ဘာသာတရားသည် လူနှင့်လူကြား အမုန်းတရားမဟုတ်

ဖေဖော်ဝါရီ ၁၇ ၊ ၂၀၁၅
M-Media
သက်ဝေနှင်းရေးသည်။

လူနှင့်လူတို့၏ကြားတွင် ဘာသာတရားသည် စည်းခြားထားသည့် အမုန်းတံတားတစ်ခု မဟုတ်ပါ။

အမှန်စင်စစ် လူတိုင်းလူတိုင်းသည် ဘာသာရေး တစ်ခုတည်းကိုသာ သင်ယူတတ်မြောက်ပြီး ဘာသာရေး တစ်ခုတည်းကိုသာ လက်ကိုင်ထား၍ ကျန်သည့် အသိပညာများအား လက်လွှတ်ထားခဲ့လျှင် အစွန်းတစ်ဘက်သို့သာ ရောက်ရှိသွားမည်မှာ မလွဲပင်တည်း။

ပညာဥာဏ်တည်းဟူသော အသိသည် အမှားအမှန်ကို ဝေဖန်ပိုင်းဖြတ်နိုင်သည့် အကောင်းအဆိုးကို ဆင်ခြင်သုံးသပ်နိုင်သည့် ဣစ္ဆာသရလက်နက်ပင်ဖြစ်၏။ ဥာဏ်၊ ပညာ၊ သတိ၊ ဆင်ခြင်တုံတရားဆိုသည်မှာ မျှော်စင်တစ်ခုနှင့် အလား သဏ္ဍာန် တူပေ၏။ မျှော်စင်သည် အမြင့်သို့ရောက်လေလေ အောက်ဖက်မှမြင်ကွင်းများအား ပိုမိုကျယ်ဝန်း ကျယ်ပြန့်စွာ မြင်တွေ့ ရလေလေပင် မဟုတ်ပါလား။ အသိပညာ တည်းဟူသော အရာသည်လည်း ထိုနည်းနှင်နှင်ပင်။ လူသည်အသိနှင့်ပညာများလာလေလေ အမြင်ကျယ်လာလေလေပင်တည်း။

ယနေ့ဖြစ်ပေါ်နေသည့် လူမျိုးရေးပဋိပက္ခများ၊ ဘာသာရေးပဋိပက္ခများ၊ မုန်းတီးရေးဝါဒများသည် အသိဥာဏ်ပညာ ခေါင်းပါးမှုများ အပေါ်တွင် များစွာတည်မှီနေပါသည်။

ပြီးခဲ့သည့် ဇန်နဝါရီလ ၃-ရက်နေ့တွင် အီရန်နိုင်ငံ၌ ကျင်းပပြုလုပ်ခဲ့သော ဘာသာရေးဆွေးနွေးပွဲမှ ပြန်လာသည့် သီတဂူဆရာတော် အရှင် ဥာဏိသာရ၏ ပြောကြားချက်များမှာ ကမ္ဘာပေါ်ရှိ ဘာသာရေးပဋိပက္ခ ဖြစ်စဉ်များအား လေ့လာကြည့်ပါက စီးပွားရေးအရာတွင် လည်းကောင်း ပညာရေးအရာတွင်လည်းကောင်း အဆင်မြင့်နေရာဒေသ များတွင် ဖြစ်ပွားလေ့ မရှိသည်ကို တွေ့မြင် ရပြီး ကျေးလက်မြို့ငယ်နှင့် နယ်စွန်နယ်ဖျား မြို့စွန်မြို့များတွင် နေထိုင်ကြသည့် စီးပွားရေးနိမ့်ပါးသူများ၊ ပညာရေးနိမ့်ပါးသူများ အကြားတွင်သာ ဖြစ်လေ့ရှိသည်ကို တွေ့ရှိနိုင်ကြောင်းများကို မိန့်ကြားခဲ့၏။

အီရန်သမ္မတ၏ အတွင်းရေးမှူးနှင့် ဘာသာရေးခေါင်းဆောင်များအား ဆရာတော်မှ မြန်မာနိုင်ငံတွင် ဖြစ်ပေါ်ခဲ့သော ဘာသာရေး၊ လူမျိုးရေး အသွင်ပဋိပက္ခများသည် အောက်ခြေအဆင့်ပြည်သူများ၏ စီးပွားရေး၊ ပညာရေး နိမ့်ကျမှုများကြောင့်သာဖြစ်ပြီး ဘာသာရေးကြောင့် အဓိကဖြစ်ရခြင်း မဟုတ်ကြောင်းများကို ရှင်းလင်းပြောကြားခဲ့ရာတွင်လည်း ဆရာတော်၏မိန့်ကြားချက်များကို (အီရန်) ဘာသာရေးခေါင်းဆောင်များနှင့် နိုင်ငံရေးခေါင်းဆောင်များမှ နှစ်သက်လက်ခံခဲ့ပါသည်။

ဆရာတော်ထပ်မံမိန့်ကြားခဲ့သော စကားများမှာ ပဋိပက္ခများကို ဖြေရှင်းရန်မှာ ဗုဒ္ဓဘာသာ၊ အစ္စလာမ်ဘာသာ၊ ခရစ်ယာန်ဘာသာ၊ ဟိန္ဒူဘာသာ စသည့်ဘာသာအားလုံးမှ မိမိတို့ဘာသာဝင် လူမျိုးများ၏ စိတ်ဓာတ်များနှင့် ပညာရေး၊ စီးပွားရေး စသည်တို့ကို မြှင့်တင်ပေး ရမည်ဖြစ်ကြောင်း၊ ဤသို့အသိပညာများမြင့်မား၍ ဆင်းရဲမှုများ ပပျောက်လာမည်ဆိုလျှင် မည်သည့်ပဋိပက္ခမှ ဖြစ်ပေါ်လာနိုင်စရာမရှိ ဟူ၍ပင်ဖြစ်၏။

ဗုဒ္ဓဟောကြားခဲ့သည်မှာလည်း ဗုဒ္ဓဘာသာသည် အစ္စလာမ်နှင့်သာမဟုတ် မည်သည့်တိုင်းပြည် မည်သည့် လူမျိုးနှင့်မဆို မည်သည့် ဘာသာ ကိုးကွယ်မှုဖြင့်မဆို ငြိမ်းချမ်းစွာ အတူယှဉ်တွဲနေထိုင်၍ မေတ္တာရှေ့ထား၍ ဆက်ဆံနေထိုင်ရန်ပင်ဖြစ်၏ ဟူ၍ မိန့်ကြားခဲ့ပါသည်။ အကြမ်းဖက်မှုများ အစွန်းရောက်မှုများ တစ်နိုင်ငံထဲတွင် နေထိုင်ကြသည့် ဘာသာဝင် အချင်းချင်း ပဋိပက္ခရန်ပွဲများ ကင်းဝေးစေရန် ဘာသာဝင်များအကြား ရင်နှီးချစ်ကြည်စွာ ပူးပေါင်း၍ ဆောင်ရွက်ခြင်း ဖိုရမ်ကို အီရန်နိုင်ငံ တီဟီရန်မြို့တွင် သုံးရက်ကြာ ကျင်းပခဲ့ခြင်းကြောင့် မြန်မာ၊ သီရိလင်္ကာ၊ ထိုင်း၊ အီရန် စသည့်နိုင်ငံများမှ ဘာသာရေးခေါင်းဆောင်များ အကြားတွင် ဘာသာရေး အယူအဆများအပေါ် အပြန်အလှန်ကောင်းမွန်သော အကျိုး သက်ရောက်မှုများ နားလည်မှုများရရှိခဲ့ကြပြီး ပါဠိဘာသာနှင့် ဗုဒ္ဓဘာသာစာပေ တို့ကို အစ္စလာမ်ဘာသာရေး တက္ကသိုလ်တွင် သင်ကြားရန် အလိုရှိသောကြောင့် မေတ္တာရပ်ခံရာ သီတဂူဆရာတော်မှ မိမိ၏တက္ကသိုလ်ရှိ ပါဠိ ကျွမ်းကျင်သည့် ဆရာတော်များအား စေလွှတ်ပေးပါမည့်အကြောင်း ပြောကြားခဲ့သည်။

ဤသည်တို့ကိုကြည့်ခြင်းအားဖြင့် ကမ္ဘာပေါ်တွင်လည်းကောင်း၊ မြန်မာနိုင်ငံတွင် လည်းကောင်း၊ ဘာသာရေးဆိုသည်မှာ တစ်ဦးနှင့်တစ်ဦး တစ်ဖက်နှင့်တစ်ဖက် ပြိုင်ဆိုင်ရန် ဆန့်ကျင်တိုက်ခိုက်ရန် ရန်ငြိုးအမုန်းပွားများရန် လမ်းခင်းပေးထားသည့် တံတားတစ်ခု မဟုတ်ကြောင်းကို လူတိုင်းလူတိုင်း ဘာသာဝင်တိုင်း ဘာသာဝင်တိုင်း နားလည်သဘောပေါက် လက်ခံကြမည်ဆိုလျှင် မည်သည့်အရာများကမှ နှောက်ယှက်ဖျက်ဆီးခြင်း၊ ခုတုံးလုပ်၍ အမုန်းမီးတောက်လောင်စေခြင်းများမှ ကင်းဝေးကြပြီး ငြိမ်းချမ်းသာယာသော လောကသစ်ကို ပျော်ရွှင်စွာတည်ဆောက်နိုင်ကြမည်ဖြစ်ပေသည်။

သက်ဝေနှင်း