မော်ရင်ဟိုမှာ မိမိအတွက် စပါယ်ရှယ်မဟုတ်ဟု ဒေးဗစ်လူဝစ်ဆို

မတ် ၉၊ ၂၀၁၅
M-Media

– မော်ရင်ဟိုမှာ စပါယ်ရှယ်တစ်ယောက် မဟုတ်ဘဲ မိမိတို့ ပီအက်စ်ဂျီအသင်းမှာလည်း နောက်တစ်ဆင့်သို့ တက်ရောက်နိုင်ခွင့် ရှိနေသည်ဟု နောက်ခံလူ ဒေးဗစ်လူးဝစ်က ပြောကြားလိုက်သည်။

ပြီးခဲ့သည့်တစ်ပတ်က ပဲရစ်တွင် ကစားခဲ့သည့် ချန်ပီယံလိဂ် ၁၆ သင်းအဆင့် ပထမအကျော့တွင် ချယ်ဆီးနှင့် ပီအက်စ်ဂျီတို့မှာ ၁ ဂိုးစီ သရေကျခဲ့သည်။ လူးဝစ်မှာ မော်ရင်ဟိုလက်ထက်တွင် ချယ်ဆီး၌ စိတ်ပျက်စရာများ ကြုံတွေ့ခဲ့ရပြီးနောက် ပြီးခဲ့သည့်နှစ် ဇွန်လက ပေါင် သန်း ၅၀ ဖြင့် ပီအက်စ်ဂျီသို့ပြောင်းရွှေ့ခဲ့ပြီး မော်ရင်ဟိုနှင့် အပြန်အလှန် စကားစစ်ထိုးမှုများ ရှိခဲ့သည်။

ယခုတွင်လည်း လူးဝစ်က မော်ရင်ဟိုအား ထပ်မံ၍ စကားနာထိုးခဲ့သည်။

“သူက ခင်ဗျားအတွက်တော့ စပါရှယ်ဖြစ်ရင် ဖြစ်မှာပေါ့။ ကျွန်တော့်အတွက်တော့ မဟုတ်ပါဘူး။ ချယ်ဆီးမှာ ကျွန်တော်ဟာ ကောင်းမွန်တဲ့အချိန်တွေကို ရခဲ့ပြီး ဖလားအများအပြားလည်း ရခဲ့ပါတယ်။ ကျွန်တော် ပျော်ပါတယ်” ဟု လူးဝစ်က L’Equipe သို့ ပြောကြားခဲ့သည်။

အဝေးကွင်းတွင် သရေကျထားပြီး ၁ ဂိုးသွင်းထားနိုင်၍ ချန်ပီယံလိဂ် ဒုတိယအကျော့အတွက် ချယ်ဆီးက အသာရနေပြီး လူးဝစ်ကမူ မိမိတို့အနေဖြင့် ချယ်ဆီးအား မည်ကဲ့သို့ ကစားရမည်ကို သိကြောင်း ထည့်သွင်းပြောကြားခဲ့သည်။

“ကျွန်တော်တို့မှာ ကောင်းမွန်တဲ့ စီမံကိန်းရှိပါလိမ့်မယ်။ ပြီးတော့ စွမ်းဆောင်မှုကောင်းရရှိဖို့အတွက် အကောင်းဆုံးနည်းလမ်းကို အကောင်အထည်ဖော်သွားမှာပါ။ ကျွန်တော်တို့ ၂ သင်းစလုံး နောက်တစ်ဆင့် တက်နိုင်ပါတယ်”

Ref: Goal.com