုးရေးအဖွဲ့တွေကို အရေးယူခြင်းဖြင့် ပြည်သူ့အခွင့်အရေးကို ကာကွယ်ပေးမယ်ဆိုတဲ့ အစိုးရအဖွဲ့ရဲ့ ကတိက၀တ်ကိုလည်း ထပ်မံကတိပြုခဲ့ပါတယ်” ဟု ကြေညာချက်တွင် ဖော်ပြထားသည်။

အမေရိကန်မွတ်စလင်ခေါင်းဆောင်များအနေဖြင့် လူ့အဖွဲ့အစည်းတွင် စေ့စပ်ဆောင်ရွက်ကြရန် အိုဘားမားက တိုက်တွန်းခဲ့ပြီး လာမည့် ဖေဖော်ဝါရီ ၁၈ ရက်နေ့ အိမ်ဖြူတော်တွင်ပြုလုပ်မည့် အကြမ်းဖက်တိုက်ဖျက်ရေး ထိပ်သီးဆွေးနွေးပွဲနှင့် ပတ်သက်၍လည်း ထည့်သွင်းပြောကြားခဲ့သည်။

အဆိုပါထိပ်သီးအစည်းဝေးပွဲတွင် အစွန်းရောက်ဝါဒအား တားဆီးရန် နိုင်ငံတကာနှင့် ပြည်တွင်းတွင် ဆောင်ရွက်မည့်အစီအစဉ်များကို ဆွေးနွေးမည်ဟု အိမ်ဖြူတော်ကဆိုသည်။

တရားဝင် စစ်တမ်းကောက်ယူမှုများ မရှိသော်လည်း အမေရိကန် ပြည်ထောင်စုတွင် အစ္စလာမ်ဘာသာကို သက်ဝင်ယုံကြည်သူအရေအတွက်မှာ ၆ သန်းမှ ၈ သန်းအထိ ရှိမည်ဟု ခန့်မှန်းရသည်။

Ref: onislam