ဒုက္ခသည်စခန်းရှိ ရမ်းဗြဲမှ မွတ်စလင်များ မူလ နေအိမ်များပြန်မပေးဘဲ သုသာန်နေရာတွင် နေရာချပေးမည်ဟုဆို

ဖေဖော်ဝါရီ ၇၊ ၂၀၁၄
M-Media
သတင်း – ထွန်းတောက်

ရမ်းဗြဲ ။    ။ ၂၀၁၂ ခုနှစ် အတွင်း ရခိုင်ပြည်နယ် တဝှမ်းဖြစ်ပွားခဲ့သည့် အကြမ်းဖက်မှု ဖြစ်စဉ်များအတွင်း ရမ်းဗြဲမြို့တွင် ရခိုင်လူမျိုး များနှင့် ပြသနာဖြစ်ပွားစဉ် ရမ်းဗြဲမြို့ပေါ်ရှိ မွတ်စလင် မိသားစုဝင် ၁၂၀၀-ကျော်တို့မှ တစ်ခဏ ရှောင်နေရန် အတွက် အာဏာပိုင် တချို့က မြို့ပြင်သို့ ပို့ဆောင်ပေးထားသည်မှာ ၂-နှစ်ကျော် ရှိပြီဖြစ်သော်လည်း မိမိနေရပ်နေရာသို့ ယနေ့တိုင် ပြန်လည် သွားရောက်နေထိုင်နိုင်ခွင့် မပေးသေးကြောင်း သိရပါတယ်။

အဆိုပါ အချိန်ကာလက ယင်း မွတ်စလင်မ် ၁၂၀၀-ကျော်အား ရမ်းဗြဲမြို့နှင့် ၉-မိုင်ကျော်ဝေးကွာသည့် ဆားကွင်းကြီးသို့ ၇-ရက်(တစ်ပတ်)ခန့် သွားရောက် တိမ်းရှောင်နေရန် အာဏာပိုင် အချို့နှင့် ရပ်မိရပ်ဖ အချို့တို့မှ ပြောဆိုကာ ပို့ဆောင်ခဲ့ကြောင်း ရမ်းဗြဲ ဒေသခံများပြောဆိုချက်အရ သိရပါတယ်။

“ကျွန်တော်တို့ကို လူသူကင်းဝေးတဲ့ နေရာမှာ လာထားထားတယ်။ ယနေ့တိုင်အိမ်ကိုပြန်လို့ မရသေးဘူး။ ဒီမှာ ဘာမှ စားစရာမရှိဘူး။ သူတို့က ဆားနဲ့ ဆီပဲပေးတယ်။ ကျန်တာတွေက ရွာနီးနားကလူတွေ လာရောင်းတာပဲစားရတာ။ တချို့တွေဆိုရင် အာဟာရတောင် ပြတ်လပ်နေကြတယ်” ဟု ယခုလက်ရှိ ဆားတွင်းတွင် နေထိုင်နေသူတစ်ဦးက ပြောပါတယ်။

ဒုက္ခသည် စခန်းများအတွင်း ကလေးများ၏ ပညာရေးကို ပညာတတ် ၁၉-ဦးမှ ဦးစီးကာ ပညာသင်ကြားပေးနေကြောင်း နှင့်  ကျန်းမာရေး အတွက် ဆေးဝါးများမှာလည်း အလုံအလောက် မရှိ၍ တစ်ခါတစ်ရံ လာလှူမှသာ ဆေးဝါးများကို သုံးစွဲရကြောင်း သိရှိရပါတယ်။

“ကျွန်တော်တို့က တိုင်းရင်းသားတွေပါ။ ကျွန်တော်တို့မှာရှိတဲ့ အခွင့်အရေးတွေကို ကျွန်တော်တို့လိုချင်ပါတယ်။ ပိုလည်းမတောင်းပါဘူး။ ကျွန်တော်တို့ကို ကျွန်တော်တို့ အိမ်လေးတွေ ပြန်ပေးဖို့ပဲ တောင်းဆိုချင်တာပါ။ ကျွန်တော်တို့ရဲ့ အိမ်လေးတွေကို အမြန်ဆုံးပြန်ပေးပါလို့ပဲ တောင်းဆိုချင်ပါတယ်” ဟု ယင်းနေရာတွင် နေထိုင်သူတစ်ဦးက ပြောဆိုခဲ့သည်။

တိမ်းရှောင်ခဲ့ရသည့် မွတ်စလင်များ ယခင်က နေထိုင်ခဲ့သော ရမ်းဗြဲမြို့ပေါ်ရှိ အိမ်များအား ရမ်းဗြဲမြို့ပေါ်ရှိ ဗုဒ္ဓဘာသာဝင်များမှ ယခုလက်ရှိတွင် တက်ရောက်နေထိုင်နေကြောင်းလည်း ကိုလည်း ၄င်းတို့၏ ပြောကြားချက်အရသိရှိရပါတယ်။

နောက်ဆက်တွဲ စုံစမ်းသိရှိရသည့် သတင်းများ အရ ခေတ္တဟု ပြောဆိုပြိး ရှောင်တိမ်းခိုင်းခဲ့သည့် မွတ်စလင်များအား ၄င်းတို့ မူလနေအိမ်များ ပြန်မပေးဘဲ သုသာန်မြေနေရာတွင် နေရာ ချထားပေးကြောင်း၊ ၄င်း သုသာန်နေရာမှာ လုပ်ကိုင်စားသောက်ရန် ဘယ်လိုမှ အဆင်မပြေ၍ ရမ်းဗြဲမှာ မွတ်စလင်မ်များမှာ လက်ခံခြင်းမရှိကြောင်း သတင်းရရှိပါတယ်။