မန်ယူနှင့်ပွဲမှ အမှားများကို ပြင်ဆင်ခဲ့သောကြောင့် ပိုကောင်းလာခြင်းဟု လီဗာပူးတိုက်စစ်မှူး စတာလင်ဆို

ဖေဖော်ဝါရီ ၂၆၊ ၂၀၁၅
M-Media

– အိုးထရက်ဖို့ဒ်တွင် မန်ယူအား ရှုံးနိမ့်ခဲ့သည့်ပွဲ၌ မိမိ၏ အဆုံးသတ်မသေချာမှုများကို ပြင်ဆင်ခဲ့ပြီးနောက် ယခုကဲ့သို့ ပိုကောင်းလာခြင်းဖြစ်သည်ဟု လီဗာပူးလ် တိုက်စစ်မှူး စတာလင်က ပြောကြားလိုက်သည်။

ဒီဇင်ဘာ ၁၄ ရက်နေ့က ကစားခဲ့သည့် အဆိုပါပွဲတွင် စတာလင်၏ အပိုင်ဂိုးသွင်းခွင့် လွဲချော်မှုများနှင့်အတူ လီဗာပူးလ်က ၃ ဂိုးပြတ်ဖြင့် ရှုံးနိမ့်ခဲ့သည်။ စတာလင်ကမူ ထိုပွဲတွင် ကျူးလွန်ခဲ့သည့် မိမိ၏အမှားများကို နောက်ပိုင်းတွင် ဗီဒီယိုဖြင့် ပြန်ကြည့်ခဲ့ပြီး ပြင်ဆင်ခဲ့သည်ဟု ဆိုသည်။

“အဲဒီနေ့က ကျွန်တော့်အတွက် တော်တော်ဆိုးတဲ့နေ့ပါပဲ။ ကျွန်တော်တို့ နိုင်သွားနိုင်တဲ့ အခွင့်အရေးတစ်ချို့ကို ကျွန်တော်ရခဲ့ပေမယ့် လွဲချော်ခဲ့ပါတယ်။ ကျွန်တော် စိတ်ပျက်သွားပြီး အိမ်ရောက်တဲ့အခါ အဲဒီဗီဒီယိုကို ထပ်ခါတလဲလဲ ပြန်ကြည့်ခဲ့ပါတယ်။ ကျွန်တော်ဘာတွေ ပိုကောင်းအောင် လုပ်ရမလဲဆိုတာ သိဖို့ ကြည့်ခဲ့တာပါ” ဟု စတာလင်က ပြောကြားခဲ့သည်။

ထိုပွဲပြီးနောက် ကစားခဲ့သည့် ဘုန်းမောက်နှင့် လိဂ်ဖလား ကွာတားဖိုင်နယ်တွင် စတာလင်မှာ ၂ ဂိုးသွင်းယူနိုင်ခဲ့ပြီး ဒီဇင်ဘာ ၂၆ ရက်နေ့က ကစားခဲ့သည့် ဘန်လေနှင့်ပွဲတွင်လည်း ဂိုးထပ်သွင်းနိုင်ခဲ့ကာ လီဗာပူးလ်၏ အားထားရသည့် တိုက်စစ်မှူး ဖြစ်လာခဲ့သည်။

“ကျွန်တော့်ရဲ့ပုံစံက နည်းနည်းလေး တန့်သွားသလို ရှိပါတယ်။ ဒါပေမယ့် ဒါဟာ လူငယ်ကစားသမားတစ်ယောက်အတွက် ဖြစ်တတ်တဲ့သဘာဝပါပဲ။ တကယ်လို့များ ကျွန်တော်ဟာ နောက်ထပ်အဆင့်တစ်ခုကို ရောက်ချင်တယ်ဆိုရင်တော့ ကျွန်တော် တည်ငြိမ်ဖို့ လိုပါတယ်”

Ref: Dailymail