နိုက်ဂျီးရီယား ကလပ်အသင်းတစ်ခု ခရီးသွားစဉ် ဓားမြတိုက်ခံရ

မတ် ၇၊ ၂၀၁၅
M-Media

– နိုက်ဂျီးရီးယား ပရီးမီးယားလိဂ် လက်ရှိချန်ပီယံ ကာနိုပီလာ အသင်းမှာ ခရီးသွားနေစဉ် ဓားမြတိုက်ခံရပြီး အသင်းသားများမှာ သေနတ်ဖြင့် ပစ်ခတ်ခံခဲ့ရသည်ဟု သိရသည်။

ရာသီအဖွင့်ပွဲစဉ်အဖြစ် Heartland အသင်းနှင့် အဝေးကွင်းတွင်ကစားရန် အိုဝါရီမြို့သို့ သွားရောက်စဉ် အဘာဂျီဒေသ၌ ကြာသာပတေးနေ့က ဖြစ်ပွားခဲ့ခြင်းဖြစ်ပြီး ကစားသမား ၅ ဦး ဒဏ်ရာရရှိခဲ့သည်။ ထိုအဖြစ်အပျက် ဖြစ်ပွားပြီးနောက် ကာနိုပီလာအသင်းကလည်း ၎င်းတို့၏ Twitter စာမျက်နှာတွင် အတည်ပြုခဲ့သည်။

“သေနတ်ပစ်မှုကြောင့် ကစားသမား ၅ ဦး ဒဏ်ရာရသွားပါတယ်။ သေနတ်သမားက ဟန်းဖုန်းတွေနဲ့ ကစားသမားတွေဆီက အခြား အဖိုးတန်ပစ္စည်းတွေ ယူဆောင်သွားပါတယ်” ဟု ရေးသားဖော်ပြခဲ့သည်။

ကစားသမားများမှာ ဆေးကုသမှု ခံယူပြီးနောက် အခြေအနေ တည်ငြိမ်နေပြီဟု နောက်ပိုင်းတွင် ဖော်ပြခဲ့သည်။ ဒဏ်ရာရရှိခဲ့သည့် ကစားသမား ရူဘန် အော့ဂ်ဘွန်နာယာကလည်း ၎င်းအား ဆုမွန်ကောင်း တောင်းပေးကြသူများကို ကျေးဇူးတင်ကြောင်း Twitter စာမျက်နှာမှတစ်ဆင့် ရေးသားခဲ့သည်။

“ကျွန်တော်နဲ့ ကျွန်တော့်သူငယ်ချင်းတွေကို ကူညီစောင်မခဲ့မှုအတွက် ဘုရားသခင်ကို ကျေးဇူးတင်ပါတယ်။ ဘုရားသခင်က ကျွန်တော်တို့ကို အသက်ရှင်အောင် ကာကွယ်ပေးခဲ့တာပါ။ ပြီးတော့ ကျွန်တော်တို့အပေါ်မှာ မေတ္တာထားခဲ့ကြသူအားလုံးကိုလည်း ကျေးဇူးတင်ပါတယ်။ ကစားသမားတွေကိုလည်း ကျေးဇူးတင်ပါတယ်” ဟု ရေးသားခဲ့သည်။

Ref: Goal.com