ငြိမ်းချမ်းရေးအတွက် ပန်းပေးတဲ့ ကနေဒါမွတ်စလင်များ

မတ် ၁၊ ၂၀၁၅
M-Media

– မိမိတို့၏ အသိုင်းအ၀ိုင်းအပေါ် အထင်အမြင်လွဲမှားမှုများ များပြားလာသည့်အတွက် ငြိမ်းချမ်းရေး သရုပ်သကန်ကိုပြသရန် ကနေဒါနိုင်ငံ အလ်ဘာတာပြည်နယ် အဒ်မွန်တွန်မြို့မှ မွတ်စလင်အဖွဲ့များက လမ်းသွားလမ်းလာများအား ပန်းများကမ်းသည့် လှုပ်ရှားမှုတစ်ခုကို ပြီးခဲ့သည့် တစ်ပတ်က ပြုလုပ်ခဲ့သည်ဟု သိရသည်။

“ကျွန်မတို့ဟာ နှင်းဆီပန်းအဖြူတွေကို ကမ်းခဲ့ကြပြီး ငြိမ်းချမ်းရေး မြှင့်တင်ဖို့လည်း သတင်းစကား ပါးခဲ့ကြပါတယ်။ ကျွန်မတို့ဟာ အစွန်းရောက်တွေမဟုတ်ပါဘူး။ လူတွေ ကျွန်မတို့ကိုကြောက်တာ ကျွန်မတို့ မလိုချင်ပါဘူး။ ကျွန်မတို့ဟာ အခြားလူတွေလိုပါပဲ” ဟု အဆိုပါ လှုပ်ရှားမှုတွင် ပါဝင်ခဲ့သည့် မာရ်ဝါ ဖာရ်ဟတ်က Edmonton Journal ဂျာနယ်သို့ ပြောကြားခဲ့သည်။

ဖာရ်ဟတ်နှင့် မွတ်စလင်ငြိမ်းချမ်းရေးအဖွဲ့မှ အခြားသော အဖွဲ့ဝင်များမှာ အက်ဒ်မွန်တွန် မြို့လယ်ကောင်တွင် နှင်းဆီဖြူ အပွင့် ၅၀၀ ကျော်ကို လမ်းသွားလမ်းလာများအား ကမ်းပေးခဲ့ကြသည်။ အဆိုပါ ပန်းများတွင် အစ္စလာမ်နှင့် မွတ်စလင်တို့အပေါ် ပိုမိုနားလည်လာရေး အထောက်အကူဖြစ်စေရန် သတင်းအချက်အလက်အချို့ကို ရေးသားထားသော စာရွက်များလည်း ပါဝင်ခဲ့သည်။

IS နှင့် အလ်ရှာဘတ်တို့ကဲ့သို့ အစ္စလာမ်ကို အလွဲသုံးစားလုပ်နေသော အကြမ်းဖက်အဖွဲ့များ ပေါ်ပေါက်လာပြီး မီဒီယာများတွင်လည်း အစ္စလာမ်နှင့်ပတ်သက်၍ လွဲများစွာဖော်ပြနေကြသည့်အတွက် အထင်အမြင်လွဲမှုများကို တန်ပြန်တိုက်ဖျက်ရန် ရည်ရွယ်သော အဆိုပါလှုပ်ရှားမှုကို စတင်ရန် ထိုအဖွဲ့မှာ ပြီးခဲ့သည့် သီးတင်းပတ် ၃ ပတ်ကတည်းက အိုက်ဒီယာ ရခဲ့ခြင်းဖြစ်သည်။

အဆိုပါလှုပ်ရှားမှုမှာ အလွန်အကျိုးရှိခဲ့ပြီး လမ်းသွားလမ်းလာများက မွတ်စလင်လူငယ်များ ကမ်းသော နှင်းဆီဖြူများကို အပြုံတစ်ပိုင်းဖြင့် ယူဆောင်ခဲ့ကြပြီး အချို့ကလည်း မေးခွန်းမေးခဲ့ကြသည်ဟု ဖာရ်ဟတ်ကဆိုသည်။

“အစ္စလာမ်ကို ပရိုမိုးရှင်းလုပ်နေတာမဟုတ်ပါဘူး။ ငြိမ်းချမ်းရေး ပရိုမိုးရှင်းလုပ်နေတာပါ။ အဲဒီမှာ ကျွန်မတို့ဟာ ဖော်ရွေမှုလေးတွေ ပေးလိုက်တာပါပဲ။ အစွန်းရောက်သမားတွေမှာ ဘာသာတရားမရှိပါဘူး။ သူတို့က ကျွန်မတို့ သာသနာကို ယူလိုက်တယ်။ ပြီးတော့ သူတို့ရဲ့ အစွန်းရောက်အခြေအနေတွေဆီ ပြောင်းလဲလိုက်ပါတယ်” ဟု သူမက ထပ်လောင်းပြောကြားခဲ့သည်။

ဆဲလီ ဖာရ်ဟတ်ဆိုသည့် အခြားမွတ်စလင်အမျိုးသမီးတစ်ဦကလည်း သူမအနေဖြင့် မြောက်ကယ်ရိုလိုင်းနားတွင် မွတ်စလင်လူငယ် ၃ ဦး နေအိမ်၌ အသတ်ခံလိုက်ရပြီးနောက်ပိုင်း လူ့အဖွဲ့အစည်းအတွင်း တက်ကြွသည့် အခန်းကဏ္ဍမှပါဝင်ရန် စိတ်အားထက်သန်ခဲ့သည်ဟု ပြောကြားခဲ့သည်။

“ကျွမတို့ဟာ သာမန်လူတွေပဲဖြစ်တယ်ဆိုတာ လူတွေကို သိစေချင်ပါတယ်။ မွတ်စလင်ဖြစ်ဖြစ်၊ မွတ်စလင်မဟုတ်သူပဲဖြစ်ဖြစ် ကိစ္စမရှိပါဘူး။ လူကောင်းဖြစ်ရင် ရပါပြီ” ဟု ဆဲလီက ပြောကြားခဲ့သည်။

ကနေဒါနိုင်ငံ၏ ၃၂.၈ သန်းသော လူဦးရေတွင် အစ္စလာမ်သာသနာကို သက်ဝင်ယုံကြည်သူမှာ ၂.၈ ရာခိုင်နှုန်းရှိသည်။

Ref: Onislam