လက်ဝှေ့ကျော် မိုဟာမက်အလီနှင့် ပြိုင်ဘက် လစ္စတန်တို့၏ လက်အိတ် ပေါင် ၆ သိန်းကျော် လေလံရ

ဖေဖော်ဝါရီ ၂၅၊ ၂၀၁၅
M-Media

– ၁၉၆၅ ခုနှစ် ဟဲဗီးဝိတ်ချန်ပီယံလုပွဲတွင် လက်ဝှေ့ကျော် မိုဟာမက်အလီနှင့် ပြိုင်ဘက် ဆန်နီလစ္စတန်တို့ ၀တ်ဆင်ခဲ့သည့် လက်အိတ်များကို လေလံပစ်ခဲ့ရာ စတာလင်ပေါင် ၆ သိန်းကျော် ရရှိခဲ့သည်ဟု သိရသည်။

ဒါးလက်စ်အခြေစိုက် Heritage Auctions လေလံအဖွဲ့မှ ပြီးခဲ့သည့် စနေနေ့တွင် နယူးယောက်မြို့၌ လေလံပစ်ခဲ့ခြင်းဖြစ်ပြီး အမည်မဖော်လိုသူတစ်ဦးက ၀ယ်ယူခဲ့သည်ဟုဆိုသည်။

မိုဟာမက်အလီနှင့် လစ္စတန်တို့၏ အဆိုပါပွဲမှာ ၁၉၆၅ မေလ ၂၅ ရက်နေ့တွင် အမေရိကန်ပြည်ထောင်စုလီဝစ္စတန်မြို့၌ ကျင်းပပြုလုပ်ခဲ့ခြင်းဖြစ်ပြီး ပထမအချီမှာပင် နာမည်ကျော် တစ္ဆေလက်သီးဖြင့် မိုဟာမက်အလီက အနိုင်ရရှိခဲ့သည်။ ထိုပွဲမှာ မိုဟာမက်အလီ အစ္စလာမ်သာသနာကို ပြောင်းလဲသက်ဝင်ခဲ့ပြီးနောက် ပထမဆုံး ထိုးသတ်ခဲ့သည့် ပွဲလည်းဖြစ်ပြီး တစ်နှစ်အရင်က သရဖူလွှဲပေးခဲ့ရသည့် အရှုံးကို မကျေနပ်သည့် လစ္စတန်၏ မကျေပွဲလည်းဖြစ်သည်။

ထိုပြိုင်ပွဲပြီးနောက် ၎င်းတို့နှစ်ဦး၏ လက်အိတ်ကို မိန်းမြို့လက်ဝှေ့ဆိုင်ရာ မဟာမင်းကြီး ဂျော့ဂ်ျ ရူဆိုက သိမ်းထားခဲ့သည်။ ထို့နောက် ရူဆိုထံမှ ကယ်လယ်ဖိုးနီးယားရှိ ရှေးဟောင်းပစ္စည်းစုဆောင်သူတစ်ဦးက ၀ယ်ယူခဲ့ခြင်းဖြစ်ပြီး ယခုကဲ့သို့ လေလံတင်ခဲ့ခြင်းဖြစ်သည်။

၎င်းတို့၏နှစ်ဦး ၁၉၆၄ ခုနှစ်က ထိုးသတ်ခဲ့သည့်ပွဲမှ လက်အိတ်များကို ပြီးခဲ့သည့်နှစ်တွင် Heritage Auctions ကပင် လေလံတင်ခဲ့ပြီး ပေါင် ၅၄၄၃၀၀ ရရှိခဲ့သည်။ ၎င်းတို့နှစ်ဦး ထိုးသတ်ခဲ့သည့် နှစ် ၃၀ မြောက်အဖြစ် ၁၉၉၅ ခုနှစ်က ပြုလုပ်ခဲ့သော အခမ်းအနားတွင် အလီမှာ ထိုလက်အိတ်များတွင် လက်မှတ်ရေးထိုးပေးခဲ့သည်။ လစ္စတန်ကမူ ၁၉၇၀ ပြည့်နှစ်က ကွယ်လွန်ခဲ့သည်။

Ref: dailymail