ဘိုကိုဟရမ်ကို အမြစ်ဖြတ်ချေမှုန်းမည်ဟု နိုက်ဂျီးရီးယားပြော

ဖေဖော်ဝါရီ ၁၀၊ ၂၀၁၅
M-Media

– လာမည့် မတ်လ ၂၈ ရက်နေ့တွင် ပြုလုပ်ရန် သတ်မှတ်ထားသည့် ရွေးကောက်ပွဲကို ထပ်မံရွှေ့ဆိုင်းတော့မည် မဟုတ်ဘဲ ကျန်ရှိသည့် သီတင်းပတ် ၆ ပတ်အတွင်း ဘိုကိုဟရမ်၏ စခန်းအားလုံး ချေမှုန်းဖျက်ဆီးသွားမည်ဟု နိုက်ဂျီးရီးယားက အစိုးရက ပြောကြားလိုက်သည်။

“ကျွန်တော်တို့သိထားတဲ့ ဘိုကိုဟရမ်ရဲ့ စခန်းတွေအားလုံးကို ဖယ်ရှားသွားမှာပါ။ သူတို့အဲဒီမှာ ရှိတော့မှာမဟုတ်ပါဘူး။ သူတို့ကို ဖျက်ဆီးသွားမှာပါ။ ပြီးတော့ ရွေးကောက်ပွဲကိုလည်း ထပ်ရွှေ့မှာ မဟုတ်တော့ပါဘူး” ဟု နိုက်ဂျီးရီးယား အမျိုးသား လုံခြုံရေးအကြံပေး ဆမ်ဘို ဒါဆူကီက ပြောကြားခဲ့သည်။

နိုက်ဂျီးရီးယားရွေးကောက်ပွဲကို ဖေဖော်ဝါရီ ၁၄ ရက်နေ့တွင် ကျင်းပရန် မူလက စီစဉ်ထားခဲ့သော်လည်း ဘိုကိုဟရမ်အဖွဲ့၏ ခြိမ်းခြောက်မှုများ ရှိနေပြီး နိုက်ဂျီးရီးယား စစ်တပ်ကလည်း လုံခြုံရေးအပြည့်အ၀ မပေးနိုင်သောကြောင့် မတ်လ ၂၈ ရက်နေ့သို့ ပြောင်းရွှေ့ခဲ့ရခြင်းဖြစ်သည်။

ဒါဆူကီကမူ နိုက်ဂျီးရီးယားနှင့် အိမ်နီးချင်းနိုင်ငံများဖြစ်ကြသော ကင်မရွန်း၊ ချဒ်နှင့် နစ်ဂါးနိုင်ငံတို့မှ စစ်တပ်များ ပူးပေါင်းကာ ဆောင်ရွက်မည့် စစ်ဆင်ရေးအသစ်မှာ ဘိုကိုဟရမ်ကို တွန်းလှန်ရာတွင် အဆုံးအဖြစ် ဖြစ်စေမည်ဟု ယုံကြည်ကြောင်း ထည့်သွင်းပြောကြားခဲ့သည်။

ရွေးကောက်ပွဲ ရက်ရွှေ့ဆိုင်းခဲ့ခြင်းအတွက် နိုင်ဂျီးရီးယားအစိုးရအား အတိုက်အခံများအပါအ၀င် လူအများက ဝေဖန်မှုများရှိခဲ့ပြီး ဒါဆူကီကမူ ထိုသို့ရွှေ့ဆိုင်းခြင်းမှာ နိုင်ငံရေးရည်ရွယ်ချက်မပါဝင်ဟု ဆိုသည်။

ဘိုကိုဟရမ်အားတိုက်ခိုက်ရန် ဒေသတွင်းနိုင်ငံများက တိုးမြှင့်လုပ်ဆောင်နေစဉ်တွင် ဘိုကိုဟရမ်အဖွဲ့ ခေါင်းဆောင် အဘူဘာကာရ် ရှီကာကူက ယမန်နေ့တွင် ဗီဒီယိုတစ်ခု ထုတ်ပြန်ခဲ့ပြီး အင်အား ၈၇၀၀ ရှိသော အာဖရိကနိုင်ငံများမှ စစ်တပ်များကို ချေမှုန်းသွားမည်ဟု ပြောကြားခဲ့သည်။

Ref: aljazeera