သြစတေးလျ မူးယစ်မှောင်ခို ၂ ဦးအား ကွပ်မျက်မည့်နေ့ကို အင်ဒိုနီးရှား ရွှေ့ဆိုင်း

ဖေဖော်ဝါရီ ၂၀၊ ၂၀၁၅
M-Media

– သေဒဏ်ကျခံနေရသည့် သြစတေးလျ မူးယစ်မှောင်ခိုသမား ၂ ဦးအား ကွပ်မျက်ခြင်းကို ၁ လ တိတိ နောက်ဆုတ်လိုက်သည်ဟု အင်ဒိုနီးရှား အစိုးရက ယနေ့တွင် ပြောကြားလိုက်သည်။

အဆိုပါ သြစတေးလျနိုင်ငံသားနှစ်ဦးမှာ ဘာလီရှိ လူ ၉ ဦးပါဝင်သော မူးယစ်မှောင်ခိုအဖွဲ့၏ ခေါင်းဆောင်များဖြစ်ကြသည့် အန်ဒရူးချန်နှင့် မြူရန် ဆူကူမာရန်တို့ဖြစ်ပြီး လာမည့်အသုတ် ကွပ်မျက်မှုတွင် ပါဝင်မည်ဖြစ်သည်။

သို့သော်လည်း လုပ်ထုံးလုပ်နည်းဆိုင်ရာ အကြောင်းအရင်းများကြောင့် ၎င်းတို့အား ကွပ်မျက်မှုကို ၃ ပတ်မှ ၁ လအထိ ရွှေ့ဆိုင်းလိုင်းခြင်းဖြစ်သည်ဟု အင်ဒိုနီးရှား ဒုတိယသမ္မတ၏ ပြောရေးဆိုခွင့်ရှိသူ ဟူစိန်အဘ်ဒူလာက ဆိုသည်။ သြစေတးလျဝန်ကြီးချုပ် တိုနီအက်ဘော့ကမူ ၎င်းတို့နိုင်ငံသား ၂ ဦးအား သေဒဏ်မှ လွငြိမ်းချမ်းသာခွင့်ပေးရန် စောစောပိုင်း တောင်းဆိုမှုများ ပြုလုပ်ခဲ့ပြီးနောက် ယခုကဲ့သို့ နောက်ဆုတ်ခဲ့ခြင်းလည်းဖြစ်သည်။

အဆိုပါ အကျဉ်းသားနှစ်ဦးကို ဘာလီအကျဉ်းထောင်မှ လုံခြုံရေး ပိုမိုမြင့်မားသော နူဆာကမ်ဘန်ဂန် ကျွန်းရှိ အကျဉ်းထောင်သို့ ယခုသီတင်းပတ်အတွင်း ပြောင်းရွှေ့ကာ ကွပ်မျက်မည်ဖြစ်ပြီး အင်ဒိုနီးရှား အာဏာပိုင်များကမူ ထောင်မဆံ့ခြင်းအပါအ၀င် အချို့သော အခက်အခဲများ ရှိနေသည်ဟု ပြောကြားခဲ့သည်။

ယခုကွပ်မျက်မည် သြစတေးလျနိုင်ငံသားနှစ်ဦးအတွက် သမ္မတ၏ လွတ်ငြိမ်းချမ်းသာခွင့် တောင်းခံခဲ့သော်လည်း ပယ်ချခံခဲ့ရသည်။ အင်ဒိုနီးရှားနှင့် သြစတေးလျတို့၏ ဆက်ဆံရေးမှာ ၂၀၁၄ ခုနှစ်က ပေါ်ထွက်လာခဲ့သည့် လျှို့ဝှက်ထောက်လှမ်းရေး အရှုပ်အထွေးနှင့် လူကုန်ကူးမှုများကြောင့် တင်းမာနေခဲ့ပြီး ယခုပြဿနာက ၎င်းတို့၏ ဆက်ဆံရေးကို ပိုမို ဆိုးရွားစေမည်ဖြစ်သည်။

Ref:channelnewsasia